Read Iloko 1 Kings 22 Bible Online

1 Kings 22 - Iloko bible

1 Kings 22

¹Tallo a tawen nga adda kappia iti nagbaetan ti Israel ken Siria.

²Ngem iti maikatlo a tawen, napan kinita ni Jehosafat nga ari ti Juda ni Ahab nga ari ti Israel.

³Sinaludsod ni Ahab kadagiti ofisialesna, “Kukuatayo ti Ramot idiay Galaad. Apay nga awan pay inaramidtayo tapno isubli ti ari ti Siria kadatayo?”

⁴Ket kinuna ni Ahab ken ni Jehosafat, “Kayatmo kadi ti kumuyog kaniak a mangraut iti Ramot?” “Madadaanak inton nakasaganaka,” insungbat ni Jehosafat, “kasta met dagiti soldadok ken dagiti soldado a nagkabalio.

⁵Ngem umuna pay a makiumanka iti Apo.”

⁶Inayaban ni Ahab dagiti profeta—agarup uppat a gasutda—ket sinaludsod ti ari, “Rumbeng ngata a rautek ti Ramot?” “Rautem, pagballigiennaka ti Apo,” insungbatda.

⁷Ngem sinaludsod ni Jehosafat, “Awan kadin sabali a profeta a mabalin a pakiumanan iti Apo?”

⁸“Adda pay maysa,” insungbat ni Ahab. “Isu ni Micaias nga anak ni Imla. Ngem kagurgurak ta awan pay naimbag nga impadtona maipapan kaniak; pasig a dakes.” “Saan a rumbeng a sawem dayta!” kinuna ni Jehosafat.

⁹Ngarud, inayaban ni Ari Ahab ti maysa nga ofisial nga agserserbi kenkuana ket binilinna a dagdagusenna a mapan alaen ni Micaias.

¹⁰Adda dagiti dua nga ari iti pagirikan iti ruar ti ruangan ti Samaria. Agtutugawda iti bukodda a trono ken sikakawesda iti pagan-anayda a kas ari. Iti sangoananda, agipadpadto dagiti amin a profeta.

¹¹Maysa kadagiti profeta, ni Zedekias nga anak ni Kenaana, ti nangaramid kadagiti sinan-sara a landok ket kinunana ken ni Ahab, “Kastoy ti sao ti Apo: ‘Dagitoyto ti aramatem a pakigubat kadagiti taga-Siria agingga a maparmekmo ida.’”

¹²Kasta met ti imbaga dagiti dadduma a profeta. “Rautem ti Ramot ket agballigika,” kinunada. “Pagballigiennaka ti Apo.”

¹³Kabayatanna, kinuna ti naibaon a mangala ken ni Micaias, “Sangsangkamaysa dagiti profeta nga agkuna nga agballigi ti ari. Masapul a kasta met ti sawem.”

¹⁴Ngem insungbat ni Micaias, “Isapatak iti nagan ti sibibiag nga Apo a no ania ti sawen ti Apo, isu ti sawek.”

¹⁵Idi dumatag ti profeta iti ari, sinaludsod kenkuana ti ari, “Micaias, rumbeng kadi wenno saan a rautenmi ken ni Ari Jehosafat ti Ramot?” “Inka rauten. Awan duadua nga agballigika. Pagballigiennakanto ti Apo,” insungbat ni Micaias.

¹⁶Ngem kinuna ni Ahab, “Namin-anon nga imbagak kenka a ti laeng pudno ti sawem kaniak iti nagan ti Apo?”

¹⁷Simmungbat ni Micaias, “Nakitak dagiti Israelita a nawarawara kadagiti turod. Kasda la karnero nga awan ti mangipastor kadakuada. Ket kinuna ti Apo, ‘Awan ti pangulo dagitoy a tattao; pagawidem nga awan ti pakaan-anoanda.’”

¹⁸Kinuna ni Ahab ken ni Jehosafat, “Kitaem, imbagak kenka nga awan ti ipadto ni Micaias a naimbag maipapan kaniak; bin-ig a dakes!”

¹⁹Intuloy ni Micaias, “Ita, denggem ti sao ti Apo! Nakitak ti Apo nga agtugtugaw iti tronona sadi langit; agtatakder dagiti anghelesna iti abayna.

²⁰Sinaludsod ti Apo, ‘Siasino kadakayo ti mangallilaw ken ni Ahab tapno mapan idiay Ramot ket matay sadiay?’ Nagduduma ti sinao dagiti angheles.

²¹Idi agangay, adda maysa nga espiritu a nagpasango, inasitganna ti Apo ket kinunana, ‘Siak ti mangallilaw kenkuana.’

²²‘Kasano?’ sinaludsod ti Apo. Insungbat ti espiritu, ‘Innak kadagiti profeta ni Ahab ket pagulbodek ida amin.’ Kinuna ti Apo, ‘Inka ngaruden. Agballigikanto a mangallilaw kenkuana.’”

²³Ket inggibus ni Micaias, “Daytoy ti naaramid. Pinagulbod ti Apo dagitoy a profetam. Mismo a ti Apo ti nangituyang iti pannakadidigram!”

²⁴Inasitgan ni Zedekias ni Micaias sana tinungpa ket kinunana, “Kasano a rimmuar kaniak ti espiritu ti Apo tapno agsao kenka?”

²⁵“Maammoamto inton inka aglemmeng iti akinlikud a kuarto ti maysa a balay,” kinuna ni Micaias.

²⁶Kalpasanna, binilin ni Ari Ahab ti maysa kadagiti ofisialesna: “Tiliwem ni Micaias ket idatagmo iti mangituray iti siudad, ni Amon ken ni Prinsipe Joas.

²⁷Ibagam kadakuada nga ipisokda iti pagbaludan ket tinapay ken danum laeng ti ipakanda kenkuana agingga nga agsubliak a sikakaradkad.”

²⁸“No agsublika nga awan ti dakes a napasamakmo,” kinuna ni Micaias, “dayta ti pakakitaan a saan a nagsao kaniak ti Apo!” Ket innayonna, “Tunggal maysa kadakayo, denggenyo ti imbagak!”

²⁹Nagkuyog ni Ahab nga ari ti Israel ken ni Jehosafat nga ari ti Juda a napan nangraut iti Ramot idiay Galaad.

³⁰Kinuna ni Ahab ken ni Jehosafat, “Manglimlimoak a makigubat ngem agkaweska a kas ari.” Nanglimlimo ngarud ti ari ti Israel ket napan iti paggugubatan.

³¹Binilin idi ti ari ti Siria dagiti 32 a pangulo dagiti lugan a pakigubat a dida makiranget iti siasinoman malaksid ti ari ti Israel.

³²Ngarud, idi makitada ni Ari Jehosafat impagarupda nga isu ti ari ti Israel ket dinarupda a dagus. Ngem idi nagriaw ni Jehosafat,

³³naammirisda a saan nga isu ti ari ti Israel ket insardengda a kinamat.

³⁴Ngem adda mannakigubat a Siriano a nangipasaksak iti panana ket napuntaanna ni Ari Ahab iti nagsaipan ti kabalna. “Nasugatanak!” inriaw ti ari iti mangiturturong iti luganna a pakigubat ket imbilinna nga umadayoda iti paggugubatan.

³⁵Iti kangitingitan ti gubat, nagtalinaed a sisasadag ni Ari Ahab iti luganna a sumangsango kadagiti Siriano. Nagayus ti dara ti sugatna ket nalapunos ti datar ti luganna a pakigubat. Natay ti ari idi dumteng ti sumipnget.

³⁶Idi dandani lumnek ti init, adda bilin a naipaulog iti armada ti Israel, “Tunggal maysa agawid iti bukodna a pagilian ken siudad!”

³⁷Natay ngarud ni Ari Ahab. Naipan ti bangkayna idiay Samaria a nangitanemanda kenkuana.

³⁸Dinalusanda ti luganna iti pagdigosan idiay Samaria. Sadiay, dinilpatan dagiti aso ti darana ken nagbuggoan met dagiti balangkantis a babbai, kas imbaga ni Yahweh a maaramid.

³⁹Nailanad iti Pakasaritaan dagiti Ari ti Israel ti dadduma a pasamak iti panagturay ni Ari Ahab, agraman ti pakasaritaan ti marfil a palasiona ken amin a siudad a binangonna.

⁴⁰Idi natay, ni Ahazias nga anakna ti simmukat kenkuana nga ari.

⁴¹Iti maikapat a tawen a panagturay ni Ahab nga ari ti Israel, naisaad ni Jehosafat nga anak ni Asa nga ari ti Juda.

⁴²Tallopulo ket lima idi ti tawen ni Jehosafat ket nagturay idiay Jerusalem iti 25 a tawen. Ni Azuba nga anak ni Silai ti inana.

⁴³Kas iti daydi Asa nga amana, nalinteg iti imatang ni Yahweh. Ngem dina dinadael dagiti pagdaydayawan ket intultuloy dagiti tattao ti nagidatag iti daton ken agpuor iti insenso sadiay.

⁴⁴Nakikappia ni Jehosafat iti ari ti Israel.

⁴⁵Nailanad iti Pakasaritaan dagiti Ari ti Juda ti dadduma a pasamak iti panagturay ni Jehosafat, dagiti gapuananna a mangipakita iti kinaturedna ken dagiti nakigubgubatanna.

⁴⁶Pinagtalawna dagiti natda a lallaki ken babbai a balangkantis a nagtalinaed a nagserbi kadagiti altar a pagdaydayawan dagiti pagano uray idi kalpasan ti panagturay ni Asa nga amana.

⁴⁷Awan ti ari ti Edom kadagidi a panawen; nagturay sadiay ti pannakabagi ti ari ti Juda.

⁴⁸Nagpaaramid ni Ari Jehosafat iti adu a barko a para biahe tapno aggatang iti balitok idiay Ofir ngem pulos a dida naglayag ta narbada idiay Eziongeber.

⁴⁹Iti daydi a tiempo, insingasing ni Ahazias nga ari ti Israel a makipaglayag dagiti tattaona kadagiti tattao ni Jehosafat ngem saan a kinayat ni Jehosafat.

⁵⁰Natay ni Jehosafat ket naitanem idiay Jerusalem. Ni Jehoram nga anakna ti simmukat kenkuana a kas ari.

⁵¹Iti maika-17 a tawen a panagturay ni Jehosafat nga ari ti Juda, naisaad ni Ahazias nga anak ni Ahab nga ari ti Israel ket dua a tawen a nagturay idiay Samaria.

⁵²Nagbasol ken ni Yahweh. Tinuladna dagiti dakes nga aramid daydi amana nga Ahab, ni Jezebel nga inana, ken daydi Ari Jeroboam a nangisungsong kadagiti Israelita nga agbasol.

⁵³Nagdaydayaw ken nagserbi ken ni didiosen a Baal ket kas iti daydi amana a sinarunona a nagturay, pinagpungtotna ni Yahweh a Dios ti Israel.