Read Iloko Genesis 50 Bible Online

Genesis 50 - Iloko bible

Genesis 50

¹Inarakup ni Jose ti amana ket agsangsangit a mangag-agek iti rupana.

²Kalpasanna, imbilinna a maembalsamo ti bangkayna.

³Inaramidda daytoy iti 40 nga aldaw, ti bilang ti aldaw a gagangay a panagembalsamo. Dinung-awan dagiti Egipcio iti 70 nga aldaw.

⁴Idi nalpas ti tiempo a panagdung-aw, kinuna ni Jose kadagiti ofisiales ti ari, “Pangngaasiyo ta inkay ibaga iti ari

⁵a sakbay a matay ni tatangko, dinawatna nga itabonko idiay Canaan, iti tanem nga insaganana a para kenkuana. Inkarik a tungpalen ti dawatna. Ibagayo ngarud iti ari a kiddawek ti pammalubosna nga innak itabon ti amak. Agsubliakto met laeng.”

⁶“Inka itabon ni tatangmo a kas inkarim kenkuana,” kinuna ti ari.

⁷Napan intabon ni Jose ti tatangna. Nakipamumpon dagiti amin nga ofisiales ti ari, dagiti panglakayen ti palasiona ken dagiti mabigbigbig nga umili iti Egipto.

⁸Kimmuyog ti familiana, dagiti kakabsatna ken ti familia ni tatangna. Dagiti laeng babassit nga annakda, dagiti kalding, karnero, ken bakada ti nabati idiay Gosen.

⁹Kimmuyog met kenkuana dagiti tattao a naglugan kadagiti lugan a pakigubat ken dagiti nagkabalio a soldado. Nakadakdakkel ti bunggoy.

¹⁰Idi dumtengda iti pagirikan iti Atad, iti daya ti Jordan, nagsardengda ket nabayag a nagdungdung-awda iti napigsa. Pito nga aldaw nga inannong ni Jose ti seremonia ti panagdung-aw.

¹¹Idi makita dagiti umili ti Canaan dagiti agdudung-aw idiay Atad, kinunada, “Nadaeg daytoy a seremonia ti panagdung-aw dagiti Egipcio.” Daytoy ti gapuna nga Abel Mizraim ti naipanagan iti dayta a lugar.

¹²Tinungpal dagiti annak ni Jacob ti imbilin ti amada kadakuada.

¹³Impanda ti bangkayna idiay Canaan ket intabonda iti rukib idiay Macpela, iti daya ti Mamre, iti talon a ginatang ni Abraham ken ni Efron a Heteo.

¹⁴Kalpasan ti panangitabon ni Jose iti amana, nagsubli idiay Egipto agraman dagiti kakabsatna ken amin a kimmuyog kenkuana a nakipumpon.

¹⁵Kalpasan ti ipapatay ni tatangda, kinuna dagiti kakabsat ni Jose, “Kaguranatayo pay laeng ngata ni Jose ket balsennatayo iti amin a kinadakes nga impaaytayo kenkuana?”

¹⁶Iti kasta, pinaibagada ken ni Jose, “Sakbay a natay ni tatang,

¹⁷imbagana kadakami nga ibagami daytoy kenka, ‘Pangngaasim ta pakawanem dagiti kakabsatmo iti kinadakes nga inaramidda kenka.’ Ita, pakawanennakami koma iti dakes nga inaramidmi, dakami nga adipen ti Dios ni tatangmo.” Nagsangit ni Jose idi maipakaammo daytoy kenkuana.

¹⁸Kalpasanna, mismo a dagiti kakabsatna ti dimmatag kenkuana ket nagruknoyda iti sangoananna. “Adtoykami a sisasagana nga agserbi a kas tagabum,” kinunada.

¹⁹Ngem kinuna ni Jose, “Dikay agbuteng. Diak mabalin nga alaen ti lugar ti Dios.

²⁰Dakes ti pinanggepyo nga aramiden kaniak, ngem pinagbalin ti Dios a naimbag daytoy tapno maispal ti adu a tattao a sibibiag ita nga aldaw gapu iti napasamak.

²¹Awan ti rumbeng a pagbutnganyo. Siak ti makaammo kadakayo ken kadagiti annakyo.” Idi nangngegda daytoy, natignay ti pusoda ket timmured ti pakinakemda.

²²Nagtalinaed ni Jose idiay Egipto agraman dagiti familia ti amana. Agtawen iti 110 idi matay.

²³Nakitana pay dagiti dadduma nga annak ni Efraim ken dagiti appokona. Adda pay la a biag idi maipasngay dagiti annak ni Makir nga anak ni Manases; pinagbalinna ida a kameng ti familiana.

²⁴Kinunana kadagiti kakabsatna, “Dandanin ti ipapatayko, ngem awan pagdanaganyo ta aywanannakayo ti Dios. Ipanawnakayo iti daytoy a daga ket ipannakayo iti daga a sinapataanna nga ited kada Abraham, Isaac ken Jacob.”

²⁵Kalpasanna, pinagsapata ni Jose dagiti kakabagianna, “Ikariyo nga inton ipannakayo ti Dios iti dayta a daga, ikuyogyonto ti bangkayko.”

²⁶Agtawen iti 110 ni Jose idi matay. Binalsamoda ti bangkayna idiay Egipto sada inkabil iti lungon.