Read Iloko 1 Kings 12 Bible Online

1 Kings 12 - Iloko bible

1 Kings 12

¹Napan ni Rehoboam idiay Sikem a naguummongan dagiti tattao iti Akin-amianan nga Israel a mangisaad kenkuana nga ari.

²Adda pay la ni Jeroboam nga anak ni Nebat idiay Egipto; nagkamang sadiay idi panggep a patayen ni Ari Solomon. Idi madamagna ti panagari ni Rehoboam, pimmanaw idiay Egipto ket nagawid iti Israel.

³Pinaayaban dagiti tribu iti amianan ni Jeroboam ket nagkukuyogda a napan ken ni Ari Rehoboam. Kinunada kenkuana,

⁴“Naranggas ti panangituray kadakami ni Solomon nga amam ket nadagsen dagiti impaawitna kadakami. No palag-anem dagitoy nga awit ket panam-ayem bassit ti biagmi, napudnokamto nga agserbi kenka.”

⁵“Ikkandak iti tallo nga aldaw a mangadal iti daytoy ket kalpasanna, agsublikayto,” kinuna ti ari. Pimmanaw ngarud dagiti tattao.

⁶Nakiuman ni Ari Rehoboam kadagiti panglakayen a nagserbi idi a kas mammagbaga ken ni amana a Solomon. “Ania ti ibalakadyo nga isungbatko kadagitoy a tattao?” sinaludsodna kadakuada.

⁷Insungbatda, “No kayatmo a nasayaat ti panagserbim kadagitoy a tattao, patgam ti dawatda tapno agserbidanto kenka iti agnanayon.”

⁸Ngem saan nga impangag ni Rehoboam ti imbalakadda. Napan ketdi nakiuman kadagiti kinaubinganna nga agserserbin kenkuana.

⁹“Ania ti ibalakadyo nga aramidek?” sinaludsodna. “Ania ti ibagak kadagiti tattao nga agdawat iti panangpalag-anko iti awitda?”

¹⁰Insungbatda, “Kastoy ti ibagam kadakuada: ‘Napuspuskol ti kikitko ngem ti siket daydi amak.

¹¹No nadagsen dagidi impaawit kadakayo daydi amak, nadagdagsen pay ti ipaawitko. Sinaplitnakayo idi ngem ita, latikoenkayo!’”

¹²Kalpasan ti tallo nga aldaw, nagsubli ni Jeroboam ken dagiti Israelita ken ni Ari Rehoboam a kas imbagana kadakuada.

¹³Saan nga impangag ti ari ti balakad dagiti panglakayen ket nagubsang ti panagsaona kadagiti tattao,

¹⁴kas imbalakad kenkuana dagiti agtutubo: “No nadagsen dagidi impaawit kadakayo daydi amak, nadagdagsen pay ti ipaawitko. Sinaplitnakayo idi ngem ita, latikoenkayo!”

¹⁵Pagayatan ni Yahweh a saan nga ipangag ni Rehoboam dagiti tattao tapno matungpal ti karina ken ni Jeroboam nga anak ni Nebat nga imbagana ken ni profeta Ahija.

¹⁶Idi mabigbig dagiti tattao a saan nga ipangag ti ari ida, inyikkisda, “Marpuog koma ni David ken ti familiana! Ania kadi ti naipaayda kadatayo? Agawidtayon, tattao ti Israel! Bay-anyo a ni Rehoboam ti makaammo iti bagbagina!” Nagawid ngarud dagiti Israelita.

¹⁷Dagiti laeng tattao nga agnaed kadagiti siudad iti sakup ti Juda ti inturayan ni Rehoboam.

¹⁸Kalpasanna, imbaon ni Ari Rehoboam ni Adoram a kapatas ti inkapilitan a panagtrabaho a mapan kadagiti Israelita ngem binatobatoda agingga a natay. Gapu iti daytoy, dinardaras ni Ari Rehoboam ti naglugan iti luganna a pakigubat ket naglibas a napan idiay Jerusalem.

¹⁹Manipud idin, kanayonen a busoren dagiti tattao iti akin-amianan a pagarian ti Israel ti panagturay dagiti kaputotan ni David.

²⁰Idi madamag dagiti Israelita a nagsubli ni Jeroboam manipud idiay Egipto, inawisda iti maysa a taripnong dagiti tattao ket pinagbalinda nga ari ti Israel. Ti laeng tribu ti Juda ti nagtalinaed a napudno kadagiti kaputotan ni David.

²¹Idi sumangpet ni Rehoboam idiay Jerusalem, inummongna ti 180,000 a napili a mannakigubat kadagiti tribu ti Juda ken Benjamin. Panggepna ti makigubat tapno maisubli ti panangiturayna kadagiti tribu ti amianan ti Israel.

²²Ngem imbaon ti Dios ni profeta Semaias

²³a mapan ken ni Rehoboam ket ipakaammona kenkuana ken kadagiti amin a tattao kadagiti tribu ti Juda ken Benjamin

²⁴ti sao ni Yahweh: “Diyo rauten dagiti mismo a kakabsatyo nga Israelita. Agawidkayo aminen, ta siak ti akin-aramid iti napasamak.” Tinungpalda ti bilin ni Yahweh ket nagawidda.

²⁵Sinarikedkedan ni Jeroboam ti ili ti Sikem iti katurturodan ti Efraim ket nagtaeng sadiay. Kalpasanna, napanna sinarikedkedan ti Penuel.

²⁶Kinunana iti nakemna, “No saan nga agsardeng dagiti tattaok a mapan idiay Jerusalem tapno agidatagda kadagiti sakrifisio iti Apo iti Templo sadiay, awan duadua nga agsublinto ti panagtalekda iti sigud nga apoda, ni Rehoboam nga ari ti Juda, ket patayendakto.”

²⁸Kalpasan ti panangad-adalna iti daytoy a banag, nangsukog iti dua a sinan-baka a balitok. Kinunana kadagiti tattaona, “Dikayon agrigat pay a mapan agdaydayaw idiay Jerusalem. Tattao ti Israel, adtoy dagiti didiosenyo a nangiruar kadakayo idiay Egipto!”

²⁹Inkabilna ti maysa a sinan-baka idiay Betel, ket ti sabali idiay Dan.

³⁰Ngarud, nagbasol dagiti tattao iti panagdaydayawda idiay Betel ken idiay Dan.

³¹Nangbangon pay ni Jeroboam kadagiti pagdaydayawan kadagiti tapaw dagiti turod ket nangdutok kadagiti papadi uray no saanda a nagtaud iti tribu ni Levi.

³²Intuding ni Jeroboam ti maika-15 nga aldaw ti maikawalo a bulan a maramrambakan idiay Juda. Iti altar idiay Betel, nagidatag kadagiti daton a mapuoran kadagiti inaramidna a sinan-baka a balitok. Impanna idiay Betel dagiti papadi nga agserserbi kadagiti lugar a pagdaydayawan nga inaramidna.

³³Iti maika-15 nga aldaw iti maikawalo a bulan, ti aldaw a mismo a pinilina, napan idiay Betel ket nagpuor iti daton iti altar kas pangrambakna iti fiesta nga intudingna nga agpaay kadagiti Israelita.