Read Iloko Genesis 7 Bible Online

Genesis 7 - Iloko bible

Genesis 7

¹Kinuna ni Yahweh ken ni Noe, “Sumrekkayo a sangafamiliaan iti daong. Nasarakak a sika laeng ti nalinteg ditoy lubong.

²Mangikuyogka iti pito a pagassawaan iti amin a kita ti animal a maibilang a nadalus ken sangaparis iti amin a saan a maibilang a nadalus.

³Mangikuyogka met iti pito a paris ti amin a kita ti tumatayab. Aramidem daytoy tapno mataginayon ti amin a kita ti animal ken tumatayab ket umadudanto manen iti rabaw ti daga.

⁴Pito nga aldaw manipud ita, pagtudoek nga agpaut iti 40 nga aldaw ken rabii tapno mapukaw ti amin a sibibiag a parsua.”

⁵Ket inaramid ni Noe ti amin nga imbilin ni Yahweh.

⁶Agtawen ni Noe iti 600 idi malayus ti daga.

⁷Naglugan ngarud iti daong a kaduana ti asawana, dagiti annakna ken dagiti assawada tapno malisianda ti layus.

⁸Kas imbilin ti Dios, inkuyogna ti pagassawaan ti amin a kita ti animal ken tumatayab, maibilangda man a nadalus wenno saan.

¹⁰Dimteng ti layus kalpasan ti pito nga aldaw.

¹¹Agtawenen ni Noe iti 600. Iti maika-17 nga aldaw ti maikadua a bulan, pimsuak ti amin nga ubbog ti dakkel a taaw iti uneg ti daga, naluktan dagiti amin a pagruaran ti danum ti tangatang

¹²ket nagtudo iti unos ti 40 nga aldaw ken rabii.

¹³Iti dayta met la nga aldaw, limmugan ni Noe ken ti asawana iti daong. Kaduada dagiti tallo nga annakda—da Sem, Ham ken Jafet ken dagiti assawada.

¹⁴Limmugan met ti amin a kita ti animal, naamo ken naatap, dagiti agkarkarayam ken dagiti agkarkaradap ken amin a kita ti tumatayab.

¹⁵Kas imbilin ti Dios, sangapagassawaan ti tunggal kita ti sibibiag a parsua ti inkuyog ni Noe iti daong.

¹⁶Kalpasanna, rinikpan ni Yahweh ti ruangan ti daong.

¹⁷Uppat a pulo nga aldaw a nagpaut ti layus. Dimmakkel ti danum agingga a timpaw ti daong.

¹⁸Idi umadalem nga umadalem, nayan-anud ti daong.

¹⁹Nagtultuloy a dimmakkel ti danum agingga a natinep dagiti kangatoan a bantay.

²⁰Immadalem nga immadalem ket ngimmato ti danum iti pito a metro iti labes ti tuktok dagiti bantay.

²¹Natay amin a nabiag iti rabaw ti daga—dagiti tumatayab, dagiti animal ken amin a tattao.

²²Natay amin nga adda angesna ditoy daga.

²³Pinukaw ni Yahweh ti amin a sibibiag ditoy daga—tao, animal ken tumatayab, malaksid ni Noe ken dagiti kakaduana iti daong.

²⁴Saan a nagimbaas ti danum iti uneg ti 150 nga aldaw.