Read Iloko 2 Samuel 6 Bible Online

2 Samuel 6 - Iloko bible

2 Samuel 6

¹Inummong manen ni David dagiti napili a mannakigubat ti Israel; agdagupda iti 30,000

²ket indauloanna ida a mapan Baala idiay Juda tapno alaenda ti Lakasa ti Tulag ni Yahweh a mangipakita iti nailangitan a trono ni Yahweh a Mannakabalin-amin.

³Innalada iti balay ni Abinadab nga adda iti tuktok ti turod ket inkargada iti baro a karison sada pimmanaw. Da Uzza ken Ahio nga annak ni Abinadab ti mangiturturong iti karison.

⁴Magmagna ni Ahio iti sango ti lugan.

⁵Agsalsala ken agkankanta ni David ken dagiti amin nga Israelita iti amin a kabaelanda a kas pammadayawda ken ni Yahweh. Agtoktokarda kadagiti arpa, salterio, pandereta, kastanuelas ken piangpiang.

⁶Ngem idi dumtengda iti panaltagan ni Nahon, naitibkol dagiti baka isut' gapuna a tinengngel ni Uzza ti Lakasa ti Tulag.

⁷Simgiab ti pungtot ni Yahweh a Dios ket dinusana ni Uzza gapu iti saanna a panagraem. Iti dayta a darikmat, natay ni Uzza sadiay iti abay ti Lakasa ti Tulag.

⁸Madi ti rikna ni David gapu ta iti pungtot ni Yahweh, dinusana ni Uzza. Manipud idin, maaw-awagan dayta a disso iti Perez Uzza.

⁹Iti dayta nga aldaw, nagbuteng ni David ken ni Yahweh ket kinunana, “Kasano nga alaek itan ti Lakasa ti Tulag?”

¹⁰Saanna kayat nga ipan ti Lakasa idiay Jerusalem. Simmiasi ketdi iti dalan ket inkabilna ti Lakasa iti balay ni Obed Edom a taga-siudad ti Gat.

¹¹Tallo a bulan a nagyan sadiay ti Lakasa ket binendisionan ni Yahweh ni Obed Edom ken ti familiana.

¹²Nadamag ni Ari David a nabendisionan ti familia ni Obed Edom ken ti amin nga adda kenkuana gapu ti Lakasa ti Tulag. Iti kasta, innalana ti Lakasa iti balay ni Obed Edom tapno ipanna idiay Jerusalem a napakuyogan iti dakkel a rambak.

¹³Idi nakaadayo iti innem nga addang dagiti lallaki a nagawit iti Lakasa ti Tulag, pinagsardeng ida ni David sa nangidaton iti maysa a baka ken maysa a nalukmeg a karnero.

¹⁴Nagbarikes ni David iti linen nga efod ket nagsala iti amin a kabaelanna a kas pammadayawna ken ni Yahweh.

¹⁵Iti kasta, isu ken dagiti amin nga Israelita inyawidda ti Lakasa ti Tulag idiay Jerusalem. Bayat ti pannagnada, agdidir-ida iti ragsak ken agpuypuyotda kadagiti trumpeta.

¹⁶Idi madamada nga iserrek ti Lakasa iti siudad, timman-aw ni Mical nga anak ni Saul, ket nakitana ni Ari David nga agsalsala ken aglaglagto iti imatang ni Yahweh. Inumsi ni Mical ti ari.

¹⁷Inserrekda ti Lakasa ket inkabilda iti uneg ti nakairantaanna a Tolda a binangon ni David. Nangidatag ni David kadagiti daton a mapuoran ken kadagiti daton a pakikappia a maipaay ken ni Yahweh.

¹⁸Kalpasanna, binendisionanna dagiti tattao iti imatang ni Yahweh a Mannakabalin-amin

¹⁹ket binunonganna amin ida iti kanen. Inikkanna ti tunggal Israelita iti maysa a tinapay, sangkaiwa a natuno a karne ken kankanen nga adda pasasna. Kalpasanna, nagawidda amin.

²⁰Idi agawid ni David tapno kablaawanna ti familiana, rimmuar ni Mical a nangsabat kenkuana. “Intan-ok ti ari ti Israel ti naganna ita nga aldaw,” kinuna ni Mical. “Kasla maag a naglamolamo iti sangoanan dagiti babbai nga adipen dagiti ofisialesna!”

²¹Insungbat ni David, “Nagsalsalaak a kas pammadayawko iti Apo a nangpili kaniak a saan ketdi a ni amam wenno ti familiana nga agbalin a pangulo dagiti tattaona nga Israelita. Wen, itultuloyko ti agsala a kas pammadayaw iti Apo,

²²ket ad-adda manen nga ibabainko ti bagik. Nalabit nga ipagarupmo nga awan serserbik ngem dayawendakto dagita a babbai.”

²³Pulos a saan a naganak ni Mical nga anak ni Saul.