Read Iloko 2 Samuel 23 Bible Online

2 Samuel 23 - Iloko bible

2 Samuel 23

¹Nagbalin a naindaklan ni David nga anak ni Jesse. Isu ti pinili ti Dios ni Jacob nga agbalin nga ari. Nalaing nga agputar kadagiti napipintas a kanta iti Israel. Dagitoy dagiti maudi a balikasna:

²Agsao kaniak ti espiritu ni Yahweh; adda kadagiti bibigko ti saona.

³Nagsao ti Dios ti Israel, kinuna kaniak ti Bato ti Israel: “Ti ari a nalinteg ti panagturayna, ti mangituray nga agbuteng iti Dios

⁴mayarig iti init nga agbannawag, no awan ulep, ti init a mamagrusing kadagiti ruot kalpasan ti tudo.”

⁵Kastoy ti panangbendision ti Dios kadagiti kaputotak, ta nakitulag kaniak iti agnanayon, maysa a tulag a di masalungasing, maysa a kari a pulos a di mabaliwan. Daytoy la a banag ti tarigagayak; daytoy ti balligik ket awan duadua nga ibanag ti Dios.

⁶Ngem mayarig dagiti awanan dios kadagiti maibelleng a sisiit; awan makasagid kadakuada nga ima-ima.

⁷Masapul nga agaramatka iti landok wenno pika; mamimpinsanto a mapuoranda.

⁸Adtoy dagiti nagnagan dagiti agdindinamag a soldado ni David: umuna ni Joseb Bassebet a taga-Takemon ken pangulo ti “Dagiti Tallo.” Gayang ti inaramatna iti pannakigubatna kadagiti 800 a lallaki ket pinatayna amin ida iti naminsan laeng a ranget.

⁹Ni Eleazar nga anak ni Dodo iti kapuonan ti Aho ti maikadua kadagiti agdindinamag a tallo. Iti naminsan, kinaritda ken ni David dagiti Filisteo a naguummong a makigubat. Nagsanud dagiti Israelita

¹⁰ngem saan a simmurot ni Eleazar; maymaysa a nakiranget agingga a simkil ti imana ket dinan maibbatan ti kampilanna. Iti dayta nga aldaw, naindaklan ti panagballigi ni Yahweh. Kalpasan ti gubat, nagsubli dagiti Israelita iti yan ni Eleazar ket inikkatda dagiti kabal kadagiti natay a soldado.

¹¹Ni Samma nga anak ni Age a taga-Harar ti maikatlo kadagiti agdindinamag a tallo. Idiay Lehi ti naguummongan idi dagiti Filisteo a makigubat. Adda talon a namulaan iti patani iti dayta a lugar. Intarayan dagiti Israelita dagiti Filisteo

¹²ngem saan a nagsanud ni Samma. Nagtakder iti tengnga ti talon, sinalaknibanna ket pinatayna dagiti Filisteo. Naindaklan ti panagballigi ni Yahweh iti dayta nga aldaw.

¹³Idi umasideg ti panagani, simmalog ti tallo kadagiti “Tallopulo a Mamaingel” a napan iti Rukib ti Adullam nga yan idi ni David. Nagkampo idi ti maysa a bunggoy dagiti Filisteo iti Tanap ti Refaim.

¹⁴Iti dayta a tiempo, adda ni David iti maysa a nasarikedkedan a turod ket maysa a bunggoy dagiti Filisteo ti nangsakup iti Betlehem.

¹⁵Mailiw unay ni David ket kinunana, “Adda koma la mapan mangala iti danum nga inumek iti bubon iti abay ti ruangan ti Betlehem!”

¹⁶Sinarakusok dagiti tallo nga agdindinamag a soldado ti kampo dagiti Filisteo, simmakdoda iti bubon ket impanda ti danum ken ni David. Ngem saan nga ininum ni David. Imbuyatna ketdi a kas daton iti Apo

¹⁷sana kinuna, “O Apo, saanko a mabalin nga inumen daytoy! Kasko la inumen ti dara dagitoy a lallaki a nangipusta iti biagda!” Isut' gapuna a dina kayat nga inumen ti danum. Dagitoy dagiti aramid dagiti tallo nga agdindinamag a soldado a mangipakita iti kinaturedda.

¹⁸Ni Abisai a kabsat ni Joab (ni Zeruyas ti inada) ti pangulo dagiti “Tallopulo a Mamaingel.” Inaramatna ti gayangna a nakiranget iti 300 a lallaki ket pinatayna ida; nagdindinamag met a kas kadagiti “Tallopulo.”

¹⁹Isu ti kamainglan kadagiti “Tallopulo” ket nagbalin a panguloda ngem saan unay a nalatak a kas kadagiti “Tallo.”

²⁰Maysa met nga agdindinamag a soldado ni Benaias nga anak ni Jehoyada a taga-Kabzeel. Adu ti inaramidna a mangipakita iti kinaturedna agraman ti panangpatayna iti dua a mamaingel a soldado a Moabita. Iti naminsan a nagtudo iti niebe, napan iti maysa a rukib ket pinatayna ti maysa a leon.

²¹Pinatayna ti maysa a nabaked nga Egipcio a siaarmas iti gayang. Pang-or ti armas ni Benaias a nangdarup iti Egipcio. Inagawna ti gayang ti Egipcio ket daytoy ti pinangpatayna kenkuana.

²²Dagitoy dagiti aramid ni Benaias a mangipakita iti kinaturedna. Isu ti maysa kadagiti “Dagiti Tallopulo.”

²³Isu ti agdindinamag kadakuada amin ngem saan a nalatak a kas kadagiti “Tallo.” Isu ti dinutokan ni David a pangulo dagiti guardiana.

²⁴Dagiti dadduma a kameng dagiti “Tallopulo a Mamaingel.” Ni Asael a kabsat ni Joab Ni Elhanan nga anak ni Dodo a taga-Betlehem Ni Samma ken ni Elika a taga-Harod Ni Helez a taga-Pelet Ni Ira nga anak ni Ikkes a taga-Tekoa Ni Abiezer a taga-Anatot Ni Mebunnai a taga-Husa Ni Zalmon a taga-Aho Ni Maharai a taga-Netofa Ni Heleb nga anak ni Baana a taga-Netofa Ni Ittai nga anak ni Ribai a taga-Gabaa idiay Benjamin Ni Benaias a taga-Piraton Ni Hiddai a taga-tanap iti asideg ti Gaas Ni Abialbon a taga-Araba Ni Asmabet a taga-Bahurim Ni Elisaba a taga-Saalbon Dagiti annak ni Jasen Ni Jonatan Ni Samma a taga-Harar Ni Ahiam nga anak ni Sarar a taga-Harar Ni Eleifelet nga anak ni Ahasbai a taga-Maaca Ni Eliam nga anak ni Ahitofel a taga-Gilo Ni Hezro a taga-Carmel Ni Paarai a taga-Arab Ni Igal nga anak ni Natan a taga-Soba Ni Bani a taga-Gad Ni Zelek a taga-Ammon Ni Naharai a taga-Beerot (isu ti para-awit iti armas ni Joab nga anak ni Zeruyas) Ni Ira ken ni Gareb a taga-Jattir Ni Urias a Heteo. Agdagup amin iti 37 dagiti(...)