Read Iloko 2 Samuel 21 Bible Online

2 Samuel 21 - Iloko bible

2 Samuel 21

¹Bayat ti panagturay ni David, adda nakaro a bisin a nagpaut iti tallo a tawen. Daytoy ti gapuna a nakiuman ni David ken ni Yahweh ket kinuna, “Nakabasol ni Saul ken ti familiana iti pammapatay. Adu ti pinapatayda a tattao ti Gabaon.” (

²Saan nga Israelita dagiti tattao ti Gabaon. Bassitda a puli dagiti Amorreo nga insapata a salakniban dagiti Israelita. Ngem inkagumaan ni Saul a pukawen ida gapu iti bumarbara a panagayatna iti Israel ken iti Juda.)

³Ngarud, pinaayaban ni David dagiti tattao ti Gabaon ket kinunana kadakuada, “Ania ti maipaayko kadakayo? Kayatko a supapakan iti naimbag daydi dakes a naaramid kadakayo tapno ikararagandakami ket mabendisionan dagiti tattao ti Apo.”

⁴Insungbatda, “Saan a marisut iti pirak wenno balitok ti ririmi ken ni Saul ken ti familiana. Dimi met marisut babaen iti panangpataymi iti maysa nga Israelita.” “Ania ngarud ti kayatyo nga ipaayko kadakayo?” kinuna ni David.

⁵Insungbatda, “Panggep idi ni Saul nga ikisapnakami a mamimpinsan iti Israel.

⁶Ngarud, yawatmo kadakami ti pito a lallaki a kaputotan ni Saul ket bitayenmi ida iti imatang ti Apo idiay Gabaa nga ili ni Saul, ti ari a pinili ti Apo.” Pinatgan ni David ti dawatda.

⁷Ngem gapu iti nasagradoan a kari a nagsinnapataanda ken ni Jonatan, inispal ni David ti anak ni Jonatan, ni Mefiboset nga apoko ni Saul.

⁸Nupay kasta, innalana da Armoni ken Mefiboset nga annak ni Saul ken ni Rispa nga anak ni Aia. Innalana met dagiti lima nga annak ni Merab nga anak ni Saul. Ni Adriel nga anak ni Barzillai a taga-Mola ti ama dagiti lima.

⁹Inyawat ni David ida kadagiti tattao ti Gabaon a nangbitay kadakuada iti bantay iti imatang ni Yahweh. Naggigiddan a natay dagiti pito. Napasamak daytoy idi mangrugi ti panagapit iti sebada.

¹⁰Saan a pimmanaw ni Rispa nga anak ni Aia ken sabali nga asawa ni Saul iti lugar nga ayan dagiti bangkay. Nangala iti nakersang a lupot ket inaramidna a paglinongan iti rabaw ti kabatoan. Nagyan sadiay manipud panangrugi ti panagani agingga a dimteng ti tudtudo. Binantayanna dagiti bangkay tapno saan a tuktoken dagiti tumatayab iti aldaw wenno rangrangkayen dagiti atap nga animal iti rabii.

¹¹Idi madamag ni David ti inaramid ni Rispa,

¹²napan idiay Galaad ket innalana kadagiti tattao ti Jabes dagiti tultulang da Saul ken Jonatan nga anakna. (Tinakawda idi dagiti tultulang iti pagmimitingan ti Bet-san a nangibitinan dagiti Filisteo kadagiti bangkay iti daydi aldaw a panangparmekda ken ni Saul idiay Bantay Gilboa.)

¹³Innala ni David dagiti tultulang da Saul ken Jonatan agraman dagiti tultulang dagiti pito a lallaki a nabitay.

¹⁴Inkalida dagiti tultulang da Saul ken Jonatan iti tanem ni Kis nga ama ni Saul idiay Sela iti sakup ti tribu ti Benjamin. Natungpal amin nga imbilin ti ari ket manipud idin, impangag ni Yahweh dagiti kararagda a maipaay iti pagilian.

¹⁵Rimsua manen ti panaggubat dagiti Filisteo ken dagiti Israelita. Impanguloan ni David dagiti tattaona iti pannakirangetda kadagiti Filisteo. Bayat ti pannakirangetda, nabannog ni David.

¹⁶Impagarup ti maysa a higante, ni Isbibenob, a kabaelanna a patayen ni David. Nakaiggem ni Isbibenob iti bronse a gayang nga agdagsen iti pito ket gudua a libra ket sibabarikes iti baro a kampilan.

¹⁷Ngem napan tinulongan ni Abisai nga anak ni Zeruyas ni David. Dinarupna ti Filisteo ket pinapatayna. Manipud idin, saanen a simmurot ni David iti paggugubatan, ta pinagkari dagiti tattaona a saanen a kumuyog kadakuada. “Sika ti kakaisuna a namnama ti Israel ket dimi kayat a mapukawdaka,” kinunada.

¹⁸Kalpasan daytoy, naggubat manen dagiti Filisteo ken dagiti Israelita. Iti daytoy a gubat a napasamak idiay Gob, pinatay ni Sebecai a taga-Husa ti maysa a higante nga agnagan iti Saf.

¹⁹Iti manen sabali a pannakigubatda kadagiti Filisteo idiay Gob, pinatay ni Elhanan nga anak ni Jair a taga-Betlehem ni Goliat a taga-Gat. Adda gayang ni Goliat a kasla kapuskol ti poste ti pagablan ti putanna.

²⁰Iti sabali manen a gubat idiay Gat, adda higante a pagay-ayatna ti makigubgubat. Innem ti ramay ti tunggal imana ken innem met ti ramay ti tunggal sakana.

²¹Kinaritna dagiti Israelita ket pinatay ni Jonatan nga anak ni Samma a kabsat ni David.

²²Kaputotan dagiti higante ti Gat dagitoy uppat. Pinatay ida ni David ken dagiti tattaona.