Read Iloko 2 Samuel 20 Bible Online

2 Samuel 20 - Iloko bible

2 Samuel 20

¹Nairana nga adda idiay Gilgal ti maysa a tao nga awan dayawna. Isu ni Siba a nagtaud iti tribu ti Benjamin ken anak ni Bikri. Pinagunina ti trumpeta ket impukkawna, “Agawidtayon, padak nga Israelita! Awan bingaytayo ken ni David. Awan tawidtayo iti anak ni Jesse!”

²Ngarud, pinanawan dagiti Israelita ni David. Simmurotda ken ni Siba. Ngem nagtalinaed a napudno dagiti taga-Juda ken ni David ket simmurotda kenkuana idiay Jerusalem.

³Idi sumangpet ni David iti palasiona idiay Jerusalem, innalana dagiti sangapulo a sabali nga assawana nga imbatina a mangaywan iti palasio. Pinagnaedna ida iti sabali a balay ket pinaguardiaanna ida. Saannan a kinaidda ida ngem intedna ti amin a masapulda. Nagtalinaedda sadiay a kasla balo iti unos ti panagbiagda.

⁴Kinuna ti ari ken ni Amasa, “Ummongem dagiti tattao ti Juda ket umaykayto amin inton maminsan nga aldaw.”

⁵Napan inayaban ni Amasa ida ngem saan a nagsubli iti aldaw nga intuding ti ari a panagsublina.

⁶Iti kasta, kinuna ti ari ken ni Abisai, “Dakdakkelto ti parikut a yeg ni Siba kadatayo ngem ni Absalom. Alaem dagiti tattaok ket sapulenyo amangan no aglemmeng iti maysa a nasarikedkedan a siudad ket malibasannatayo.”

⁷Ngarud, pimmanaw dagiti tattao ni Joab, dagiti guardia ti ari ken dagiti dadduma a soldado idiay Jerusalem tapno sapulenda ni Siba. Kaduada ni Abisai.

⁸Idi dumtengda iti dakkel a bato idiay Gabaon, sinabat ni Amasa ida. Nakaarruat ni Joab iti kawes a pakigubat a nabariksan ken nakaigalutan ti sikakaluban a kampilan. Bayat ti yaasidegna, natnag ti igam.

⁹Kinuna ni Joab ken ni Amasa, “Komustaka, gayyemko?” Iti makannawan nga ima ni Joab, iniggamanna ti barbas ni Amasa tapno agkanna.

¹⁰Saan a nadlaw ni Amasa ti kampilan nga ig-iggaman ni Joab ket induyok ni Joab ti igam iti tian ni Amasa. Rimmuar dagiti bagis ni Amasa ket natay a dagus; saanen a pinidua a dinuyok ni Joab. Intuloy da Joab ken Abisai a kabsatna ti nangsarak ken ni Siba.

¹¹Nagtakder ti maysa kadagiti soldado ni Joab iti abay ti bangkay ni Amasa ket kinunana, “Siasinoman a kadua ni Joab ken ni David, surotenna ni Joab.”

¹²Naiwalang iti tengnga ti dalan ti bangkay ni Amasa a nadigos iti dara. Idi makita ti agtutubo a kadua ni Joab nga agsardeng ti tunggal maysa a kumita iti bangkay, ginuyodna ti bangkay ket impanna iti talon sana kinumotan iti ules.

¹³Apaman a naikkat ti bangkay iti dalan, sinurot dagiti amin a tattao ni Joab tapno kamatenda ni Siba.

¹⁴Limmasat ni Siba iti amin a daga a masakupan ti amin a tribu ti Israel ket dimteng iti siudad ti Abel Bet Maaca. Naguummong dagiti amin a kabagian ni Bikri ket simmurotda kenkuana a simrek iti siudad.

¹⁵Nadamag dagiti tattao ni Joab nga adda ni Siba iti siudad. Napanda ngarud linakub ti Abel Bet Maaca. Linikmutda ti akinruar a bakud iti nabunton a daga. Tapno marba ti bakud, rinugianda met ti nagkali iti puonna.

¹⁶Adda masirib a babai iti siudad a nagpukkaw manipud iti bakud. “Dumngegkayo! Dumngegkayo!” kinunana. “Ibagayo ken ni Joab nga umay ditoy. Kayatko a kasarita.”

¹⁷Napan ni Joab ket sinaludsod ti babai, “Sika kadi ni Joab?” “Wen, siak,” kinunana. “Ania ti masapulmo?” Kinunana, “Dumngegka kaniak, apo.” “Dumdumngegak,” kinuna ni Joab.

¹⁸Kinuna ti babai, “Idi un-unana nga aldaw, masansan a kunada, ‘Inka ammoen idiay Abel ti sungbat ti parikutmo.’ Kasta ti inar-aramidda.

¹⁹Naindaklan ti siudadmi; maysa kadagiti natalna ken napudno iti Israel. Apay a kayatmo a dadaelen? Kayatmo kadi a dadaelen ti kukua ti Apo?”

²⁰“Saan,” insungbat ni Joab. “Diak dadaelen wenno pukawen ti siudadyo.

²¹Saan a kasta ti panggepmi. Adda birbirokenmi a tao nga agnagan Siba nga anak ni Bikri ken nagtaud iti katurturodan ti Efraim. Immalsa a maibusor ken ni Ari David. Isukom kadakami dayta a tao ket panawanmi ti siudad.” “Ipurruakmi kenka ti ulona,” kinuna ti babai.

²²Kalpasanna, napan kadagiti tattao ti siudad ket gapu ta masirib, immanamongda iti panggepna. Pinutolanda ni Siba sada impurruak ti ulo ken ni Joab nga adda iti ruar ti bakud. Pinuyot ni Joab ti trumpeta a kas pagilasinan dagiti tattaona a pumanaw iti siudad. Ket nagawidda. Nagsubli ni Joab idiay Jerusalem tapno dumatag iti ari.

²³Ni Joab ti pangulo ti armada ti Israel. Ni Benaias nga anak ni Jehoyada ti pangulo dagiti guardia ni David.

²⁴Ni Adoniram ti mangimaton iti inkapilitan a panagtrabaho. Ni Jehosafat nga anak ni Ahilut ti agay-aywan kadagiti papeles ti pagilian.

²⁵Ni Siva ti sekretario ti ari. Da Zadok ken Abiatar ti papadi.

²⁶Ket ni Ira a taga-ili ti Jair ti maysa kadagiti papadi ni David.