Read Iloko 2 Samuel 1 Bible Online

2 Samuel 1 - Iloko bible

2 Samuel 1

¹Kalpasan ti ipapatay ni Saul, idi naparmeken ni David dagiti Amalekita, nagsubli idiay Siklag, ket dua nga aldawna a nagyan sadiay.

²Iti sumaruno nga aldaw, adda simmangpet nga agtutubo a lalaki a naggapu iti kampo ni Saul. Tapno maipakita ti panagladingitna, pinigispigisna ti pagan-anayna ken winarakiwakanna ti ulona iti tapok. Dimmatag ken ni David, ket nagparintumeng a siraraem.

³Dinamag ni David no sadino ti naggapuanna. “Naglibasak iti kampo dagiti Israelita,” insungbat ti agtutubo.

⁴“Ania ti napasamak?” sinaludsod ni David. “Ibagam kaniak.” “Nagtataray ti armadami manipud iti paggugubatan,” insungbat ti agtutubo, “ket adu ti natay a tattaomi. Natay met ni Saul ken ni anakna a Jonatan.”

⁵“Kasano nga ammom a natay da Saul ken Jonatan?” sinaludsod ni David.

⁶“Nairana nga addaak idiay Bantay Gilboa ket nakitak ni Saul nga agsadsadag iti gayangna,” kinuna ti agtutubo. “Umas-asideg kenkuana dagiti lugan a pakigubat dagiti kabusor ken dagiti nagkabalio.

⁷Idi tumalliaw, nakitanak ket inayabannak. Sinaludsodko no ania ti maitulongko kenkuana.

⁸Sinaludsodna no siasinoak ket imbagak a maysaak nga Amalekita.

⁹Imbagana nga asitgak tapno patayek. Kinunana nga agbiag pay laeng, ngem saannan a maitured ti nakaro a panagsagabana.

¹⁰Inasitgak ngarud ket pinatayko agsipud ta ammok unay a matay met laeng apaman a matuang. Kalpasanna, innalak ti korona iti ulona ken ti pulseras iti takkiagna ket inyegko ida kenka, apo.”

¹¹Gapu iti ladingitna, rinay-ab ni David ti pagan-anayna. Ket kasta met ti inaramid dagiti amin a tattaona.

¹²Nagdung-aw, nagsangit ken nagayunarda agingga iti rabii gapu kada Saul ken Jonatan ken gapu kadagiti Israelita a tattao ni Yahweh, ta adu unay kadakuada ti napasag iti paggugubatan.

¹³Sinaludsod ni David no taga-ano ti agtutubo a nangyeg iti damag. “Maysaak nga Amalekita, ngem agnaedak iti pagilianyo,” insungbatna.

¹⁴“Apay a dika nagbuteng a nangpatay iti ari a pinili ti Apo?” kinuna ni David.

¹⁵Inayaban ni David ti maysa kadagiti taona ket imbilinna, “Papatayem!” Dinuyok ti lalaki ti Amalekita ket natay ti agtutubo.

¹⁶Kinuna ni David, “Sika met la ti nangukom iti bagim iti panangipudnom iti panangpataymo iti ari a pinili ti Apo.”

¹⁷Kinanta ni David daytoy a dung-aw a maipaay ken ni Saul ken ni Jonatan nga anakna,

¹⁸ket imbilinna a maisuro daytoy kadagiti taga-Juda. (Nailanad daytoy iti Libro ni Jasar.)

¹⁹“Kadagiti turod ti Israel, naidasay dagiti pangulomi; napasag dagiti katuredan a soldadomi.

²⁰Diyo iwaragawag daytoy idiay Gat wenno ipakaammo kadagiti kalsada ti Askelon. Diyo pagragsaken dagiti babbai a Filisteo, isuda nga annak dagiti pagano.

²¹“Sapay koma ta awan linnaaw wenno tudo nga agtinnag kadagiti turturod ti Gilboa. Sapay koma a kanayon a natikag dagiti kataltalonanna. Ta naiwalang sadiay dagiti kalasag dagiti mannakigubat—awanen silapda; aglatlati ti kalasag ni Saul.

²²Saan a nagsarday ti panagpapatay ti bai ni Jonatan; awan kinaasian ti kampilan ni Saul, pinatayna dagiti mannakabalin, ginudasna ti kabusor.

²³“Makaay-ayo ken maipatpateg unay da Saul ken Jonatan. Iti panagbiag saanda a nagsina, iti ipapatay nagmaymaysada. Naparpartakda ngem dagiti agila, napigpigsada ngem dagiti leon.

²⁴“Babbai iti Israel, dung-awanyo ni Saul. Kinawesannakay iti napipintas a lupot nga eskarlata, inarkosannakay iti alahas ken balitok.

²⁵“Napasag dagiti maingel a soldado, napapatayda iti paggugubatan. Naidasay ni Jonatan iti katurturodan!

²⁶“Dung-awanka, Jonatan a kabsatko; napategka la unay kaniak. Nakaskasdaaw ti panagayatmo kaniak, rimbawanna ti panagayat dagiti babbai.

²⁷“Napasagen dagiti mannakigubat! Nabaybay-an dagiti igamda, awanen serserbi dagiti armasda.”