Read Iloko 1 Kings 10 Bible Online

1 Kings 10 - Iloko bible

1 Kings 10

¹Nagdindinamag ni Solomon ket naammoan ti reyna ti Seba ti maipapan kenkuana. Ngarud, nagdaliasat a napan idiay Jerusalem tapno tingitingenna ti kinasirib ti ari babaen kadagiti narikut a salsaludsod.

²Nangikuyog iti adu a tagabu agraman bunggoy ti kamelio a nagkarga kadagiti bangbanglo, alahas ken adu a balitok. Idi addan iti sangoanan ni Solomon, sinaludsodna kenkuana ti amin a saludsod a mapanunotna.

³Nasungbatan ni Solomon ti amin a saludsod; awan ti narigat kenkuana nga ilawlawag.

⁴Kasta unay ti panagdayaw ti reyna iti nagpaiduma a kinasirib ni Solomon. Nakitana ti palasio a binangonna,

⁵ti taraon nga idasdasarna, dagiti ofisiales nga agserserbi iti tronona, ti kinalaing dagiti adipenna nga agserbi ken ti nadaeg a pagan-anayda, dagiti para-serbi iti arak, ken dagiti daton a mapuoran nga idatdatagna iti Templo. Masmasdaaw a nakakita amin kadagitoy ket kasta unay ti panagdayawna.

⁶Kinunana iti ari, “Pudno ti nadamagko idi addaak iti dagak maipapan kenka ken iti kinasiribmo!

⁷Ngem narigatko a patien agingga nga immayak ket mismo a napaneknekak. Ngem kurang pay a kaguduana laeng ti nadamagko; nasirsirib ken nabakbaknangka nga adayo ngem iti nadamagko.

⁸Naggasat ketdin dagiti assawam! Ket naggasat ketdin dagiti adipenmo a kanayon a makangngeg kadagiti nainsiriban a saom.

⁹Madaydayaw koma ti Apo a Diosmo! Impakitana a maragsakan kenka babaen iti panangisaadna kenka nga ari ti Israel. Gapu ta agnanayon ti panagayatna iti Israel, pinagbalinnaka nga ari tapno pagtalinaedem ti linteg ken hustisia.”

¹⁰Indatag ti reyna ti Seba dagiti intugotna a sagut nga agpaay ken ni Solomon: dandani lima a tonelada a balitok ken nakaad-adu nga alahas ken bangbanglo. Awan pay ti kastoy a kaadu a bangbanglo a naawat ni Solomon iti uray ania a tiempo. (

¹¹Saan la a dagitoy ti inawatna. Nangyeg pay dagiti barko ni Hiram iti adu a kayo ti almug ken al-alahas a naggapu idiay Ofir. Dagitoy met la a barko ti nakailuganan dagiti balitok a naggapu manipud sadiay.

¹²Inaramidna dagitoy a kayo a barandilias ti Templo ken ti palasio, agraman lira ken arpa dagiti musiko. Daytoy ti kapintasan a kayo nga almug a naipan iti Israel ket awanen ti kasta a kita agpapan ita.)

¹³Inted ni Ari Solomon ti amin a kiniddaw ti reyna ti Seba kenkuana malaksid pay dagiti gagangay a sagut nga intedna a sibubuslon. Kalpasanna, nagsubli ti reyna agraman dagiti adipenna iti daga ti Seba.

¹⁴Tinawen nga umawat ni Solomon iti nasurok a 25 a tonelada a balitok,

¹⁵malaksid dagiti buis dagiti agtagtagilako, dagiti maganansia iti pannakilinnako iti sabali a pagilian, ken dagiti ited dagiti ari ti Arabia ken dagiti gobernador ti probinsia a kas panangbigbigda iti panagarina.

¹⁶Nangaramid ni Ari Solomon iti 200 a dadakkel a kalasag. Nakalupkopan ti tunggal kalasag iti dandani 15 a libra a balitok.

¹⁷Nangaramid pay iti 300 a babbabassit a kalasag. Nakalupkopan iti dandani uppat a libra a balitok ti tunggal maysa. Pinaikabilna amin dagitoy iti Salas a maaw-awagan iti Bakir ti Libano.

¹⁸Nangaramid pay ti ari iti dakkel a trono a kinalupkopanna iti marfil ken balitok.

¹⁹Innem ti tukad ti agdan a mapan iti trono. Adda sinan-leon iti tunggal murdong iti tunggal tukad ket agdagupda amin iti sangapulo ket dua. Iti likudan ti trono, adda sinan-ulo ti baka ket iti abay dagiti dua nga ima ti trono, adda sinan-leon, maysa iti tunggal ima. Awan ti ari a naaddaan iti kastoy a trono.

²¹Balitok amin a baso ni Solomon. Puro a balitok met dagiti alikamen iti Salas ti Bakir ti Libano. Awan alikamen a pirak ta awan pateg ti pirak idi tiempo ni Solomon.

²²Adda bunggoy ti barko ti ari nga agbibiahe kadagiti sabali a pagilian ket makikuykuyog iti bunggoy ti barko ni Hiram. Tunggal tallo a tawen, agawid dagiti barko nga agisangpet kadagiti balitok, pirak, marfil, burangen ken bakes.

²³Awanen ti sabali nga ari a nabakbaknang ken nasirsirib ngem ni Ari Solomon.

²⁴Tinarigagayan ti sangalubongan a mapan denggen ti sirib nga imparabur ti Dios kenkuana.

²⁵Nangitugot ti tunggal maysa iti sagutna iti ari: alikamen a balitok ken pirak, kagay, armas, bangbanglo, kabalio ken mulo. Tinawen a kasta ti maaramid.

²⁶Nangbuangay ni Solomon iti armada a buklen ti 1,400 a lugan a pakigubat ken 12,000 a nagkabalio a soldado. Inkabilna ti dadduma kadagiti ili nga ayan dagiti lugan a pakigubat ket imbatina ti dadduma idiay Jerusalem a madadaan nga agserbi kenkuana.

²⁷Bayat ti panagturayna, adu ti pirak a kas iti kaadu ti kadawyan a bato. Adu met ti sedro a kas iti ordinario a sikamoro iti arisadsad dagiti turod ti Juda.

²⁸Dagiti pannakabagina ti mangimaton iti negosio ti kabalio manipud Musri ken Cilicia, ken ti negosio ti lugan a pakigubat manipud Egipto.

²⁹Agpateg iti 600 a bagi ti pirak ti maysa a lugan a pakigubat nga aggapu idiay Egipto ket 150 met ti kabalio. Ilako met ida dagiti pannakabagi ni Solomon kadagiti ari dagiti Heteo ken dagiti ari dagiti taga-Siria.