Read Iloko 1 Kings 18 Bible Online

1 Kings 18 - Iloko bible

1 Kings 18

¹Kalpasan ti sumagmamano nga aldaw, iti maikatlo a tawen a panagigaawna, kinuna ni Yahweh ken ni Elias, “Inka dumatag ken ni Ari Ahab, ta yegkon ti tudo iti daytoy a daga.”

²Napan ngarud ni Elias. Ita, kapalalo ti panagbisin idiay Samaria.

³Inayaban ni Ahab ni Abdias a mayordomo ti palasio. (Napasnek ni Abdias nga agdaydayaw ken ni Yahweh.

⁴Idi madama ti panagpapatay ni Jezebel kadagiti profeta ni Yahweh, innala ni Abdias ti 100 kadakuada, ket inlemmengna ida iti dua a rukib—50 iti tunggal maysa. Inikkanna ida iti kanenda ken danum nga inumenda.)

⁵Kinuna ni Ahab ken ni Abdias, “Inta kitaen ti tunggal ubbog ken waig ta bareng makasarakta ti ruot nga umanay a kanen dagiti kabalio ken mulo tapno saanda a matay. Nalabit a saanen a masapul a patayentayo dagiti animaltayo.”

⁶Nagnumoanda no ania a paset ti daga ti sursoren ti tunggal maysa ket nagsinada iti turongen.

⁷Bayat ti pannagna ni Abdias, pagammoan ta nasabatna ni Elias. Nabigbigna ni Elias ket nagtamed sana sinaludsod, “Pudno kadi a sika ni Elias, apo?”

⁸“Wen, siak. Inka ibaga iti apom nga ari nga addaak ditoy,” insungbat ni Elias.

⁹“Adda kadi dakes nga inaramidko ta isarsaraknak a mapapatay iti ima ni Ari Ahab?” insungbat ni Abdias.

¹⁰“Iti nagan ti Apo a sibibiag a Diosmo, isapatak a pinasapsapulnaka ti ari iti amin a pagilian ti lubong. No maibaga kenkuana nga awanka iti maysa a pagilian, saan a mamati no di agsapata ti agturay iti dayta a pagilian a saanka a mabirokan.

¹¹Ket ita, ibaonnak a mangibaga kenkuana nga addaka ditoy?

¹²Ngem amangan ketdi nga apaman a makapanawak, alaennaka ti espiritu ti Apo sanaka ipan iti lugar nga awan ti makaammo. No ibagak ken ni Ahab nga addaka ditoy ket dinakanto mabirokan, papapataynakto. Laglagipem a napasnekak nga agdaydayaw iti Apo manipud pay idi ubingak.

¹³Dimo aya nadamag nga idi imbilin ni Jezebel ti pannakapapatay dagiti profeta ti Apo, inlemmengko ti sangagasut kadakuada kadagiti kueba iti dua a grupo a saglilimapulo ket inikkak ida iti kanenda ken danum nga inumenda?

¹⁴Ngarud, kasano nga innak ibaga iti ari nga addaka ditoy? Awan duadua a patayennak!”

¹⁵Insungbat ni Elias, “Iti nagan ti Apo a Mannakabalin-amin a pagserserbiak, ikarik a dumatagak iti ari ita nga aldaw.”

¹⁶Napan ngarud ni Abdias ken ni Ari Ahab ket imbagana ti kaadda ni Elias. Nagrubbuat ni Ahab a mapan mangsarak ken ni Elias.

¹⁷Idi makitana ti profeta, kinunana, “A, addaka gayam, sika a kadaksan a mangrirriribuk iti Israel!”

¹⁸“Saan a siak ti mangrirriribuk,” insungbat ni Elias. “Sika…dakayo nga agama. Salsalungasingenyo dagiti bilin ti Apo ken agdaydayawkayo kadagiti ladawan ni didiosen a Baal.

¹⁹Ita, ummongem dagiti amin nga Israelita tapno agkikitakami idiay Bantay Carmel. Itugotmo met dagiti 450 a profeta ni Baal ken dagiti 400 a profeta ni Asera a diosa a tartaraonan ni Reyna Jezebel.”

²⁰Inummong ngarud ni Ahab dagiti amin nga Israelita ken dagiti profeta ni Baal idiay Bantay Carmel.

²¹Immasideg ni Elias kadagiti tattao ket kinunana, “Kaano nga ikkatenyo ti panagduaduayo? No ti Apo ti Dios, agdaydayawkayo kenkuana; ngem no ni Baal isu ti Dios, agdaydayawkayo kenkuana!” Ngem pulos nga awan ti nasao dagiti tattao.

²²Ket kinuna ni Elias, “Sisiak laeng ti nabati a profeta ti Apo ngem adda 450 a profeta ni Baal.

²³Mangyegkayo iti dua a toro a baka. Alaen dagiti profeta ni Baal ti maysa, patayenda sada rangrangkayen ket iparabawda iti kayo a pagsungrod—ngem dida pasgedan. Kasta met ti aramidek iti sabali a baka.

²⁴Kalpasanna, bay-anyo nga agkararag dagiti profeta ni Baal iti didiosenda ket agkararagak met iti Apo. Ti mangyeg iti apuy a kas sungbatna iti kararag—isu ti Dios.” Impukkaw dagiti tattao ti yaanamongda.

²⁵Kinuna ni Elias kadagiti profeta ni Baal, “Yantangay ta adukayo, mangalakayo iti baka ket dakayo ti umuna a mangidaton. Agkararagkayo iti diosyo ngem diyo pasgedan ti kayo.”

²⁶Innalada ti baka a nayeg kadakuada, insaganada ket nagkararagda ken ni Baal manipud iti agsapa agingga iti tengnga ti aldaw. Impukkawda, “Ipangagnakami, Baal!” ket nagsasalada iti lawlaw ti altar a binangonda. Ngem awan ti sungbat a naurayda.

²⁷Iti tengnga ti aldaw, rinugian ni Elias ti nangrabrabak kadakuada, “Ipigpigsayo ti agkararag! Maysa a dios ni Baal! Nalabit nga agar-arapaap wenno napan immigid wenno napan nagbiahe. Wenno nalabit a matmaturog ket masapul a riingenyo!”

²⁸Ngarud, impigpigsa dagiti profeta ti nagkararag. Sinugsugatda dagiti bagida iti imuko ken daga, kas mayannurot iti ugalida, agingga a nagsayasay ti darada.

²⁹Nagaarimbangaw ken nagsaosaoda a kasda la agam-amangaw agingga iti malem. Ngem awan ti sungbat a naurayda. Awan ti pakakitaan ti pannakaipangagda.

³⁰Kinuna ni Elias kadagiti tattao, “Umasidegkayo kaniak,” ket immasidegda kenkuana. Rinugianna a tinarimaan ti narba nga altar ni Yahweh.

³¹Nangala iti sangapulo ket dua a bato, maysa ti mangibagi iti tunggal tribu dagiti kaputotan ni Jacob, ti tao a pinanaganan ni Yahweh iti Israel.

³²Dagitoy a bato ti inaramatna iti panangbangonna manen iti altar a pagdaydayawan ken ni Yahweh. Nangkali iti kanal iti aglikmut ti altar. Aglaon daytoy a kanal iti dandani uppat a galon a danum.

³³Inkabilna dagiti kayo iti altar, rinangrangkayna ti baka ket imparabawna kadagiti kayo. Kinunana, “Punnoenyo ti uppat a karamba iti danum ket ibuyatyo iti daton ken iti kayo.” Nagtungpalda

³⁴ket kinunana, “Piduaenyo”—ket nagtungpalda. “Maminsan pay,” kinunana—ket nagtungpalda.

³⁵Nagayus ti danum iti likmut ti altar agingga a napno ti kanal.

³⁶Idi dumteng ti oras a panagidaton iti malem, napan ni profeta Elias iti sango ti altar ken inkararagna, “O Apo a Dios da Abraham, Isaac ken Jacob, ipaneknekmo itan a sika ti Dios ti Israel. Wen, iparangarangmo a siak ti adipenmo ket imbilinmo nga aramidek amin dagitoy.

³⁷Sungbatannak, O Apo, sungbatannak tapno maammoan dagitoy a tattao a sika, Apo, ti Dios a mangisubli kadakuada kenka.”

³⁸Nangitinnag ni Yahweh iti apuy ket nauram a namimpinsan ti daton, dagiti kayo ken dagiti bato; nakset ti daga ket namagaan ti kanal iti lawlaw ti altar.

³⁹Idi makita daytoy dagiti tattao, nagpaklebda ket impukkawda, “Ti Apo ti Dios, ti laeng Apo ti Dios!”

⁴⁰Pinatiliw ni Elias dagiti profeta ni Baal. “Diyo ipalubos nga adda makalibas kadakuada,” imbilinna. Tiniliwda dagiti amin a profeta ket inturong ni Elias ida iti Waig ti Kison sana pinapatay ida.

⁴¹Kalpasanna, kinuna ni Elias ken ni Ari Ahab, “Ita, inka manganen. Mangngegko ti daranudor ti umay a tudo.”

⁴²Bayat ti ipapan pannangan ni Ahab, simmang-at ni Elias iti tapaw ti Bantay Carmel. Indumogna ti rupana iti nagbaetan dagiti tumengna.

⁴³Kinunana iti babaonenna, “Inka tannawagan ti taaw.” Simmang-at ti adipen sa met la nagsubli ket kinunana, “Awan a pulos ti makitak.” Namimpito nga imbaon ni Elias ti adipen a mangtannawag iti baybay.

⁴⁴Iti maikapito a daras, nagsubli ti adipen ket kinunana, “Adda nakitak nga ulep a kasla kadakkel ti dakulap, nga agpangpangato manipud iti taaw.” Imbilin ni Elias iti adipenna, “Inka ken ni Ari Ahab. Ibagam kenkuana nga agawiden amangan no saan a makapanaw gapu iti tudo.”

⁴⁵Iti apagbiit, nanglangeb ti tangatang. Nagangin ket rinugianna ti nagtudo iti napigsa. Limmugan ni Ahab iti luganna ket nagawid idiay Jezreel.

⁴⁶Bimmaba ken ni Elias ti pannakabalin ni Yahweh: binariksanna ti pagan-anayna sa nagtartaray agingga nga inunaanna ni Ari Ahab a dimmanon iti pagserkan ti Jezreel.