Read Iloko 1 Kings 20 Bible Online

1 Kings 20 - Iloko bible

1 Kings 20

¹Pinagtitipon ni Ben-hadad nga ari ti Siria dagiti amin nga armadana tapno rautenda ti Samaria. Kaduana a makigubat ti 32 nga ari agraman dagiti kabalioda ken dagiti luganda a pakigubat.

²Nangibaon kadagiti pannakabagina a mapan ken ni Ahab nga ari ti Israel ket kastoy ti ibagada kenkuana: “Dawaten ni Ari Ben-hadad nga

³isukom kenkuana dagiti pirak ken balitokmo, dagiti assawam ken dagiti kapigsaan nga annakmo.”

⁴“Ibagayo ken Ari Ben-hadad nga apok nga itedko ti kiddawenna; mabalinko nga ited ti bagik ken amin a kukuak,” insungbat ni Ahab.

⁵Iti saan a mabayag, nagsubli ken ni Ahab dagiti naibaon. Adda manen sabali a dawat ni Ben-hadad: “Pinaibagak kenka a masapul nga itedmo kaniak dagiti pirak ken balitokmo, dagiti assawam ken dagiti annakmo.

⁶Ngem ita, ibaonko dagiti ofisialesko a mangsukimat iti palasiom ken dagiti balbalay dagiti ofisialesmo ket alaenda ti amin nga ibilangda a napateg. Addadanto dita iti agarup kastoy nga oras inton bigat.”

⁷Pinaayaban ni Ari Ahab amin dagiti pangulo ti pagilian ket kinunana, “Kitaenyo, kayatnatay a dadaelen daytoy a tao. Pinaibagana a kayatna nga alaen dagiti assawak ken dagiti annakko, dagiti pirak ken balitokko ket immannugotak.”

⁸Insungbat dagiti pangulo ken dagiti tattao, “Saankayo nga umannugot; diyo ikaskaso dayta a tao.”

⁹Ngarud, kastoy ti sungbat ni Ahab kadagiti pannakabagi ni Ben-hadad: “Ibagayo iti apok nga ari a patgak ti umuna a dawatna ngem diak mabalin nga ited daytoy maikadua a kiddawenna.” Pimmanaw dagiti naibaon sada met la nagsubli. Adda manen sabali a paibaga

¹⁰ni Ben-hadad: “Dadaelek daytoy a siudadmo ket ipanawto dagiti tattaok ti amin a batbato ken ladrilio a nakabangonanna. Uray patayendak dagiti didiosen no diak aramiden daytoy!”

¹¹Insungbat ni Ari Ahab, “Ibagayo ken ni Ari Ben-hadad a saan nga agpangas ti pudpudno a soldado no mapan iti paggugubatan.”

¹²Naawat ni Ben-hadad ti sungbat ni Ahab idi madamada nga agiinum kadagiti kakaduana nga agturay iti uneg ti toldada. Binilin ni Ben-hadad dagiti tattaona nga agsaganada a mangraut iti siudad ket nagtungpalda.

¹³Kabayatanna, adda profeta a napan ken ni Ari Ahab ket kinunana, “Imbaga ti Apo a dika agbuteng iti dayta dakkel nga armada. Pagballigiennaka ti Apo ita nga aldaw ket maammoam nga isu ti Apo.”

¹⁴“Siasino ti mangipangulo iti iraraut?” sinaludsod ni Ahab. Insungbat ti profeta, “Kuna ti Apo a dagiti agtutubo a mannakigubat nga adda iti babaen dagiti gobernador.” “Siasino ti mangipangulo iti kadakkelan a bilang ti buyot?” sinaludsod ti ari. “Sika,” insungbat ti profeta.

¹⁵Ngarud, inayaban ti ari dagiti agtutubo a mannakigubat nga adda iti babaen dagiti heneral dagiti probinsia—232 da amin. Inummongna met ti armada ti Israel nga agdagup iti 7,000 a soldado.

¹⁶Rimmautda iti tengnga ti aldaw. Immuna a dimmarup dagiti agtutubo. Madama idi nga agbabartek da Ben-hadad ken dagiti 32 nga ari kadagiti toldada. Dimteng dagiti imbaon ni Ben-hadad a napan nagsiim ket impadamagda nga adda bunggoy ti mannakigubat a rimmuaren iti Samaria.

¹⁷

¹⁸Imbilinna, “Alaenyo ida a sibibiag, umayda man makigubat wenno makikappia.”

¹⁹Immuna ngarud a rimmuar dagiti agtutubo a mannakigubat a sinaruno ti armada dagiti Israelita.

²⁰Pinatay ti tunggal maysa ti kinarangetna. Nagtataray dagiti soldado ti Siria ket kinamat ida dagiti Israelita. Ngem nakalibas ni Ben-hadad a sikakabalio a kinuyog ti sumagmamano a soldado a nagkabalio.

²¹Napan ni Ari Ahab iti paggugubatan, innalana dagiti kabalio ken lugan a pakigubat ket adu ti pinapatayna kadagiti taga-Siria.

²²Kalpasanna, napan ti profeta ken ni Ari Ahab ket kinunana, “Agsublika ket papigsaem ken isaganam a naimbag ti armadam. Planoem a nasayaat ti aramidem gapu ta rumaut manen ti ari ti Siria inton umay a tawen.”

²³Kinuna dagiti ofisiales ni Ari Ben-hadad, “Naparmekdatayo gapu ta didiosen dagiti bambantay dagiti didiosen ti Israel. Ngem awan duadua a parmekentayo dagiti Israelita no gubatentayo ida kadagiti patad.

²⁴Ita, ikkatem dagiti 32 nga ari a pangulo iti gubat ket suktam ida kadagiti heneral.

²⁵Mangbuangayka iti dakdakkel nga armada, kas iti armada a nangpanaw kenka ken buklen iti isu met la a bilang dagiti kabalio ken lugan a pakigubat. Sarangtentayo dagiti Israelita kadagiti tanap ket parmekentayo ida iti daytoy a pannakigubattayo.” Immanamong ni Ari Ben-hadad. Tinungpalna ti pammagbagada.

²⁶Iti sumaruno a tawen, inummongna dagiti tattaona ket nagturongda iti siudad ti Afec tapno rautenda dagiti Israelita.

²⁷Naguummong met dagiti Israelita ket kalpasan a naited dagiti kasapulanda a makigubat, rimmuarda a mangsaranget kadagiti taga-Siria. Nagkampoda iti dua a bunggoy ket arigda iti dua a babassit nga arban ti kalding no maidiligda kadagiti taga-Siria a nagwaras iti away.

²⁸Adda profeta a napan ken ni Ari Ahab ket kinunana, “Kastoy ti kuna ti Apo: ‘Gapu ta ipagarup dagiti taga-Siria a didiosenak dagiti turod ket saan a didiosen kadagiti patad, yawatko iti pannakabalinmo ti dakkel nga armadada ket maammoanyonto kadagiti tattaom a siak ni Yahweh.’”

²⁹Agsinnumbangir ti kampo dagiti taga-Siria ken ti kampo dagiti Israelita. Pito nga aldaw a saan a rimmuar dagiti dua a bunggoy. Iti maikapito nga aldaw, nangrugi ti gubat ket 100,000 a taga-Siria ti pinatay dagiti Israelita.

³⁰Nagkamang dagiti nakalasat iti uneg ti Afec, a nakatayan ti 27,000 kadakuada a natupakan idi marba dagiti bakud ti siudad. Nagkamang met ni Ben-hadad iti uneg ti siudad ket naglemmeng iti akinlikud a kuarto ti maysa a balay.

³¹Napan kenkuana dagiti ofisialesna ket kinunada, “Nadamagmi a manangngaasi dagiti ari nga Israelita. Palubosannakami koma a mapan iti ari ti Israel a sibabarikeskami iti nakersang a lupot ken napulipolan iti tali dagiti tengngedmi ket nalabit a saannaka a patayen.”

³²Ngarud, nagbarikesda iti nakersang a lupot ken nangipulipolda iti tali iti tengngedda sada napan ken ni Ahab ket kinunada, “Ipakpakaasi ni adipenmo a Ben-hadad nga ispalem ti biagna.” Insungbat ni Ahab, “Sibibiag kadi pay laeng? Nasayaat! Ibilangko a kas maysa a kabsat!”

³³Agsapsapul dagiti ofisiales ni Ben-hadad iti napintas a pagilasinan ket idi “kabsat” kuna ni Ahab, kinunada a dagus, “Wen, ni kabsatmo a Ben-hadad!” “Inkay alaen,” imbilin ni Ahab. Idi sumangpet ni Ben-hadad, inawis ni Ahab a makikalugan kenkuana iti luganna a pakigubat.

³⁴Kinuna ni Ben-hadad, “Isublik kenka dagiti ili nga innala daydi amak iti daydi amam ket mabalinmo ti mangipatakder iti sentro ti negosio idiay Damasco a kas iti inaramid daydi amak idiay Samaria.” Insungbat ni Ahab, “Wayawayaanka ngarud gapu kadagitoy a kondision.” Nagaramidda iti katulagan a nagfinnirmaanda ket pinalubosanna ni Ben-hadad.

³⁵Binilin ni Yahweh ti maysa a kameng ti gunglo dagiti profeta ket kinuna ti maysa a profeta iti padana a profeta, “Kabilennak!” Ngem saan a kinayat ti profeta,

³⁶isu a kinunana kenkuana, “Gapu ta sinalungasingmo ti bilin ti Apo, patayennaka ti maysa a leon apaman a makapanawka iti yanko.” Apaman a nakapanaw, adda dimteng a leon ket pinatayna ti profeta.

³⁷Adda sabali a tao a nasarakan ti isu met la a profeta ket kinunana, “Kabilennak.” Kinabil ngarud ti lalaki ket nasugatan ti profeta.

³⁸Binarabadan ti profeta ti rupana iti lupot tapno awan ti makailasin kenkuana. Napan iti igid ti dalan a mangur-uray iti ari ti Israel.

³⁹Idi lumabas ti ari, inawagan ti profeta ket kinunana, “Natan-ok nga Ari, madamaak a makigubgubat idi inyeg kaniak ti maysa a soldado ti maysa a kabusor a natiliwda ket kinunana, ‘Guardiaam daytoy a tao; no makalibas, ta biagmo ti pagbayadmo wenno agmultaka iti 3,000 a bagi ti pirak.’

⁴⁰Ngem adu ti nakakumikomak ket nakalibas ti lalaki.” Insungbat ti ari, “Naipakaammomon ti sentensiam ket masapul a madusaka.”

⁴¹Dinagdagus ti profeta nga inikkat ti lupot a naibarabad iti rupana ket nabigbig ti ari a maysa kadagiti profeta ti kasangsangona.

⁴²Kinuna ti profeta iti ari, “Kastoy ti sao ti Apo: ‘Gapu ta impalubosmo nga aglibas ti tao nga imbilinko a mapapatay, ta biagmo ti pagbayadmo ket madadaelto ti armadam gapu ta binay-am a makatalaw ti armadana.’”

⁴³Mariribuk ken madandanagan ti ari idi agawid idiay Samaria.