Read Iloko 2 Samuel 16 Bible Online

2 Samuel 16 - Iloko bible

2 Samuel 16

¹Idi makaadayo bassit ni David iti tapaw ti turod, pagammoan ta sinabat ni Siba nga adipen ni Mefiboset. Adda dua nga asnona a nagkarga iti dua gasut a tinapay, sangagasut a karaay a pasas, sangagasut a kapurpuros a frutas ken maysa a supot a lalat a napno iti arak.

²Sinaludsod ti ari kenkuana, “Ania ti pangipaayam kadagitoy, Siba?” Insungbat ni Siba, “Agpaay dagiti asno a pagsakayan ti familiam, Natan-ok nga Ari. Agserbi kadagiti soldado dagiti tinapay ken dagiti frutas, ket inumenda met ti arak no mabannogda iti let-ang.”

³“Sadino ti ayan ni Mefiboset, ti apoko ni Saul nga apom?” sinaludsod kenkuana ti ari. “Nagbati idiay Jerusalem ta kapkapnekanna nga isubli dagiti Israelita kenkuana ti pagarian daydi apongna a Saul,” insungbat ni Siba.

⁴Kinuna ti ari ken ni Siba, “Kukuamon dagiti amin a sanikua ni Mefiboset.” “Siak ti adipenmo,” kinuna ni Siba. “Sapay koma ta maikariak iti panagtalekmo.”

⁵Idi dumteng ni Ari David idiay Bahurim, maysa kadagiti kakabagian ni Saul, ni Simei nga anak ni Gera, ti simmabat a mangilunlunod kenkuana bayat ti isusungadna.

⁶Binatobatona ni David ken dagiti ofisialesna nupay nalikmut ni David kadagiti tattao ken guardia-na.

⁷Inlunod ni Simei a kunana, “Pumanawka! Pumanawka! Mammapatay! Kriminal!

⁸Inagawmo ti pagarian ni Saul, ket ita, dusdusaennaka ti Apo iti panangpapataymo iti adu a kameng ti familia ni Saul. Inteden ti Apo ti pagarian ken ni Absalom nga anakmo. Iti kamaudianna, nagbayadka met la ti utangmo, ta mammapatayka!”

⁹Kinuna ni Abisai nga anak ni Zeruyas, “Natan-ok nga Ari, apay nga ipalubosmo nga ilunodnaka daytoy natay nga aso? Palubosannak man ta innak putolan!”

¹⁰Ngem kinuna ni David kada Abisai ken Joab a kabsatna, “Saankayo a makibiang, dakayo nga annak ni Zeruyas. Ilunlunodnak ta dayta ti bilin ti Apo. Awan ti kalintegan ti siasinoman nga agsaludsod no apay a kasta ti aramidenna.”

¹¹Kinuna ni David ken ni Abisai ken kadagiti ofisialesna, “Kayatnak a patayen ti anakko, ket dikay ngarud masdaaw iti ar-aramiden daytoy a Benjaminita. Imbilin ti Apo nga ilunodnak, isu a baybay-anyo ket palubosanyo nga aramidenna.

¹²Nalabit a makita ti Apo ti panagtutuokko ket bendisionannak a supapak dagitoy a pannakailunodko.”

¹³Intuloy ni David ken dagiti tattaona ti nagna idinto a napan ni Simei iti bakras ti turod. Agilunlunod, agipurpuruak iti bato ken tapok bayat ti pannagnana.

¹⁴Nabannog ti ari ken dagiti kakaduana idi makadanonda idiay Jordan ket naginanada sadiay.

¹⁵Simrek ni Absalom ken dagiti amin nga Israelita idiay Jerusalem; kaduada ni Ahitofel.

¹⁶Idi masabat ni Cusai a matalek a gayyem ni David, impukkawna, “Agbiag ni Absalom! Agbiag ti Ari!”

¹⁷Sinaludsod ni Absalom, “Kastoy kadi ti panangipakitam iti kinapudnom ken ni David a gayyemmo? Apay a dika simmurot kenkuana?”

¹⁸Simmungbat ni Cusai, “Kasano a sumurotak kenkuana? Kayatko ti agpaay iti pinili ti Apo, kadagitoy a tattao ken kadagiti amin nga Israelita. Sumurotak kenka.

¹⁹Saan kadi a rumbeng laeng a pagserbiak ti anak ti apok? Kas iti panagserbik iti amam, ita, agserbiak met kenka.”

²⁰Kinuna ni Absalom ken ni Ahitofel, “Ita ta addatayo ditoy, ania ti maibalakadmo nga aramidentayo?”

²¹Kinuna ni Ahitofel, “Kaiddaem dagiti kamalala ni amam nga imbatina a mangaywan iti palasio. Inton madamag dagiti amin nga Israelita a nagbalinka a kabusor ni amam, ad-addanto a tumured dagiti pasurotmo.”

²²Nangbangonda ngarud iti tolda a para ken ni Absalom iti tuktok ti palasio. Ket kinaidda ni Absalom dagiti kamalala ni amana tapno makita dagiti amin nga Israelita.

²³Kadagidi a panawen, patien dagiti tattao ti aniaman a balakad ni Ahitofel. Ibilangda ti saona a kas sao ti Dios. Tungpalen met da David ken Absalom ti balakadna.