Read Iloko 1 Kings 16 Bible Online

1 Kings 16 - Iloko bible

1 Kings 16

¹Nagsao ni Yahweh ken ni profeta Jehu nga anak ni Hanani ket imbagana ti mensahena nga agpaay ken ni Baasa:

²“Intan-okka manipud iti tapok. Pinagbalinka a pangulo dagiti tattaok nga Israelita ngem tinuladmo ni Jeroboam ket insungsongmo nga agbasol dagiti tattaok. Nagpungtotak gapu kadagiti basolda

³ket daytoy ti gapuna a pukawenka ken ti familiam a kas iti inaramidko ken ni Jeroboam.

⁴Kanento dagiti aso ti siasinoman a kameng ti familiam a matay iti uneg ti siudad ket dagitinto met buitre ti mangan iti siasinoman kadakuada a matay iti away.”

⁵Nailanad iti Pakasaritaan dagiti Ari ti Israel ti dadduma a pasamak iti panagturay ni Baasa ken ti amin a gapuananna a pakakitaan ti kinaturedna.

⁶Idi natay ni Baasa, naitabon idiay Tirza ket ni Ela nga anakna ti simmukat kenkuana nga ari.

⁷Imbaon ni Yahweh ni profeta Jehu tapno ipakaammona ken ni Baasa ti pangngeddengna a maibusor kenkuana ken iti familiana. Ngamin, pinagpungtotna ni Yahweh gapu ta malaksid iti panangtuladna kadagiti dakes nga inaramid ni Ari Jeroboam, pinatayna pay ti amin a kameng ti familia ni Jeroboam.

⁸Iti maika-26 a tawen a panagturay ni Asa nga ari ti Juda, naisaad met ni Ela nga anak ni Baasa nga ari iti Israel ket nagturay idiay Tirza iti dua a tawen.

⁹Maysa kadagiti ofisialesna ti nangisikat a mangpapatay kenkuana. Isu ni Zimri a pangulo ti kagudua ti bilang dagiti soldado nga agar-aramat kadagiti lugan a pakigubat. Iti maysa nga aldaw idiay Tirza, idi mangrugi a mabartek ti ari iti balay ni Arza a mayordomo iti palasio,

¹⁰simrek ni Zimri iti balay ket pinapatayna ni Ela. Ni Zimri ti simmukat ken ni Ela nga ari. Napasamak daytoy iti maika-27 a tawen a panagturay ni Asa nga ari ti Juda.

¹¹Apaman a naisaad ni Zimri nga ari, pinatayna ti amin a kameng ti familia ni Baasa. Napapatay ti amin a lallaki a kabagian ni Baasa agraman dagiti gagayyemna.

¹²Ngarud, natungpal ti imbaga ni Yahweh ken ni profeta Jehu maipapan ken ni Baasa; pinatay ni Zimri ti entero a familia ni Baasa.

¹³Gapu iti panagdaydayawda kadagiti didiosen ken gapu iti panangisungsongda nga agbasol ti Israel, nagpungtot ni Yahweh a Dios ti Israel ken ni Baasa ken ni anakna nga Ela.

¹⁴Nailanad iti Pakasaritaan dagiti Ari ti Israel ti dadduma a pasamak iti panagturay ni Ela.

¹⁵Iti maika-27 a tawen a panagturay ni Asa nga ari ti Juda, pito nga aldaw a nagari ni Zimri idiay Tirza iti panangiturayna iti Israel. Iti dayta a tiempo, madama ti pananglakub ti armada ti Israel ti siudad ti Gebbeton iti sakup ti Filistia.

¹⁶Idi madamagda nga insikat ni Zimri ti ari ket pinatayna, dinagdagusda nga insaad ni Omri a heneralda nga ari iti Israel.

¹⁷Pimmanaw ni Omri ken dagiti buyotna idiay Gebbeton ket napanda linakub ti Tirza.

¹⁸Idi makita ni Zimri a naparmeken ti siudad, napan iti akin-uneg a sarikedked ti palasio sana pinuoran ti palasio ket natay ni Zimri

¹⁹gapu kadagiti basolna ken ni Yahweh. Insungsongna nga agbasol ti Israel kas iti inaramid ni Jeroboam.

²⁰Nailanad iti Pakasaritaan dagiti Ari ti Israel ti dadduma a pasamak iti panagturay ni Zimri agraman ti pakasaritaan ti pannakikumplotna a mangagaw iti turay.

²¹Nabingay dagiti tattao ti Israel iti dua a bunggoy. Maysa a bunggoy ti kimmanunong ken ni Tibni nga anak ni Ginat ti maisaad nga ari; ni met Omri ti kinanunongan ti sabali.

²²Iti kamaudiananna, nangabak ti bunggoy ni Omri. Natay ni Tibni ket nagari ni Omri.

²³Ngarud, iti maika-31 a tawen a panagturay ni Asa nga ari ti Juda, naisaad ni Omri nga ari iti Israel ket 12 a tawen a nagturay. Iti umuna nga innem a tawen, idiay Tirza ti nagturayanna.

²⁴Kalpasanna, ginatangna ti turod ti Samaria iti 6,000 a bagi ti pirak iti maysa a tao nga agnagan iti Semer. Sinarikedkedan ni Omri ti turod, nangbangon iti maysa nga ili sadiay a pinanagananna iti Samaria a naadaw iti nagan ni Semer a sigud nga akinkukua iti turod.

²⁵Ngem dakdakes ti inaramid ni Omri iti imatang ni Yahweh, ket ad-adu ti basolna ngem ti siasinoman kadagiti sinarunona nga agturay.

²⁶Tinuladna dagiti inar-aramid ni Jeroboam. Insungsongna dagiti tattao nga agdaydayaw kadagiti didiosen, isu a nakapungtot kenkuana ni Yahweh a Dios ti Israel.

²⁷Nailanad iti libro a napauloan iti Pakasaritaan dagiti Ari ti Israel ti dadduma a pasamak iti panagturay ni Omri ken dagiti gapuananna a pakakitaan ti kinaturedna.

²⁸Natay ni Omri ket naitanem idiay Samaria. Ni Ahab nga anakna ti simmukat kenkuana nga ari.

²⁹Iti maika-38 a tawen a panagturay ni Asa nga ari ti Juda, naisaad ni Ahab nga anak ni Omri a kas ari ti Israel. Nagturay ni Ahab idiay Samaria iti 22 a tawen.

³⁰Nakarkaro ti basolna ken ni Yahweh ngem iti siasinoman kadagidi sinarunona a nagturay.

³¹Saan pay a naragsakan iti panangituloyna kadagiti aramid ni Ari Jeroboam: inasawana ni Jezebel nga anak ni Etbaal nga ari ti Sidon ket nagdaydayaw ken ni Baal a didiosen.

³²Nangbangon ni Ahab iti templo a pagdaydayawan ken ni Baal idiay Samaria. Nangaramid iti altar ni Baal ket inkabilna iti uneg ti templo.

³³Nangipatakder pay iti imahen ni Asera a maysa a diosa. Ad-adu ti inaramidna a namagpungtot ken ni Yahweh a Dios ti Israel ngem iti amin nga ari ti Israel a sinarunona.

³⁴Bayat ti panagturay ni Ahab, binangon manen ni Hiel a taga-Betel ti Jerico. Kas impakaammo ni Yahweh ken ni Josue nga anak ni Nun, natay ni Abiram nga inauna nga anak ni Hiel, gapu iti panangisaadna iti fondasion ti Jerico. Natay met ni Segub, ti inaudi, idi mabangon dagiti ruangan ti siudad.