Read Iloko 1 Kings 3 Bible Online

1 Kings 3 - Iloko bible

1 Kings 3

¹Nakikappon ni Solomon iti ari ti Egipto babaen iti panangasawana iti anak ti ari. Inyawid ni Solomon ti asawana ket pinagnaedna iti Siudad ni David bayat ti pannakabangon ti palasiona, ti Templo ken ti bakud ti siudad.

²Awan pay idi ti templo a nabangon a pagdaydayawan ken ni Yahweh. Agidatdaton pay laeng dagiti tattao kadagiti sakrifisio iti nadumaduma nga altar.

³Ipatpateg ni Solomon ni Yahweh ket tinungpalna dagiti bilin daydi amana a David. Ngem nagparti met kadagiti animal ket indatagna dagitoy a kas daton a mapuoran iti nadumaduma nga altar.

⁴Naminsan, napan ni Solomon idiay Gabaon tapno agidatag kadagiti sakrifisio gapu ta adda sadiay ti kalatakan nga altar. Iti napalabas, ginasgasut nga animal ti pinuoranna sadiay a kas daton.

⁵Iti dayta a rabii, nagparang ni Yahweh kenkuana iti maysa a tagtagainep ket sinaludsodna, “Ania ti kayatmo nga itedko kenka?”

⁶Simmungbat ni Solomon, “Imparparangarangmo ti natan-ok nga ayatmo ken ni adipenmo a David nga amak, gapu ta napudno kenka, naimbag ken nalinteg a tao. Intultuloymo nga imparangarang kenkuana ti natan-ok ken di agbalbaliw nga ayatmo. Pinaraburam iti anak a madama ita nga agturay iti lugarna.

⁷O Apo a Dios, insaadnak nga ari a kas sukat daydi amak uray no ubingak unay ket awan pay ammok maipapan iti panagturay.

⁸Addaak iti sidong dagiti pinilim a tattaom, isuda a saan a mabilang ti kaaduda.

⁹Ikkannak ngarud iti sirib a kasapulak tapno nalinteg ti panangiturayko kadagiti tattaom ken tapno ammok a paggiddiaten ti dakes ken naimbag. No dinak ikkan, kasano a kabaelak ti mangituray kadagiti nakaad-adu a tattaom?”

¹⁰Naragsakan ni Yahweh ta daytoy ti dinawat ni Solomon

¹¹ket kinunana kenkuana, “Agsipud ta kinasirib a mangituray a sililinteg ti dinawatmo a saan ketdi a ti atiddog a panagbiag wenno kinabaknang wenno ti biag dagiti kabusormo,

¹²itedko ti dinawatmo. Paraburanka iti kinasirib ken pannakaawat. Awanen ti masirsirib ngem sika ket awanto metten ti tumaud a masirsirib.

¹³Itedko pay kenka ti saanmo a dinawat! Iti urnos ti panagbiagmo, ikkanka iti sanikua ken dayaw a saan a maartapan ti siasinoman nga ari.

¹⁴No agtulnogka kaniak a kas iti daydi amam a David ket tungpalem dagiti linteg ken bilinko, ikkanka iti atiddog a panagbiag.”

¹⁵Nakariing ni Solomon ket nabigbigna a nagsao kenkuana ti Dios iti maysa a tagtagainep. Idi nagsubli idiay Jerusalem, napan iti sangoanan ti Lakasa ti Tulag ni Yahweh ket nagidatag kadagiti daton a mapuoran ken daton a pakikappia. Kalpasanna, pinadayaanna dagiti amin nga ofisialesna.

¹⁶Naminsan, adda dua a balangkantis a babbai a napan dimmatag ken ni Ari Solomon.

¹⁷Kinuna ti maysa kadakuada, “Natan-ok nga Ari, kaduak daytoy a babai nga agnaed iti maymaysa a balay. Adda idi agpasngayak iti maladaga a lalaki.

¹⁸Tallo nga aldaw kalpasan ti panagpasngayko, nangipasngay met iti lalaki. Dakdakami laeng a dua ti adda iti balay.

¹⁹Iti maysa a rabii, naaddaganna ti anakna ket natay ti ubing.

²⁰Bimmangon iti dayta met la a rabii ket immayna innala ti anakko sana impan iti iddana. Insukatna ti natay nga anakna iti sibibiag nga anakko.

²¹Kabigatanna, idi makariingak ket pasusoek koma ti anakko, nakitak a natay met gayam. Ngem idi miningmingak a nalaing, nabigbigko a saan nga isu ti anakko.”

²²“Saan nga agpayso dayta!” insungbat ti sabali a babai. “Anakko ti sibibiag. Anakmo ti natay!” Kinuna ti umuna a babai, “Saan! Anakmo ti natay. Siak ti akin-anak iti sibibiag!” Ket kastoy ti panagsinnuppiatda iti sangoanan ti ari.

²³Kinuna ni Ari Solomon, “Agpadpadakayo nga agkuna nga anakna ti sibibiag a maladaga. Ngem awan ti mangannugot nga anakna ti natay.”

²⁴Nagpaala ti ari iti kampilan. Idi mayeg ti kampilan,

²⁵imbilinna a magudua ti maladaga; maited ti kagudua iti maysa a babai ket ti maysa a kagudua iti sabali.

²⁶Gapu iti ayat ti pudno nga ina iti anakna, kinunana iti ari, “Natan-ok nga Ari, pangngaasim ta dimo papatayen ti ubing! Itedmo laengen kenkuana!” Ngem kinuna ti maysa, “Dimo ited ti ubing iti uray siasino kadakami. Sige, guduaem.”

²⁷Kinuna ngarud ti ari, “Diyo patayen ti maladaga! Itedyo iti immuna a babai—isu ti pudpudno nga inana.”

²⁸Idi madamag dagiti Israelita ti pangngeddeng ti ari, napalalo ti panagraemda kenkuana ta nabigbigda nga inikkan ti Dios iti sirib a mangrisut kadagiti darum nga awan idumdumana.