Read Iloko 2 Samuel 18 Bible Online

2 Samuel 18 - Iloko bible

2 Samuel 18

¹Pinagtitipon ni Ari David dagiti amin a tattaona sana binunggo-bunggoy ida iti sagsangaribu ken sagsangagasut. Nangdutok iti maysa nga ofisial iti tunggal bunggoy.

²Kalpasanna, imbaonna ida iti tallo a grupo. Saggaysa ti bunggoy nga indauloan ni Joab, ni Abisai a kabsatna ken ni Ittai a taga-Gat. Imbaga ti ari kadagiti tattaona, “Kumuyogak kadakayo.”

³“Agbatika laengen iti siudad,” kinunada. “No kapilitan nga agsanud ken agtataraykami wenno uray matay ti kagudua kadakami—awan ti pategna iti kabusor. Ngem 10,000 a tattao ti kaibatogam. Nasaysayaat no mabatika ta patulodannakam iti tulong no kasapulan.”

⁴“Aramidek ti aniaman nga ipagarupyo a nasayaat,” insungbat ti ari. Kalpasanna, nagtakder iti abay ti ruangan bayat ti ilalabas dagiti tattaona a nabunggo-bunggoy iti sagsangaribu ken sagsangagasut.

⁵Imbilinna kada Joab, Abisai ken Ittai: “Ipagpapagapuyo kaniak a diyo dangran ni agtutubo nga Absalom.” Nangngeg dagiti amin a soldado ti bilin ni David kadagiti ofisialesna.

⁶Nagturong ti armada ni David iti tay-ak ket nakirangetda kadagiti Israelita iti kabakiran ni Efraim.

⁷Naparmek dagiti Israelita. Nakaro ti sinagabada iti pannakaparmekda: napapatay ti 20,000 a tattao iti dayta nga aldaw.

⁸Nagsaknap ti gubat iti away ket ad-adu ti natay iti kabakiran ngem iti paggugubatan.

⁹Pagammoan, nasabat ni Absalom ti sumagmamano a soldado ni David. Sisasakay ni Absalom iti mulo ket idi lumasat ti animal iti sirok ti maysa a dakkel a lugo, naisalat ti ulo ni Absalom kadagiti sanga ti kayo. Naglaylayon a nagtaray ti mulo ngem nabati a sibibitin ni Absalom.

¹⁰Maysa a tao ni David ti nakakita iti napasamak ket impadamagna ken ni Joab, “Apo, nakitak ni Absalom a sibibitin iti maysa a lugo.”

¹¹Insungbat ni Joab, “Nakitam ni Absalom? Apay a dimo pinatay a dagus? Gunggonaanka koma iti sangapulo a bagi ti pirak ken maysa a sinturon.”

¹²Ngem kinuna ti lalaki, “Uray no ikkannak iti sangaribu a bagi ti pirak, diak la ketdi dangran ti anak ti ari. Nangngegmi amin a binilinnakayo ti ari—dakayo kada Abisai ken Ittai: ‘Diyo dangran ni agtutubo nga Absalom; ipagpagapuyo kaniak.’

¹³Ngem no sinukirko ti bilin ti ari ket pinatayko ni Absalom, madamagto ti ari—ta awan duadua a madamagna ti amin—ket dinakto met la salakniban.”

¹⁴“Diak dadaelenen ti tiempok kenka,” kinuna ni Joab. Nangala iti tallo a gayang ket induyokna iti barukong ni Absalom nupay sibibiag pay laeng a sibibitin iti kayo a lugo.

¹⁵Kalpasanna, sangapulo met a soldado ni Joab ti nanglawlaw ken ni Absalom ket inuloyanda.

¹⁶Imbilin ni Joab ti pannakapuyot ti trumpeta tapno agsardeng ti gubat ket nagsubli dagiti soldadona iti panangsunsonda kadagiti Israelita.

¹⁷Innalada ti bangkay ni Absalom. Impisokda iti nauneg nga abut iti kabakiran sada ginaburan iti dadakkel a bato. Nagtataray met dagiti Israelita a nagkamang kadagiti balbalayda.

¹⁸Idi sibibiag pay ni Absalom, nangipatakder iti baton-lagip iti Tanap ti Ari gapu ta awan ti lalaki nga anakna a mangtaginayon iti naganna. Iti kasta, impasurotna iti naganna ket agingga ita, maaw-awagan iti Baton-lagip ni Absalom.

¹⁹Kalpasanna, kinuna ni Ahimaas nga anak ni Zadok, “Palubosannak ta innak a dagus ipadamag iti ari ti panangispal kenkuana ti Apo kadagiti kabusorna.”

²⁰“Saanka a mapan,” kinuna ni Joab. “Awan ti naimbag a damag nga ipakaammom ita nga aldaw. Mabalinmo ti mapan iti sabali nga aldaw ngem saan nga ita agsipud ta natay ti anak ti ari.”

²¹Kinuna ni Joab iti tagabuna a taga-Etiopia, “Inka ibaga iti ari ti nakitam ita nga aldaw.” Nagkurno ti tagabu ket kalpasanna, nagtaray a napan.

²²Impapilit ni Ahimaas, “Uray ania ti mapasamak, pangngaasim ta idanonko met ti damag.” “Apay a kayatmo ti mapan, anakko?” kinuna ni Joab. “Awanto met la ti magunggonam.”

²³“Uray ania ti mapasamak,” kinuna manen ni Ahimaas, “kayatko ti mapan.” “Sige, inka ngaruden,” kinuna ni Joab. Nagtaray ni Ahimaas a napan iti kalsada, linasatna ti Tanap ti Jordan ket iti saan a mabayag, linabsanna ti taga-Etiopia.

²⁴Agtugtugaw idi ni David iti nagbaetan ti ruangan a sumrek iti siudad ken ti ruangan a rummuar ti siudad. Immuli ti agwanwanawan iti tuktok ti bakud ket nagtakder iti atep ti pagserkan. Timman-aw ket nakitana ti lalaki nga agtartaray a maymaysana.

²⁵Nagpukkaw ket imbagana iti ari ti nakitana. “No is-isuna,” kinuna ti ari, “adda naimbag a damag nga umayna ipakaammo.” Umasideg nga umasideg ti agtartaray a lalaki.

²⁶Bayat ti yaasideg ti agtartaray, nakita ti agwanwanawan nga adda sabali a lalaki nga agtartaray nga is-isuna ket impukkawna iti guardia ti ruangan, “Kitaem! Adda man umay a sabalin!” Insungbat ti ari, “Mangyeg met daytoy iti naimbag a damag.”

²⁷Kinuna ti agwanwanawan, “Awan duadua a ni Ahimaas ti umuna a lalaki; kasta ti panagtarayna.” “Naimbag dayta a tao,” kinuna ti ari, “ket mangyeg iti naimbag a damag.”

²⁸Kinablaawan ni Ahimaas ti ari, nagrukob iti sangoananna sana kinuna, “Madaydayaw ti Apo a Diosmo a nangparmek kadagiti tattao nga immalsa a maibusor kenka.”

²⁹“Kumusta ni agtutubo nga Absalom? Awan met la nakaan-anoanna?” sinaludsod ti ari. “Apo, itay imbaonnak ni Joab, adda nadlawko a dakkel a riribuk ngem diak ammo no ania daydiay,” insungbat ni Ahimaas.

³⁰Imbaga ti ari, “Aglisika pay laeng.” Ket napan nagtakder ni Ahimaas iti disso a naibaga kenkuana.

³¹Dimteng ti taga-Etiopia ket kinunana iti ari, “Adda naimbag a damag nga ipakaammok kenka, Natan-ok nga Ari. Ita nga aldaw, pinagballiginaka ti Apo ket pinarmekna dagiti amin nga immalsa a maibusor kenka!”

³²“Kumusta ni agtutubo nga Absalom? Awan met la nakaan-anoanna?” sinaludsod ti ari. Insungbat ti taga-Etiopia, “Sapay koma ta lak-amen dagiti kabusormo, apo, ken amin nga immalsa a maibusor kenka ti linak-am daytoy nga agtutubo.”

³³Kasta unay ti ladingit ti ari. Immuli iti kuarto iti ngatoen ti pagserkan ket nagsangit sadiay. Bayat ti pannagnana, insangitna, “Ay, anakko! Absalom nga anakko, Absalom nga anakko! Siak la koma ti natayen a saan ketdi a sika. Ay, anakko, Absalom! Ay, anakko!”