Read Iloko 2 Samuel 13 Bible Online

2 Samuel 13 - Iloko bible

2 Samuel 13

¹Adda napintas a babai a kabsat ni Absalom nga anak ni David. Isu ni Tamar. Nagayat kenkuana ni Amnon a maysa kadagiti annak ni David iti sabali a babai.

²Kasta unay ti panagayatna kenkuana, ket urayna la insaksakit, ta narigat a matagikuana ni Tamar. Kas maysa a birhen, saan a mapalubosan a makilangen iti lalaki.

³Ngem adda gayyem ni Amnon nga agnagan iti Jonadab nga anak ni Samma a kabsat ni David. Nasikap unay ni Jonadab.

⁴Kinuna ni Jonadab ken ni Amnon, “Anaknaka ti ari, ngem apay nga inaldaw a makitaka a malmalday?” “Agayatak unay ken ni Tamar a kabsatko iti ama ken kabsat ni Absalom,” insungbat ni Amnon.

⁵Kinuna ni Jonadab ken ni Amnon, “Agiddaka iti katre ket aginsasakitka. Inton umaynaka sarungkaran ni amam, ipakpakaasimto kenkuana nga ibaonna ni Tamar tapno ilutoannaka iti kankanen. Kayatmo a makita ti panaglutona ket dawatem pay nga isu ti mangsubo kenka.”

⁶Naginsasakit ngarud ni Amnon ket napan nagidda. Sinarungkaran ni Ari David ni Amnon. Kinuna ni Amnon kenkuana, “Pangngaasim ta ibagam nga umay ditoy ni Tamar tapno yaramidannak iti kankanen. Kayatko a makita ti panaglutona ket isu metten ti mangpakan kaniak.”

⁷Iti kasta, pinaibaga ni David ken ni Tamar, “Inka iti balay ni Amnon, ket isaganaam iti kanenna.”

⁸Napan ni Tamar ket nadanonna ni Amnon a nakaidda. Nangala iti arina sana linuto sadiay a makitkita ni Amnon.

⁹Kalpasanna, innalana ti pariok, inadawna dagiti kankanen sana impasango ken ni Amnon. Ngem madi a mangan ni Amnon. Binilinna ni Tamar a paruarenna dagiti adda iti kuarto. Idi nakapanawda aminen,

¹⁰kinunana iti kabsatna, “Yegmo dagiti kankanen ditoy katrek ket suboannak.” Innala ni Tamar dagiti kankanen ket inyasidegna ida ken ni Amnon.

¹¹Ngem idi yawatna dagiti kankanen, ginammatan ni Amnon sana kinuna, “Umayka ta agkaiddata.”

¹²“Saan,” insungbat ni Tamar, “dinak piliten; ta naalas nga aramid dayta. Saan a maipalubos iti entero nga Israel.

¹³Anianto pay ti rupak iti publiko? Ket sika, mamimpinsan a maibabainkanto iti Israel. Pangngaasim ta kasaom ti ari. Ammok a saan nga agkedked ti panagasawata.”

¹⁴Ngem dina impangag ni Tamar ket gapu ta napigpigsa ngem isu, impaiddana sana rinames.

¹⁵Kalpasan ti panangramesna ken ni Tamar, rimsua ti napalalo a gurana iti babai. Nakarkaro ti gurana ngem ti nariknana a panagayatna idi kenkuana. “Pumanawkan!” kinunana kenkuana.

¹⁶“Saan,” insungbat ni Tamar. “Dakdakkel a basol ti panangpapanawmo kaniak ngem ti panangramesmo kaniak.” Ngem saan nga impangag ni Amnon ni Tamar.

¹⁷Inayaban ni Amnon ti adipenna sana kinuna, “Paruarem daytoy a babai samo balunetan ti ruangan.”

¹⁸Pinapanaw ti adipen ni Tamar sana binalunetan ti ruangan. Siaarruat idi ni Tamar iti kawes nga atiddog ti manggasna ti kawes ti saan pay a naasawaan a prinsesa kadagidi nga aldaw.

¹⁹Winarakiwakan ni Tamar ti ulona iti dapu. Rinay-abna ti kawesna sana intakkab ti imana iti rupana ket agsangsangit a nagawid.

²⁰Idi makita ni Absalom a kabsatna, sinaludsodna, “Pinilitnaka kadi ni Amnon? Pangngaasim ta dika unay agladingit. Agulimekka laengen ta kabsatmo iti ama.” Nagyan ngarud ni Tamar nga agladladingit iti balay ni kabsatna.

²¹Kasta unay ti pungtot ni Ari David idi madamagna ti amin a napasamak. Ngem dina kayat a dusaen ni Amnon agsipud ta inauna nga anakna ket ay-ayatenna unay.

²²Kasta unay met ti gura ni Absalom ken ni Amnon gapu iti inaramidna ket manipud idin, saannan a kinasasao ti kabsatna.

²³Napalabas ti dua a tawen. Iti maysa nga aldaw a pappapukisan ni Absalom dagiti karnerona idiay Baal Hazor iti asideg ti Efraim, inawisna dagiti amin a lallaki nga annak ti ari.

²⁴Dimmatag ni Absalom ken ni Ari David. “Natan-ok nga Ari, pappapukisak dagiti karnerok,” kinunana. “Pangngaasim ta umayka agraman dagiti ofisialesmo.”

²⁵“Saan, anakko,” insungbat ni David. “Adu unayen a pakaringgoram no umaykam amin.” Pinilit ni Absalom, ngem kaskasdi a madi ti ari, ket dinawatna nga agawid ti anakna.

²⁶Kinuna ni Absalom, “No dikayo makaumay, dumar-ay koma ngarud ni Amnon.” “Apay a masapul a dumar-ay?” sinaludsod ti ari.

²⁷Ngem sipapasnek ni Absalom a nagawis, isut' gapuna a pinalubosan ti ari ni Amnon ken dagiti dadduma a prinsipe a kumuyog kenkuana. Nangisagana ni Absalom iti padaya a maikari iti maysa nga ari.

²⁸Binilinna dagiti adipenna, “Urayenyo a mabartek ni Amnon. Inton kasta unayen ti bartekna, patayenyon. Awan ti pagbutnganyo; siak ti akimbilin iti daytoy. Papigsaenyo ti nakemyo ket dikay agsarimadeng.”

²⁹Tinungpal dagiti adipen ti bilin ni Absalom, ket pinatayda ni Amnon. Ngarud, dinagdagus dagiti annak ti ari ti naglibas a nakasakay kadagiti muloda.

³⁰Adda pay laeng dagiti annak ti ari iti dalan idi naipadamag ken ni David a pinatay ni Absalom dagiti amin nga annakna.

³¹Timmakder ti ari, rinay-abna ti pagan-anayna ket nagpakleb iti daga. Rinay-ab met dagiti amin nga adipenna nga adda sadiay dagiti pagan-anayda.

³²Ngem kinuna ni Jonadab nga anak ni Samma a kabsat ni David, “Natan-ok nga Ari, saanda a pinapatay dagiti amin nga annakmo. Ni la Amnon ti natay. Naikeddengen ni Absalom ti panangpapatayna ken ni Amnon manipud pay panangrames ni Amnon ken ni Tamar a kabsatna.

³³Ngarud, dimo koma patpatien ti damag a natay dagiti amin nga annakmo. Ni la Amnon ti napapatay.”

³⁴Kabayatanna, nakalibas ni Absalom. Apag-isu met a kumita ti guardia, ket naimatanganna ti maysa a bunggoy ti tattao a sumalsalog iti turod manipud iti dalan nga agpa-Horonaim. Napan iti ari ket imbagana ti nakitana.

³⁵Kinuna ni Jonadab ken ni Ari David, “Adtoyen a sumangpet dagiti annakmo kas imbagak.”

³⁶Apaman a naisaona daytoy, dimteng dagiti annak ti ari ket nagsasangitda. Nagsangit met iti nasaem ni David ken dagiti ofisialesna.

³⁷Nagtalaw ni Absalom ket nagkamang ken ni Talmai nga anak ni Amiud nga ari ti Gesur. Tallo a tawen a nagyan sadiay. Nabayag a dinung-awan ti ari ni Amnon.

³⁹Idi nailiwliwagen ti ari ti ipapatay ni Amnon, simken ti iliwna ken ni Absalom nga anakna.