Read Iloko 2 Samuel 10 Bible Online

2 Samuel 10 - Iloko bible

2 Samuel 10

¹Iti saan a mabayag, natay ni Naas nga ari ti Ammon. Ni Hanun nga anakna ti simmukat kenkuana a kas ari.

²Kinuna ni Ari David, “Masapul nga ipakitak ti napudno a pannakigayyemko ken ni Hanun, kas iti impakita kaniak daydi amana.” Nangibaon ngarud ni David kadagiti tattaona a mangidanon iti pannakipagladingitna ken ni Hanun gapu iti ipapatay ti amana. Idi dumteng dagiti naibaon,

³kinuna dagiti papangulo nga Ammonita iti ari, “Mamatika kadi nga imbaon ni David dagitoy a tattao tapno yebkasda ti pannakipagladingitda gapu iti ipapatay ni amam? Imbaonna ida ditoy a kas espia tapno siimenda ti siudad ket maparmeknatayo!”

⁴Pinatiliw ni Hanun dagiti imbaon ni David, kiniskisanna ti maysa a bangir ti barbasda, pinutedna dagiti pagan-anayda agingga iti patongda sana pinagawid ida.

⁵Gapu iti bainda, saanda a nagawid. Idi maipadamag ken ni David ti napasamak kadakuada, pinaibagana kadakuada nga agyanda idiay Jerico agingga nga agtubo manen dagiti barbasda.

⁶Nabigbig dagiti Ammonita a nagbalin a kabusorda ni David gapu ti inaramidda. Isut' gapuna a nangtangdanda iti duapulo a ribu a mannakigubat a Siriano manipud iti Berehob ken Soba, agraman 12,000 a soldado manipud Tob ken ti ari ti Maaca agraman ti sangaribu a soldadona.

⁷Nadamag daytoy ni David, ket imbaonna ti entero nga armadana nga impanguloan ni Joab a manggubat kadakuada.

⁸Rimmuar dagiti Ammonita ket nagpuestoda iti pagserkan iti Raba, ti kangrunaan a siudad. Nagpuesto met dagiti mannakigubat ti Siria ken dagiti soldado ti Tob, kasta met ken ni Maaca iti patad.

⁹Nakita ni Joab a dumarup dagiti kabusor iti sangoanan ken iti likudanna. Iti kasta, pinilina dagiti kalaingan a mannakigubat ti Israel ket impuestona ida a sumango kadagiti Siriano.

¹⁰Inkabilna dagiti dadduma a soldadona iti babaen ni Abisai a kabsatna, ket impasangona ida a sumaranget kadagiti Ammonita.

¹¹Kinuna ni Joab ken ni Abisai, “No makitam a saanmi a kabaelan dagiti taga-Siria, umaynak tulongan. No makitak met a diyo kabaelan dagiti Ammonita, umayka met tulongan.

¹²Tumuredkayo. Makigubattayo a sipipinget gapu iti pagiliantayo ken kadagiti siudad ti Diostayo. Maaramid koma ti pagayatan ti Apo.”

¹³Dimmarup ni Joab ken dagiti soldadona ket nagtataray dagiti Siriano.

¹⁴Idi makita dagiti Ammonita nga agtatarayda, intarayanda met ni Abisai sada simrek iti siudad. Kalpasan ti pannakigubat ni Joab kadagiti Ammonita, nagsubli idiay Jerusalem.

¹⁵Nabigbig dagiti taga-Siria a pinarmek idan dagiti Israelita. Iti kasta, inummongda dagiti amin a buyotda.

¹⁶Pinaayaban ni Ari Adadezer dagiti Siriano nga adda iti ballasiw ti Karayan Eufrates, napanda idiay Helam babaen iti panangipangulo kadakuada ni Sobac a pangulo ti armada ni Adadezer.

¹⁷Idi madamag daytoy ni David, inummongna dagiti mannakigubat nga Israelita, binallasiwda ti Karayan Jordan ket napanda idiay Helam. Nagpuesto dagiti Siriano a mangsaranget kenkuana. Nangrugi ti gubat,

¹⁸ket pinagtaray dagiti Israelita dagiti mannakigubat a taga-Siria. Pinatay ni David ken dagiti soldadona ti pito gasut a mangiturturong kadagiti lugan a pakigubat ken 40,000 a nagkabalio. Nasugatan ni Sobac a pangulo dagiti kabusor, ket natay iti paggugubatan.

¹⁹Idi makita dagiti ari a pasurot ni Adadezer a pinarmek idan dagiti Israelita, nakikappiada ket pinaiturayanda kadagiti Israelita. Manipud idin, nagbuteng dagiti taga-Siria a tumulong kadagiti Ammonita.