Read Iloko 2 Samuel 2 Bible Online

2 Samuel 2 - Iloko bible

2 Samuel 2

¹Kalpasan ti ipapatay ni Saul, nakiuman ni David ken ni Yahweh. “Innak kadi iti maysa kadagiti siudad ti Juda?” sinaludsodna. “Wen, inka,” insungbat ni Yahweh. “Sadino ti papanak?” sinaludsod manen ni David. “Idiay Hebron,” insungbatna.

²Napan ngarud ni David idiay Hebron. Inkuyogna dagiti dua nga assawana, ni Ahinoam a taga-Jezreel ken ni Abigail a balo ni Nabal a taga-Carmel.

³Inkuyogna met dagiti tattaona, agraman dagiti familiada ket nagnaedda kadagiti ili iti asideg ti Hebron.

⁴Kalpasanna, dimteng dagiti lallaki ti Juda ket inkonsagrarda ni David a kas ari iti Juda. Idi nadamag ni David a dagiti agnaed iti Jabes-Galaad ti nangitabon ken ni Saul,

⁵nangibaon sadiay iti sumagmamano a tattao ket pinaibagana: “Bendisionannakayo koma ti Apo iti impakitayo a kinapudnoyo iti ariyo babaen iti panangitabonyo kenkuana.

⁶Sapay koma ta naimbag kadakayo ti Apo ket saannakayo a baybay-an. Iti biangko, supapakankayto met iti daytoy nga inaramidyo.

⁷Ngarud, papigsaenyo ti pakinakemyo, ket tumuredkayo. Natayen ni Saul nga ariyo ket inkonsagrardak dagiti taga-Juda nga arida.”

⁸Naglibas ni Abner nga anak ni Ner a kaduana ni Isboset nga anak ni Saul ket napanda idiay Mahanaim iti ballasiw ti Jordan. Ni Abner ti pangulo ti armada ni Saul.

⁹Insaad ni Abner ni Isboset nga ari iti daga a masakupan ti Galaad, Aser, Jezreel, Efraim, Benjamin ken iti entero nga Israel.

¹⁰Uppat a pulo ti tawen ni Isboset idi mangrugi nga agari iti Israel ket nagturay iti dua a tawen. Nupay kasta, napudno ti tribu ti Juda ken ni David.

¹¹Pito ket gudua a tawen nga inturayanna ti Juda idiay Hebron.

¹²Nagrubbuat ni Abner ken dagiti ofisiales ni Isboset idiay Mahanaim ket napanda iti siudad ti Gabaon.

¹³Nagsasarakda sadiay kada Joab nga anak ni Zeruyas. Nakikuyog dagiti dadduma nga ofisiales ni David. Nagtugaw dagiti dua a bunggoy iti agsumbangir ti pagurnongan ti danum idiay Gabaon.

¹⁴Kinuna ni Abner ken ni Joab, “Pagsasalipentayo dagiti agtutubo ket buyaentayo ti panagrangetda—maysa kontra maysa.” “Ala wen, no dayta ti kayatmo,” insungbat ni Joab.

¹⁵Ngarud, sangapulo ket dua nga agtutubo a mangibagi iti armada ni Isboset ken ti tribu ti Benjamin ti nakiranget kadagiti tattao ni David.

¹⁶Naginniggem iti ulo ti tunggal pareha sada nagdinnuyok iti bakrang ket padapada a napasag a natay dagiti duapulo ket uppat. Daytoy ti gapuna a napanaganan dayta a disso idiay Gibeon iti Helcat-Assurim.

¹⁷Simmaruno ti maysa a napinget a gubat. Ket nagballigi dagiti tattao ni David a nangparmek kadagiti Israelita nga impanguloan ni Abner.

¹⁸Adda sadiay da Joab, Abisai ken Asael nga annak ni Zeruyas. Kasla atap nga ugsa no agtaray ni Asael.

¹⁹Kinamatna ni Abner ket pulos a dina sininsinaan.

²⁰Timmalliaw ni Abner ket kinunana, “Sika kadi dayta, Asael?” “Wen, siak,” insungbat ni Asael.

²¹“Isardengmo ti panangkamatmo kaniak,” kinuna ni Abner. “Makirangetka iti maysa kadagiti mannakigubat ket alaem ti adda kenkuana.” Ngem saan nga insardeng ni Asael ti panangkamatna kenkuana.

²²Kinuna manen ni Abner ken ni Asael, “Isardengmo ti panangkamatmo kaniak. Dinak piliten a mangpatay kenka. No mapatayka, anianto ti rupak nga agparang ken ni Joab a kabsatmo?”

²³Ngem intuloy ni Asael ti nangkamat kenkuana, isut' gapuna nga impatallikud ni Abner nga induyok ti gayangna. Napuntaan ti tian ni Asael, ket simmalput ti gayang iti bukotna. Natuang ni Asael ket dagus a natay. Nagsardeng dagiti amin a nakadanon iti disso a nakapasagan ni Asael.

²⁴Nupay kasta, intuloy da Joab ken Abisai ti panangkamatda ken ni Abner. Limneken ti init idi makadanon dagiti agkabsat iti turod ti Amma, iti daya ti Gia iti dalan nga agturong iti let-ang ti Gabaon.

²⁵Naguummong manen dagiti tattao iti tribu ti Benjamin. Nagmaymaysada a bunggoy a tumulong ken ni Abner ket nagsaganada a makigubat iti tapaw ti turod ti Amma.

²⁶Impukkaw ni Abner ken ni Joab, “Isardengtan daytoy a panagpapatay. Awan duadua nga agbanag daytoy iti nakaro a panagsagaba. Agkakailiantayo. Bilinem dagiti tattao nga isardengda ti panangkamatda kadakami a kakabsatda.”

²⁷“Iti nagan ti sibibiag a Dios,” insungbat ni Joab, “no saanka a nagsao, saan koma nga insardeng dagiti tattaok ti panangsunsonda kadakay agingga iti bigat.”

²⁸Pinaguni ni Joab ti trumpeta a kas pagilasinan dagiti tattaona nga isardengda ti panangsunsonda kadagiti Israelita. Ket nagsardeng ti panagrarangetda.

²⁹Nagpatpatnag a nagna da Abner ken dagiti tattaona iti Tanap ti Jordan. Binallasiwda ti Karayan Jordan. Nagnada manen iti sumuno a bigat agingga a nakadanonda idiay Mahanaim.

³⁰Inummong ni Joab dagiti tattaona kalpasan ti panagsunsonda. Natakuatanna nga awan ti 19 kadagiti tattao ni David, malaksid ni Asael.

³¹Tallo gasut ket innem a pulo kadagiti soldado ni Abner a nagtaud iti tribu ti Benjamin ti pinatay dagiti tattao ni David.

³²Innalada ti bangkay ni Asael ket intabonda iti nakaitaneman ti amana idiay Betlehem. Kalpasanna, nagpatpatnagda a nagdaliasat ket parbangonen idi dimtengda idiay Hebron.