Read Iloko Genesis 49 Bible Online

Genesis 49 - Iloko bible

Genesis 49

¹Inayaban ni Jacob dagiti annakna ket kinunana, “Umasidegkayo kaniak ket ibagak ti mapasamakto kadakayo iti masakbayan:

²“Aribungbongandak, dakayo nga annakko; denggenyo ni Israel a tatangyo.

³“Ruben nga inauna, sika ti pigsak; wen, sika ti inauna a bungak, sika ti katangsitan ken kapigsaan kadagiti amin nga annakko.

⁴Mayarigka iti nadawel a karayan, ngem saanto a sika ti kangrunaan, ta kinaiddam ti babai nga inkabbalayko ket tinulawam ti idda ni amam.

⁵“Agkabsat da Simeon ken Levi; inusarda ti armasda nga agranggas.

⁶Diak makiraman kadagiti nalimed a saritaanda, wenno makibiang kadagiti taripnongda, gapu ta agpapatayda iti tao iti pungtotda pagang-angawanda a pilayen dagiti toro a baka.

⁷Mailunod koma ti pungtotda ta nakaro unay; mailunod koma ti ungetda ta ranggasda ti napalalo. Iwaraskonto ida iti entero nga Israel Ket iwarakto ida kadagiti tattaona.

⁸“Juda, dayawendakanto dagiti kakabsatmo. Bekkelem dagiti kabusormo. Agrukbabto kenka dagiti kakabsatmo.

⁹Leon ti kayarigan ni Juda. Patayenna ti tukmaanna sa agsubli iti aponna. Kasla leon nga agunnat sa agidda, awan makaitured a mangsinga kenkuana.

¹⁰Ikutan ni Juda ti setro, agnanayon nga agturay dagiti kaputotanna. Yegto dagiti nasion dagiti sagut a pagbayadda kenkuana. Ket agtamedda a mangipakita iti panagtulnogda.

¹¹Igalutna ti urbon nga asnona iti puon ti ubas, iti kasayaatan nga ubas. Labaanna dagiti pagan-anayna iti arak a nalabaga.

¹²Nalabbaga dagiti matana iti kaiinumna iti arak. Napudaw dagiti ngipenna iti kaiinumna iti gatas.

¹³“Agnaedto ni Zabulon iti igid ti taaw; pagsangladanto ti barko ti baybayna. Dumanonto idiay Sidon ti beddengna.

¹⁴“Arig ni Issacar iti asno nga agidda iti baet dagiti pagkargaan.

¹⁵Ngem makitana a nasayaat ti paginanaan ken makaliwliwa ti daga ket agrukob a mangbaklay iti karga, mapilit nga agtrabaho a kas tagabu.

¹⁶“Iturayanto ni Dan dagiti tattaona. Agbalindanto a kas kadagiti dadduma a tribu ti Israel.

¹⁷Arigto ni Dan iti uleg iti igid ti dalan; wen, nagita nga uleg iti igid ti dana a mangkagat iti mukod ti kabalio a pakatnagan ti nagsakay.

¹⁸“Urayek ti panangispalmo, O Apo!

¹⁹“Maysanto a bunggoy ti mannanakaw ti mangdarup ken ni Gad ngem sumarangetto ket sunsonenna ida.

²⁰“Agtaud iti talon ni Aser dagiti nababaknang a taraon; a maikari iti lamisaan ti ari.

²¹“Maysa nga ugsa ni Neftali nga agtaray a siwawaya, napipintas dagiti urbon a yanakna.

²²“Kasla atap nga asno ni Jose iti igid ti maysa nga ubbog, urbon ti kabalio iti bakras ti turod.

²³Sirurungsot a darupen dagiti kabusorna, ibiatda dagiti panada a mangsunson kenkuana.

²⁴Ngem agtalinaed a nalagda ti bai ti panana ket mapapigsa dagiti takiagna gapu iti Mannakabalin a Dios ni Jacob, gapu iti Pastor a manalaknib iti Israel.

²⁵Ti Dios ni amam ti tumulong kenka, ti Dios a Mannakabalin-amin ti mangbendision kenka: Paraburannaka iti tudo nga aggapu iti ngato ken danum nga aggapu iti uneg ti daga. Paraburannaka iti annak ken adu a baka.

²⁶Bendisionannaka iti bukel ken sabong, kadagiti bambantay idi ugma, dagiti makaay-ayo a banag nga aggapu kadagiti agnanayon a turod. Maisaad koma dagitoy a bendision iti ulo ni Jose, iti muging ti napili kadagiti kakabsatna a lallaki.

²⁷“Arig narungsot a lobo ni Benjamin: Binigat ken rinabii nga agpapatay ken aglamut.”

²⁸Dagitoy dagiti sangapulo ket dua a tribu ti Israel ket daytoy ti imbaga ni tatangda idi agpakada kadakuada a nangbendisionanna iti tunggal maysa kadagiti annakna.

²⁹Binilin ni Jacob dagiti annakna, “Ita ta innakon tumipon kadagiti pimmusay a kapuonak, itabondak iti nakaitaneman dagiti nagannak kaniak iti rukib nga adda iti talon ni Efron a Heteo,

³⁰idiay Macpela, iti daya ti Mamre iti daga ti Canaan. Ginatang ni Abraham daytoy a rukib ken ti talon ken ni Efron a Heteo tapno agpaay a pagitaneman.

³¹Sadiay ti nakaitabonan ni Abraham ken ni Sara nga asawana agraman ni Isaac ken ni Rebecca nga asawana. Sadiay met ti nangitanemak ken ni Lea.

³²Nagatang kadagiti Heteo ti talon ken ti rukib nga adda iti sakupna. Itanemdak sadiay.”

³³Idi malpas ti panangbilin ni Jacob kadagiti annakna, nagidda ket natayen.