Read Iloko 1 Kings 9 Bible Online

1 Kings 9 - Iloko bible

1 Kings 9

¹Kalpasan ti panangbangon ni Solomon iti Templo ken ti palasio agraman dagiti amin a kayatna a bangonen,

²nagparang manen ni Yahweh kenkuana a kas iti panagparangna idi idiay Gabaon.

³Kinuna ni Yahweh, “Nangngegko ti kararagmo. Ikonsagrarko daytoy a Templo a binangonmo a pagdaydayawan kaniak dagiti tattao iti agnanayon. Aywanak ken salaknibak daytoy a templo iti agnanayon.

⁴Ita, no agserbika kaniak a kas iti daydi amam a David, ket buyogam iti kinatakneng ken kinapudno ket tungpalem amin a bilinko kenka ken agtulnogka kadagiti lintegko,

⁵tungpalek ti inkarik idi ken ni David nga amam idi imbagak kenkuana nga addanto kaputotanna a mangituray iti Israel iti agnanayon.

⁶Ngem no tallikudandak, sika wenno dagiti kaputotam, no diyo tungpalen dagiti bilin ken linteg nga ipaalagadko kadakayo, ket agserbi ken agdaydayawkayo kadagiti didiosen,

⁷pagtalawekto dagiti tattaok nga Israelita iti daga nga intedko kadakuada. Baybay-akto daytoy a Templo a kinonsagrarko a pagdaydayawan dagiti tattao kaniak. Sarsaritaendanto ti Israel ket lalaisento dagiti tattao iti amin a lugar.

⁸Agbalinto daytoy a Templo a gabsuon ti bato ket masdaaw ken makigtotto dagiti amin nga aglabas. Kunadanto, ‘Apay a kastoy ti inaramid ti Apo iti daytoy a daga ken iti daytoy a Templo?’

⁹Ket isungbatto dagiti dadduma, ‘Gapu ta binaybay-an dagiti tattao ti Apo a Diosda a nangiruar kadagiti kapuonanda iti daga ti Egipto. Insapatada ti kinapudnoda kadagiti didiosen ket nagdaydayaw ken nagserbida kadakuada. Daytoy ti gapuna nga indissuor ti Apo daytoy a didigra kadakuada.’”

¹⁰Duapulo a tawen a binangon ni Solomon ti Templo ken ti palasiona.

¹¹Ni Hiram nga ari ti Tiro ti nangted idi iti amin a kayo ti sedro ken saleng, ken amin a balitok a masapul iti daytoy a trabaho. Idi malpas dagiti patakder, inikkan ni Solomon ni Hiram iti duapulo a siudad iti sakup ti Galilea.

¹²Ngem idi makita ni Hiram dagiti siudad, dina nagustoan dagitoy

¹³ket kinunana ken ni Solomon: “Kastoy met gayam, kabsat, dagiti siudad nga intedmo kaniak!” Gapu iti daytoy, maaw-awagan pay laeng daytoy a daga iti Cabul.

¹⁴Nangited idi ni Hiram iti dandani lima a tonelada a balitok ken ni Solomon.

¹⁵Daytoy ti pakasaritaan ti inkapilitan a panagtrabaho nga imbilin ni Solomon kadagiti umili tapno mabangon ti Templo, ti palasio, ken ti bakud ti siudad, tapno magaburan ti akindaya a paset ti siudad, ken tapno matarimaan dagiti ili ti Hasor, Megiddo ken Gezer. (

¹⁶Rinaut idi ti ari ti Egipto ti Gezer, sinakupna ti siudad, pinatayna dagiti umili sana pinuoran ti siudad. Kalpasanna, intedna ti Gezer a kas regalona iti anakna idi nagkasarda ken ni Solomon.

¹⁷Tinarimaan ni Solomon ti siudad.) Inkapilitan met ti panagtrabaho dagiti tattao idi tarimaanenda ti Akimbaba a Bet-horon,

¹⁸Baalat, Tamar nga adda iti let-ang ti Juda,

¹⁹dagiti siudad a nakaidulinan dagiti abastona, dagiti siudad nga ayan dagiti kabalio ken dagiti luganna a pakigubat ken amin a kayatna a bangonen iti Jerusalem, Libano, ken iti sadinoman a lugar iti pagarianna.

²⁰Iti inkapilitan a panagtrabaho, inaramat ni Solomon dagiti kaputotan dagiti tattao ti Canaan a saan a pinapatay dagiti Israelita idi innalada ti dagada—dagiti Amorreo, Heteo, Perezeo, Heveo ken Jebuseo. Tagabu pay laeng dagiti kaputotanda agpapan ita.

²²Awan Israelita a tinagabu ni Solomon. Nagserbida kenkuana a soldado, ofisiales, kapitan a mangimaton kadagiti lugan a pakigubat ken dagiti nakakabalio a mannakigubat.

²³Adda met dagiti kapatas—550 amin a mangimaton kadagiti trabahador iti nadumaduma a proyekto ni Solomon.

²⁴Idi malpas ti palasio a pinaaramidna a pagnaedan ti asawana nga anak ti ari ti Egipto. Innalana manipud iti Siudad ni David sana pinagnaed iti palasio. Kalpasanna, ginaburanna ti akindaya a paset ti siudad.

²⁵Mamitlo iti makatawen nga agidatag ni Solomon kadagiti daton a mapuoran ken daton a pakikappia iti altar a binangonna a maipaay ken ni Yahweh. Nagpuor met iti insenso iti imatang ni Yahweh. Ket nalpas ni Solomon ti Templo.

²⁶Nagpaaramid met ni Solomon iti adu a barko idiay Eziongeber. Adda daytoy a siudad iti igid ti Baybay ti Aqaba iti asideg ti Elat idiay Edom.

²⁷Imbaon ni Ari Hiram ti sumagmamano a tripulantena a makapagserbi kadagiti tattao ni Solomon.

²⁸Naglayagda a napan idiay Ofir, ket idi agsublida, nangyawidda iti dandani 16 a tonelada a balitok nga agpaay ken ni Solomon.