Read Iloko 2 Samuel 24 Bible Online

2 Samuel 24 - Iloko bible

2 Samuel 24

¹Iti naminsan, nakaunget ni Yahweh iti Israel ket sinugsoganna ni David a mangyeg iti didigra kadagiti Israelita. Kinuna ni Yahweh kenkuana, “Inka sensusen dagiti tattao ti Israel ken Juda.”

²Ngarud, binilin ni David ni Joab ken dagiti pangulo ti armada: “Inkayo sursoren ti amin a tribu ti Israel, manipud Dan agingga idiay Beerseba ket bilangenyo dagiti tattao. Kayatko a maammoan no mano ti bilangda.”

³Ngem insungbat ni Joab, “Natan-ok nga Ari, sapay koma ta paaduen ti Apo a Diosmo iti maminsangagasut dagiti tattao ti Israel. Sapay koma ta addakanto pay la a biag inton aramidenna daytoy. Ngem apay a kayat ti Natan-ok nga Ari nga aramiden daytoy?”

⁴Nupay kasta, ti sao ti ari ti natungpal ket inaramid ni Joab ken dagiti ofisialesna ti bilinna. Pimmanawda iti ayanna ket napanda binilang dagiti Israelita.

⁵Binallasiwda ti Jordan ket nagkampoda iti abagatan ti Aroer, ti siudad iti tengnga ti tanap, iti sakup ti Gad. Manipud sadiay, nagpa-amiananda a napan iti Jazer,

⁶sa idiay Galaad ken idiay Kades iti daga dagiti Heteo. Napanda idiay Dan ket manipud Dan nanglikawda a napan iti laud ti Sidon.

⁷Kalpasanna, nagpa-abagatanda a napan iti nasarikedkedan a siudad ti Tiro sa kadagiti amin a siudad dagiti Heveo ken Cananeo ket kamaudianna, idiay Beerseba, iti akin-abagatan a paset ti Juda.

⁸Kalpasan ti siam a bulan ken 20 nga aldaw, nagsublida idiay Jerusalem; sinursorda ti entero a pagilian.

⁹Indatagda iti ari ti dagup dagiti lallaki a mabalin nga agsoldado: 800,000 idiay Israel ken 500,000 idiay Juda.

¹⁰Ngem kalpasan ti panagpasensus ni David, nariribuk ti konsensiana ket kinunana ken ni Yahweh, “Nagbasolak iti nadagsen iti panangaramidko iti daytoy! Pangngaasim ta pakawanennak. Minamaag unay ti inaramidko.”

¹¹Kinuna ni Yahweh ken ni Gad a profeta ni David, “Inka ibaga ken ni David nga ikkak iti tallo a pagpilian. Aramidek ti aniaman a pilienna.” Iti sumuno a bigat, kalpasan ti ibabangon ni David,

¹³napan kenkuana ni Gad sana imbaga ti sao ni Yahweh ket sinaludsodna, “Ania ti kayatmo kadagitoy? Tallo a tawen a panagbisin iti dagam wenno tallo a bulan nga itartarayam dagiti kabusormo wenno tallo nga aldaw nga adda angol iti dagam? Panunotem a nalaing ket ibagam ti sungbatmo nga idanonko iti Apo?”

¹⁴Insungbat ni David, “Narikut ti sasaadek! Ngem diak kayat a dusaendak dagiti tattao. Yantangay ta manangngaasi ti Apo, bay-am nga isu ti mangdusa kadatayo.”

¹⁵Ngarud, nangyeg ni Yahweh iti angol iti Israel a nangrugi iti dayta a bigat ket nagpatingga iti intudingna a tiempo. Manipud Dan agingga idiay Beerseba, 70,000 nga Israelita ti natay.

¹⁶Idi dandani dadaelen ti anghel ni Yahweh ti Jerusalem, imbabawi ni Yahweh ti panangdusana kadagiti tattao ket kinunana iti anghel nga agpappapatay kadakuada, “Huston! Isardengmon!” Adda idi ti anghel ti abay ti pagirikan ni Arauna a Jebuseo.

¹⁷Nakita ni David ti anghel, ket kinunana ken ni Yahweh, “Siak ti nagbasol. Siak ti nagaramid iti dakes. Ania aya ti inaramid dagitoy nanumo a tattao? Siak ken ti familiak ti rumbeng a dusaem.”

¹⁸Iti dayta met la nga aldaw, napan ni Gad ken ni David ket kinunana, “Inka iti pagirikan ni Arauna ket mangbangonka sadiay iti altar nga agpaay iti Apo.”

¹⁹Tinungpal ni David ti bilin ni Yahweh ket napan a kas imbaga ni Gad kenkuana.

²⁰Idi makita ni Arauna a dumteng ti ari ken dagiti ofisialesna, rukob iti sangoanan ni David

²¹ket sinaludsodna, “Natan-ok nga Ari, apay nga addaka ditoy?” Insungbat ni David, “Umayko gatangen ti pagirikam a pangbangonak iti altar ti Apo tapno agsardeng ti didigra.”

²²“Alaem, Natan-ok nga Ari,” kinuna ni Arauna, “ket idatonmo iti Apo ti aniaman a kayatmo. Adtoy dagiti baka a mapuoran a kas daton iti altar; dagitoy dagiti sangolda ken dagiti pagirik a maaramat a pagsungrod.”

²³Inted amin ni Arauna iti ari sana kinuna kenkuana, “Sapay koma ta awaten ti Apo a Diosmo ti datonmo.”

²⁴Ngem insungbat ti ari, “Saan, gatangek. Diak mangidatag iti Apo kadagiti daton a pulos nga awan imbayadko.” Ket ginatangna ti pagirikan ken dagiti baka iti 50 a bagi ti pirak.

²⁵Nangbangon iti altar nga agpaay ken ni Yahweh ket nangidatag kadagiti daton a mapuoran ken kadagiti daton a pakikappia. Impangag ni Yahweh ti kararagna ket simmardeng ti didigra iti Israel.