Read Iloko Genesis 8 Bible Online

Genesis 8 - Iloko bible

Genesis 8

¹Saan a nalipatan ti Dios ni Noe ken dagiti amin nga animal a kaduana iti daong. Pinaganginna ket nangrugi a bimmassit ti danum.

²Narikpan dagiti ubbog iti uneg ti daga ken dagiti ruangan ti danum iti tangatang. Nagsardeng ti tudo,

³ket nain-inut a nagimbaas ti danum iti unos ti 150 nga aldaw.

⁴Iti maika-17 nga aldaw iti maikapito a bulan, naisadsad ti daong iti kabambantayan ti Ararat.

⁵Nagtuloy a bimmaba ti danum ket iti umuna nga aldaw ti maika-10 a bulan, nagparang ti tuktok dagiti bantay.

⁶Kalpasan ti 40 nga aldaw, nangilukat ni Noe iti maysa a tawa ti daong

⁷ket nangibulos iti wak. Saan a nagsubli ti wak ngem nagtayab a naglawlawlaw agingga iti awanen ti danum.

⁸Kabayatanna, nangipatayab ni Noe iti kalapati tapno kitaenna no imbaasen ti danum.

⁹Ngem gapu ta natinep pay laeng ti daga, awan ti nasarakan ti kalapati a pagdissoanna. Nagsubli iti daong ket tiniliw ni Noe sana insubli iti uneg.

¹⁰Pinalabas ni Noe ti pito nga aldaw sana manen imbulos ti kalapati.

¹¹Iti sumipnget, nagsubli kenkuana ti kalapati. Adda nalangto a bulong ti olibo iti sippit ti kalapati. Daytoy ti nakaammoan ni Noe a bimmaban ti danum.

¹²Pinalabasna manen ti pito nga aldaw sana impatayab ti kalapati. Saanen a nagsubli ti tumatayab.

¹³Agtawen idin ni Noe iti 601. Iti umuna nga aldaw ti umuna a bulan, inikkat ni Noe ti atep ti daong, inwarasna ti panagkitana ket nakitana nga agmagmagan ti daga.

¹⁴Iti maika-27 nga aldaw ti maikadua a bulan, namagaanen a namimpinsan ti daga.

¹⁵Kinuna ti Dios ken ni Noe,

¹⁶“Rummuarkayon nga agassawa agraman dagiti annakmo ken dagiti assawada.

¹⁷Paruarem met dagiti amin a tumatayab ken animal; bay-am nga umaduda tapno agwarasda iti rabaw ti daga.”

¹⁸Rimmuar ngarud iti daong ni Noe, ti asawana, dagiti annakda ken dagiti assawada.

¹⁹Rimmuar met dagiti amin nga animal ken tumatayab. Nagrupo-grupoda segun ti klaseda.

²⁰Nangbangon ni Noe iti altar a maipaay ken ni Yahweh. Nangala iti saggaysa kadagiti maibilang a nadalus nga animal ken tumatayab sana pinuoran dagitoy iti altar a kas daton.

²¹Nalang-ab ni Yahweh ti nabanglo nga ayamuom ti sakrifisio ket kinunana iti nakemna, “Pulos a diakton ilunod ti daga gapu iti aramid ti tao. Ammok a dakes ti panunotna manipud kinaubingna. Diakton dadaelen ti aniaman nga adda biagna a kas iti inaramidko.

²²No la ket adda ti lubong, addanto latta tiempo ti panagmula ken tiempo ti panagapit; addanto latta panawen ti lam-ek ken panawen ti pudot, panawen ti kalgaw ken panawen ti tudtudo. Addanto latta aldaw ken rabii.”