Read Iloko Genesis 47 Bible Online

Genesis 47 - Iloko bible

Genesis 47

¹Intugot ni Jose ti lima kadagiti kakabsatna ket napan iti ari. Imbagana kenkuana, “Simmangpeten ni tatang ken dagiti kakabsatko a naggapu idiay Canaan. Inkuyogda dagiti arbanda ken ti amin a sanikuada. Addada ita iti deppaar ti Gosen.”

²Ket indatagna dagiti kakabsatna iti ari.

³“Ania ti trabahoyo?” sinaludsod ti ari kadakuada. Insungbatda, “Agpaspastorkami a kas kadagiti kapuonanmi, apo.

⁴Immaykam agnaed ditoy, apo, gapu ta nakaro unay ti bisin idiay Canaan ket awanen ti pangipastoranmi kadagiti arbanmi. Palubosannakami koma nga agnaed idiay Gosen.”

⁵Kinuna ti ari ken ni Jose, “Ita ta simmangpeten ni tatangmo ken dagiti kakabsatmo,

⁶ibilangda koma a kukuada ti Egipto. Pagnaedem ida iti kasayaatan a paset ti pagilian, iti daga ti Gosen. Ket no adda dagiti makabael kadakuada, isaadmo ida nga agaywan kadagiti animalko.”

⁷Kalpasanna, indatag ni Jose ti amana iti ari. Kinablaawan ni Jacob ti ari.

⁸“Mano ti tawenmon?” sinaludsod ti ari.

⁹Insungbat ni Jacob, “Aganay a sangagasut ket tallopulo a tawenen nga agalla-allaak iti rabaw ti daga. Bassit ken narigat dagiti tawen a panagbiagko, saan a kas kapaut ti panagbiag dagiti kapuonak.”

¹⁰Binendisionan ni Jacob ti ari ket kalpasanna pimmanaw.

¹¹Pinagtaeng ni Jose ni tatangna ken dagiti kakabsatna iti Egipto. Kas imbilin ti ari, inikkanna ida iti daga iti kasayaatan a paset ti pagilian, iti asideg ti siudad ti Rameses.

¹²Inikkan ni Jose ni tatangna iti taraon, dagiti kakabsatna ken amin a familia ti amana agraman ti kaubingan.

¹³Awanen ti masarakan a taraon ket kasta unayen ti panagbisin dagiti tattao ti Egipto ken Canaan.

¹⁴Tunggal adda gumatang iti irik, alaen ni Jose ti kuarta a paglakoan sana ipan iti palasio.

¹⁵Idi awanen ti igatang dagiti tattao iti irik, napan dagiti Egipcio kenkuana ket kinunada, “Naibusen ti kuartami. Ikkannakami koma iti makan, ta mataykamin iti bisin.”

¹⁶Insungbat ni Jose, “No awanen ti kuartayo, yegyo dagiti animalyo ta sukatak iti taraon.”

¹⁷Ngarud, impanda kenkuana dagiti animalda—kabalio, karnero, kalding, baka, asno—ket sinuktanna dagitoy iti makan.

¹⁸Iti sumuno a tawen, napanda ken ni Jose ket kinunada, “Apo, dimi mailibak a naibusen ti kuartami ket naitedmi pay aminen kenka dagiti animalmi. Pulos nga awanen ti nabati kadakami, malaksid dagiti bagimi ken dagiti dagami.

¹⁹Dimo koma ipalubos a mataykami. Tulongannakami! Dimo ipalubos nga aglangalang dagiti talonmi. Gatangennakami ken dagiti dagami a kas sukat ti taraon. Agbalinkami a tagabu ti ari ket tagikuaenna dagiti dagami. Ikkannakami koma iti irik agraman bukbukel nga imulami kadagiti talonmi tapno dikam matay iti bisin.”

²⁰Ginatang ni Jose ti amin a talon idiay Egipto para iti ari. Kapilitan nga inlako dagiti Egipcio dagiti talonda gapu ta nakaro unay ti bisin, isu a nagbalin a kukua ti ari ti amin a daga.

²¹Nagbalin a tagabu dagiti tattao iti amin a paset ti Egipto.

²²Dagiti laeng daga dagiti papadi ti saan a nagatang. Adda ngamin abastoda nga it-ited ti ari ket saan a masapul nga ilakoda ti dagada.

²³Kinuna ni Jose kadagiti tattao, “Kitaenyo, ginatangkayon agraman dagiti dagayo para iti ari. Adtoy dagiti bukel nga imulayo.

²⁴Iti tiempo ti panagani, masapul nga itedyo iti ari ti apagkalima ti apit. Mabalinyo nga usaren ti mabati a kas bin-i ken taraon nga agpaay kadakayo a sangafamiliaan.”

²⁵Insungbatda, “Naimbagka unay kadakami, apo. Inispalnakami. Sisasaganakami nga agbalin a tagabu ti ari.”

²⁶Manipud idin, nagbalin a linteg iti entero nga Egipto ti pannakaited iti ari ti apagkalima ti maapit. Agpapan ita, masursurot pay laeng daytoy a linteg nga impaulog ni Jose. Dagiti laeng daga dagiti papadi ti saan a tinagikua ti ari.

²⁷Nagnaed dagiti Israelita iti deppaar ti Gosen idiay Egipto. Bimmaknangda ken immadu dagiti annakda.

²⁸Sangapulo ket pito a tawen a nagnaed ni Jacob idiay Egipto agingga a nadanonna ti 147 a tawen.

²⁹Idi umasidegen ti ipapatayna, pinaayabanna ni Jose nga anakna ket kinunana, “Ikabilmo ti imam iti baet dagiti luppok ket isapatam a dinakto itabon ditoy Egipto.

³⁰Kayatko a maitabonak iti nakaitaneman dagidi kapuonak. Ipanawnak ditoy Egipto ket itabonnak iti nakaitanemanda.” “Aramidek ti dawatmo, ama,” insungbat ni Jose.

³¹Kinuna ni Jacob, “Isapatam a tungpalem.” Nagsapata ni Jose ket nagtamed ni Jacob iti uloanan ti iddana.