Read Iloko 1 Kings 11 Bible Online

1 Kings 11 - Iloko bible

1 Kings 11

¹Adu a babbai a nagtaud kadagiti sabali a pagilian ti inay-ayat ni Solomon. Malaksid ti anak ti Faraon nga ari ti Egipto, nangasawa pay iti adu a Moabita, Ammonita, Edomita, Sidonia ken Hetita.

²Inasawana ida nupay imbilin ni Yahweh kadagiti Israelita a dida makiasawa kadagita a tattao ta isudanto ti mangawis kadakuada nga agdaydayaw kadagiti sabali a didiosen.

³Pitogasut a prinsesa ti assawana ket 300 dagiti babbai a nagserbi a kas assawana. Insungsongda ni Solomon a mangbaybay-a iti Dios,

⁴ket idi lumakayen, indalanda nga agdaydayaw kadagiti didiosen. Saan a napudno ken ni Yahweh a Diosna a kas iti kinapudno idi ni David nga amana.

⁵Nagdaydayaw ken ni Astarot a diosa dagiti Sidonio, ken ni Milcom, ti makarimon a dios dagiti Ammonita.

⁶Nagbasol ken ni Yahweh ket saan a napudno kenkuana a kas iti kinapudno ni David nga amana.

⁷Iti turod iti daya ti Jerusalem, nangaramid iti pagdaydayawan ken ni Kemos a makarimon a dios ti Moab. Nangaramid met iti pagdaydayawan ken ni Molec a makarimon a dios dagiti Ammonita.

⁸Nagaramid met kadagiti pagdaydayawan nga agpaay kadagiti assawana tapno adda pagpuoranda iti insenso ken pagidataganda kadagiti daton nga agpaay kadagiti bukodda a dios.

⁹Namindua a nagparang ken ni Solomon ni Yahweh a Dios ti Israel ket imbilinna kenkuana a di agdaydayaw kadagiti didiosen a ganggannaet. Nupay kasta, dina impangag ni Yahweh. Tinallikudanna ketdi, isu a nakapungtot ni Yahweh kenkuana

¹¹ket kinunana, “Agsipud ta inggagaram a naglikudan ti nagtulaganta ket sinalungasingmo dagiti bilinko, ikkatekto kenka ti pagarian sa itedko iti maysa kadagiti ofisialesmo.

¹²Ngem gapu ken ni David nga amam, diak aramiden daytoy bayat ti panagbiagmo no di ket inton tiempo ti panagturay ti anakmo.

¹³Ket diakto ikkaten a mamimpinsan ti pagarian kenkuana. Gapu ken ni David nga adipenko ken gapu iti Jerusalem nga imbilangko a siudadko, mangibatiakto iti maysa a tribu nga iturayanna.”

¹⁴Babaen iti panangipamuspusan ni Yahweh, nagbalin ni Hadad a kabusor ni Solomon. Nagtaud ni Hadad iti puli dagiti ari ti Edom.

¹⁵Sakbay daytoy, pinarmek ni David ti Edom. Napan sadiay ni Joab a pangulo ti armada ni David tapno itabonna dagiti napapatay. Innem a bulan a nagyan ni Joab ken ti armadana idiay Edom ket saanda a pimmanaw agingga a napapatayda amin a lallaki nga Edomita.

¹⁷Ngem nakalibas ni Hadad ken sumagmamano nga Edomita nga adipen ni amana ket napanda idiay Egipto. (Ubing pay la idi ni Hadad.)

¹⁸Pimmanawda idiay Midian ket idi dumtengda idiay Paran, nagalada iti sumagmamano a lallaki nga inkuyogda idiay Egipto. Inawat ti ari ida, inikkanna ni Hadad iti daga ken balay, agraman taraon.

¹⁹Nagun-od ni Hadad ti panagtalek ti ari, isu nga impaasawana kenkuana ti ipagna, ti mismo a kabsat ni Reyna Tafnes.

²⁰Naganakda iti maysa a lalaki a pinanagananda iti Genubat. Innala ti reyna ket dimmakkel ti ubing iti palasio a kaduana dagiti annak ti ari.

²¹Idi madamag ni Hadad a natayen ni Ari David, kasta met ni Joab a pangulo ti armada, kinunana iti ari, “Palubosannak koma nga agsubli iti daga a nakayanakak.”

²²“Apay?” sinaludsod ti ari. “Adda kadi nagkurangak kenka? Isu kadi ti panggapuam nga agawid?” “Awan,” insungbat ni Hadad, “ngem pangngaasim ta palubosannak.” Nagawid ngarud iti dagana. Kas ari ti Edom, nauyong, nadawel a kabusor ni Hadad ti Israel.

²³Adda sabali pay a tao a pinataud ti Dios a nangbusor ken ni Solomon—ni Rezon nga anak ni Eliada. Tinalawan idi ni Rezon ni apona nga Adadezer nga ari ti Soba,

²⁴ket nagbalin a pangulo ti maysa a bunggoy dagiti tulisan. (Napasamak daytoy kalpasan ti panangparmek ni David ken ni Adadezer ket pinapatayna dagiti kaduana a taga-Siria.) Napan nagnaed idiay Damasco da Rezon ken dagiti tattaona. Sadiay, pinagbalin dagiti tattaona nga ari ti Siria.

²⁵Nagbalin a kabusor ti Israel bayat ti panagturay ni Solomon.

²⁶Bimmusor met ti maysa kadagiti ofisiales ni Ari Solomon. Isu ni Jeroboam nga anak ni Nebat a taga-Sereda idiay Efraim; maysan a balo ni Serva nga inana.

²⁷No apay nga immalsa, adtoy ti pakasaritaanna. Madama idi ti panagpagabur ni Ari Solomon iti bangirna ti daya ti Jerusalem ken patartarimaanna ti bakud ti siudad.

²⁸Maysa nga agtutubo ni Jeroboam ket kapigpigsaanna. Idi madlaw ni Solomon ti kabaelanna, dinutokanna a kapatas iti amin nga inkapilitan a panagtrabaho iti sakup dagiti tribu ti Manases ken Efraim.

²⁹Iti maysa nga aldaw, rimmuar ni Jeroboam iti Jerusalem ket iti dalan, nasabatna ni profeta Ahija a taga-Silo. Duduada laeng ken ni Ahija iti away. Baro ti kagay ti profeta.

³⁰Inuksobna sana rinay-ab a pinagkasangapulo ket dua.

³¹Kinuna ken ni Jeroboam, “Alaem ti sangapulo a paset, ta kuna kenka ti Apo a Dios ti Israel: ‘Alaek ti pagarian ken ni Solomon ket itedko kenka ti sangapulo a tribu.

³²Agtalinaed ken ni Solomon ti maysa a tribu gapu ken ni adipenko a David ken gapu iti Jerusalem, ti siudad a pinilik a kukuak iti entero a daga ti Israel.

³³Aramidek daytoy ta linaksidnak ni Solomon. Nagdaydayaw ken ni Astarte a diosa ti Sidon, ni Kemos a dios ti Moab, ken ni Molec a dios ti Ammon. Sinukirnak ni Solomon. Nagaramid iti dakes ket saanna a tinungpal dagiti bilin ken linteg a kas ken ni amana a David.

³⁴Nupay kasta, diak alaen ti entero a pagarian kenkuana. Pagtalinaedek nga ari iti unos ti panagbiagna gapu ken ni David nga adipenko a pinilik ken nangtungpal kadagiti bilin ken lintegko.

³⁵Alaekto ti pagarian iti anak ni Solomon ket itedko kenka ti sangapulo a tribu.

³⁶Ipalubosko nga iturayan ti maysa nga anak ni Solomon ti maysa a tribu tapno addanto latta kaputotan ni David nga adipenko nga agturay idiay Jerusalem, ti siudad a pinilik a pagdaydayawan kaniak dagiti tattao.

³⁷Jeroboam, sikanto ti isaadko nga ari ti Israel ket iturayamto ti amin a daga a kayatmo nga iturayan.

³⁸No tungpalennak iti amin a pusom, no annurotem dagiti lintegko iti panagbiagmo ket magun-odmo ti panagtalekko kenka babaen iti panangtungpalmo kadagiti bilinko a kas ken ni David nga adipenko, kanayonto nga addaak kenka. Wen, isaadka nga ari ti Israel ket ipanamnamak nga addanto latta kaputotam a sumaruno kenka nga agturay a kas iti inaramidko ken ni David.

³⁹Gapu iti basol ni Solomon, dusaekto dagiti kaputotan ni David ngem saan nga iti agnanayon!’”

⁴⁰Gapu iti daytoy, pinanggep ni Solomon a patayen ni Jeroboam. Ngem naglibas ni Jeroboam ket nagkamang ken ni Ari Sisak idiay Egipto. Sa la pimmanaw sadiay idi natayen ni Solomon.

⁴¹Nailanad ti amin nga inaramid ni Solomon, ti panagbiag ken kinasiribna iti libro a napauloan iti Pakasaritaan ti Biag ni Solomon.

⁴²Uppat a pulo a tawen a nagnaed idiay Jerusalem iti panangiturayna iti Israel.

⁴³Idi matay, naitabon iti Siudad ni David ket ni Roboam nga anakna ti simmukat kenkuana nga ari.