Read Iloko 2 Samuel 15 Bible Online

2 Samuel 15 - Iloko bible

2 Samuel 15

¹Kalpasan daytoy, nangisagana ni Absalom iti bukodna a lugan a pakigubat ken kabkabalio agraman guardiana a 50 a lallaki.

²Masapa a bumangon ket mapan agtakder iti asideg ti ruangan ti siudad. No lumabas ti maysa a tao nga addaan iti kaso a kayatna a parisut iti ari, ayabanna ket saludsodenna no taga-ano. Kalpasan ti panangibagana iti tribu a nagtaudanna,

³kuna ni Absalom, “Makitak nga adda kalintegam, ngem awan ti pannakabagi ti ari a mangasikaso kenka.”

⁴Ket inayonna, “No maysaak la koma nga ukom! Awatek ti siasinoman a dumatag kaniak nga addaan kaso wenno parikut ket kitaek a maikkan iti hustisia.”

⁵No umasideg kenkuana ti tao tapno kumablaaw, arakupenna sana agkan.

⁶Kastoy ti aramiden ni Absalom iti tunggal Israelita a mapan agdarum iti ari, ket nagun-odna ti panagtalekda kenkuana.

⁷Uppat a tawen ti napalabas. Kinuna ni Absalom ken ni Ari David, “Apo, pangngaasim ta palubosannak a mapan idiay Hebron tapno tungpalek ti sinapataak iti Apo.

⁸Idi addaak idiay Gesur iti Siria, inkarik iti Apo a no makapagsubliak idiay Jerusalem, innakto agdaydayaw kenkuana idiay Hebron.”

⁹“Inka ngarud,” kinuna ti ari. Iti kasta, napan ni Absalom idiay Hebron.

¹⁰Ngem nangibaon kadagiti tattao a mapan iti amin a tribu ti Israel tapno ibagada daytoy, “Apaman a mangngegyo ti uni ti trumpeta ipukkawyo, ‘Nagbalin ni Absalom nga ari idiay Hebron!’”

¹¹Adda 200 a tattao nga inawis ni Absalom ket kimmuyogda kenkuana manipud idiay Jerusalem; pulos nga awan ti ammoda maipapan iti panggepna.

¹²Bayat ti panagidatag ni Absalom kadagiti daton, nangibaon kadagiti mapan idiay Gilo tapno ayabanda ni Ahitofel, maysa kadagiti mamalbalakad ken ni David. Pimmigsa ti yaalsa ket immadu dagiti tattao ni Absalom.

¹³Idiay Jerusalem, simmangpet ti maysa a naibaon ket impadamagna ken ni David ti panangbigbig dagiti tattao ken ni Absalom a kas ari iti Israel.

¹⁴Kinuna ni David kadagiti amin nga ofisialesna nga adda idiay Jerusalem, “Masapul a pumanawtayo a dagus. Agpeggadtayo no ditay itarayan ni Absalom. Agdardarastay amangan no makamakamnatayo; parmekennatayo ken papatayenna amin nga adda iti siudad.”

¹⁵Insungbatda, “Natan-ok nga Ari, nakasaganakami a mangaramid iti aniaman nga ibagam.”

¹⁶Iti kasta, pimmanaw ti ari a kinuyog ti familiana, ken dagiti ofisialesna. Nabati ti 10 kadagiti kamalalana a mangaywan iti palasio.

¹⁷Idi makadanonda iti maudi a balay ti siudad, nagsardeng ti ari ken dagiti amin a kakaduana.

¹⁸Nagtakder dagiti amin nga ofisialesna iti abayna bayat ti ilalabas iti sangoananna dagiti guardia ti palasio. Limmabas met dagiti 600 a soldado a naggapu idiay Gat a simmurot kenkuana.

¹⁹Kinuna ti ari ken ni Ittai a panguloda, “Apay a sumurotka kadakami? Agsublika ket makipagyanka iti baro nga ari. Maysaka a ganggannaet a napagtalaw iti bukodmo a pagilian.

²⁰Nabiitka pay a nagnaed ditoy ket saan a masapul nga agalla-allaka a kas kadakami. Diak pay ammo no sadino ti papanak. Agsublika ket alaem dagiti kailiam. Sapay koma ta naasi ken napudno ti Apo kenka.”

²¹Ngem kinuna ni Ittai, “Natan-ok nga Ari, isapatak kenka iti nagan ti Apo a sibibiag, a sumurotak iti sadinoman a papanam uray pay pakatayak.”

²²“Nasayaat! Magnakayo ngaruden,” kinuna ti ari. Iti kasta, intuloy ni Ittai ti nagna agraman dagiti tattaona ken dagiti annakda.

²³Nagsangit dagiti umili iti napigsa idi pumanaw dagiti pasurot ni David. Binallasiw ti ari ti waig ti Kidron, agraman dagiti tattaona ket nagkukuyogda a nagturong iti let-ang.

²⁴Adda sadiay ni Zadok a padi; kaduana dagiti Levita a mangaw-awit iti nasagradoan a Lakasa ti Tulag. Indissoda ket saanda a binagkat agingga a nakapanaw amin a tattao iti siudad. Adda met sadiay ni Abiatar a padi.

²⁵Pinaayaban ti ari ni Zadok ket kinunana kenkuana, “Isublim ti Lakasa ti Tulag iti siudad. No magun-odko ti parabur ti Apo, addanto aldaw a palubosannak nga agsubli tapno makitak ti Lakasa ti Tulag ken ti pagyananna.

²⁶Ngem no saan, aramidenna latta ti kaykayatna kaniak.”

²⁷Kinuna pay ti ari ken ni Zadok, “Kitaem, agsublikayo a dua ken ni Abiatar a kaduayo ken ni Ahimaas nga anakmo ken ni Jonatan nga anakna. Agannadkayo!

²⁸Agyanak pay laeng iti pagballasiwan ti karayan iti let-ang ket urayek ti ipadamagmo.”

²⁹Innala da Zadok ken Abiatar ti Lakasa ti Tulag, nagsublida idiay Jerusalem ket nagyanda pay laeng sadiay.

³⁰Agsangsangit ni David a simmang-at idiay Bantay Olibo. Sakasaka ket naabungotan ti ulona kas mangipakita iti ladingitna. Siaabungot met dagiti amin a sumursurot kenkuana ket agsangsangitda met a simmang-at.

³¹Idi naibaga ken ni David a timmipon ni Ahitofel kadagiti immalsa nga impanguloan ni Absalom, inkararagna daytoy: “Pangngaasim, O Apo, ta pagbalinem nga awan serserbi ti pammagbaga ni Ahitofel.”

³²Idi makadanon ni David iti tapaw ti turod, iti paset nga adda lugar a pagdaydayawan, sinabat ti matalek a gayyemna, ni Cusai nga Arkita. Naray-ab ti pagan-anay ni Cusai ken tapoktapok ti ulona.

³³Kinuna ni David kenkuana, “Awan maitulongmo no sumurotka kaniak.

³⁴Ngem matulongannak no agsublika iti siudad ket ibagam ken ni Absalom nga agserbika a sipupudno kenkuana a kas iti panagserbim kaniak nga amana. Aramidem amin a kabaelam a mangsuppiat iti aniaman a balakad ni Ahitofel.

³⁵Addanto sadiay da Zadok ken Abiatar a papadi. Ibagamto kadakuada ti amin a mangngegmo iti palasio.

³⁶Kaduada dagiti annakda, da Jonatan ken Ahimaas, ket isuda ti ibaonmonto a mangyeg kaniak iti damag.”

³⁷Napan ngarud ni Cusai a gayyem ni David idiay Jerusalem. Apag-isu a sumangpet idi ni Absalom iti siudad.