Read Iloko Genesis 46 Bible Online

Genesis 46 - Iloko bible

Genesis 46

¹Inrubbuat ni Jacob ti amin a sanikuana ket napan idiay Beerseba. Nangidatag sadiay kadagiti daton nga agpaay iti Dios ni Isaac nga amana.

²Iti rabii, iti maysa a parmata, nagsao ti Dios kenkuana. Inyawagna, “Jacob, Jacob!” “Adtoyak, Apo,” insungbat ni Jacob.

³Kinunana, “Siak ti Dios, ti Dios ni amam. Dika agbuteng a mapan idiay Egipto. Pagbalinekto dagiti kaputotam a naindaklan a nasion sadiay.

⁴Kuyogenka a mapan ngem isublikto met laeng dagiti kaputotam iti daytoy a daga. Addanto ni Jose iti sibaymo inton matayka.”

⁵Manipud Beerseba, nagdaliasat ni Jacob a mapan idiay Egipto. Kaduana dagiti appokona ken dagiti manugangna nga inlugan dagiti lallaki nga annakna kadagiti kariton a pinaipan ti ari a paglugananda. Intugotda dagiti animal ken sanikuada a naurnongda idiay Canaan. Inkuyog ni Jacob ti amin a kaputotanna:

⁷dagiti annakna ken dagiti appokona.

⁸Dagitoy dagiti kaputotan ni Jacob a napan idiay Egipto: ni Ruben nga inauna nga anakna

⁹ken dagiti appokona a lallaki nga annak ni Ruben: Hanoc, Pallu, Hezron ken Carmi.

¹⁰Ni Simeon ken dagiti lallaki nga annakna: Jemuel, Jamin, Ohad, Jakin, Zohar ken Saul nga anak ti maysa a Cananea.

¹¹Ni Levi ken dagiti lallaki nga annakna: Gerson, Cohat ken Merari.

¹²Ni Juda ken dagiti lallaki nga annakna: Sela, Perez ken Zera (natay idiay Canaan da Er ken Onan nga annak pay ni Juda). Dagiti lallaki nga annak ni Perez: Hezron ken Hamul.

¹³Ni Issacar ken dagiti lallaki nga annakna: Tola, Pua, Yob ken Simron.

¹⁴Ni Zabulon ken dagiti lallaki nga annakna: Sered, Elon ken Jaleel.

¹⁵Dagitoy dagiti annak ken appoko da Lea ken Jacob; nayanakda amin idiay Padan-aram, malaksid ni Dina nga anakda a babai. Agdagup iti 33 dagiti kaputotanda ken ni Lea.

¹⁶Ni Gad ken dagiti annakna: Zifion, Aggi, Suni, Ezbon, Eri, Arodi ken Areli.

¹⁷Ni Aser ken dagiti lallaki nga annakna: Jimna, Isva, Isvi, Beria ken ni Sera a kabsatda a babai. Da Heber ken Malkiel dagiti lallaki nga annak ni Beria.

¹⁸Dagitoy 16 ti kaputotan ni Jacob ken ni Zilpa, ti tagabu nga inted ni Laban ken ni Lea nga anakna.

¹⁹Da Jose ken Benjamin ti annak ni Jacob ken ni Raquel.

²⁰Idi addada idiay Egipto, dua ti naipasngay nga annak ni Jose: da Manases ken Efraim. Ni Asenat nga anak ni Potifera a padi ti On ti inada.

²¹Dagiti annak ni Benjamin: Bela, Beker, Asbel, Gera, Naaman, Ehi, Ros, Muppim, Huppim ken Ard.

²²Dagitoy 14 ti kaputotan da Jacob ken Raquel.

²³Ni Dan ken ni Husim nga anakna.

²⁴Neftali ken dagiti annakna: Jazeel, Guni, Jeser ken Sillem.

²⁵Pito ti annak ken appoko da Jacob ken Bilha, ti tagabu nga inted ni Laban ken ni Raquel nga anakna.

²⁶Agdagup iti 66 ti amin a kaputotan a nagtaud ken ni Jacob a napan idiay Egipto. Saan a mairaman ditoy dagiti babbai a manugangna.

²⁷Dua ti annak ni Jose a nayanak idiay Egipto, isu a 70 amin ti kameng ti familia ni Jacob sadiay.

²⁸Pinauna ni Jacob ni Juda tapno mapan ken ni Jose ket dawatenna a sabtenna ida idiay Gosen. Idi sumangpetda,

²⁹inrubbuat ni Jose ti luganna ket napanna sinabat ni tatangna idiay Gosen. Idi agkitada, inarakupna ti amana ket nabayag a nagsangit ni Jose.

³⁰Kinuna ni Jacob ken ni Jose, “Ita, nakasaganaakon a matay, ta nakitakan a sibibiag.”

³¹Kinuna ni Jose kadagiti kakabsatna ken kadagiti dadduma a kameng ti familia ti amana, “Masapul nga innak ibaga iti ari a simmangpetkayon a kakabsatko ken ti familia ni amak nga agnanaed iti Canaan.

³²Ibagak kenkuana nga agpaspastorkayo ket inkuyogyo dagiti arban ken amin a sanikuayo.

³³Inton ayabannakayo ket damagenna no ania ti trabahoyo,

³⁴masapul nga ibagayo nga agpaspastorkayo sipud pay idi ubbingkayo, kas kadagidi kapuonanyo. Iti kasta, palubosannakayto nga agnaed iti daga ti Gosen.” Imbaga daytoy ni Jose gapu ta kagurgura dagiti Egipcio dagiti agpaspastor.