Read Iloko 2 Kings 10 Bible Online

2 Kings 10 - Iloko bible

2 Kings 10

¹Adda 70 a lallaki nga annak ni Ari Ahab nga agnanaed iti siudad ti Samaria. Nagsurat ni Jehu ket pinatulodanna ti kopia dagiti agturay iti siudad, dagiti mabigbigbig nga umili ken dagiti mangay-aywan kadagiti kaputotan ni Ahab. Kastoy ti nailanad iti surat:

²“Dakayo ti mangay-aywan kadagiti annak ni Ahab, ket naitalek kadakayo dagiti lugan a pakigubat, kabalio, armas ken dagiti nasarikedkedan a siudad. Apaman a maawatyo daytoy a surat,

³pilienyo ti kasayaatan ken makabael nga agturay kadagiti annak ti ari, isaadyo a kas ari, ket makigubatkayo a mangsalaknib kenkuana.”

⁴Kasta unay ti buteng dagiti agturay ti Samaria. “Kasano a maparmektayo ni Jehu?” kinunada. “Di pay nabaelan a pinarmek ni Ari Joram wenno ni Ari Ahazias!”

⁵Iti kasta, kastoy ti pinaibaga ti ofisial a mangay-aywan iti palasio ken ti agturay iti siudad, agraman dagiti mabigbigbig nga umili ken dagiti agay-aywan kadagiti kaputotan ti ari: “Adipennakami, Jehu, sidadaankami nga agtungpal iti aniaman nga ibilinmo. Ngem dimi mabalin nga isaad ti siasinoman a kas ari; aramidem ngarud ti ammom a nasayaat.”

⁶Nagsurat manen ni Jehu kadakuada: “No makikaduakayo kaniak, ket madadaankayo nga agtungpal iti bilinko, yegyo kaniak dagiti ulo dagiti annak ni Ari Ahab iti kastoy nga oras inton bigat ditoy Jezreel.” Adda dagiti 70 nga annak ni Ari Ahab iti aywan dagiti mabigbigbig nga umili ti siudad a mangtartaraken kadakuada.

⁷Apaman a naawatda ti surat ni Jehu, pinatay dagiti pangulo nga umili ti Samaria dagiti 70 nga annak ni Ahab. Inkabilda dagiti ulo kadagiti basket sada impan ken ni Jehu idiay Jezreel.

⁸Idi maibaga ken ni Jehu a naisangpeten dagiti ulo dagiti annak ni Ahab, imbilinna a pagkaduaenda nga igabsuon dagiti ulo iti ruangan ti siudad ket bay-anda sadiay agingga iti bigat.

⁹Kabigatanna, napan ni Jehu iti ruangan ket kinunana kadagiti tattao nga adda sadiay, “Siak ti nangisikat ken nangpatay ken ni Ari Joram; awan ti basolyo iti pannakapapatayna. Ngem siasino ti nangpapatay kadagitoy a tattao?

¹⁰Daytoy ti mangipaneknek a pumudno ti amin nga imbaga ti Apo maipapan kadagiti kaputotan ni Ahab. Tinungpal ti Apo ti imbagana ken ni profeta Elias.”

¹¹Kalpasanna, pinapapatay ni Jehu dagiti amin a kabagian ni Ahab nga agnaed idiay Jezreel ken amin nga ofisialesna ken dagiti nasinged a gagayyemna agraman dagiti papadi; awan ti uray maysa kadakuada a natda a sibibiag.

¹²Pimmanaw ni Jehu idiay Jezreel ket napan idiay Samaria. Iti dalan, iti lugar a managan “Kampo dagiti Agpaspastor,”

¹³nasabatna ti sumagmamano a kabagian daydi Ahazias nga ari ti Juda. Sinaludsod ni Jehu no siasinoda. “Kakabagiannakami ni Ahazias,” insungbatda. “Mapankam idiay Jezreel tapno sarungkaranmi dagiti annak ni Reyna Jezebel ken dagiti dadduma a kameng ti familia ti ari.”

¹⁴Pinatiliw ida ni Jehu sana pinapatay ida iti asideg ti maysa a bubon sadiay. Agdagupda iti 42. Napapatayda amin ket awan ti uray maysa a nabati a sibibiag.

¹⁵Intuloy ni Jehu ti panagdaliasatna. Iti dalan, nasabatna ni Jonadab nga anak ni Rekab. Kinablaawan ni Jehu ket kinunana, “Agkapanunotanta. Agkaduata met la kadi?” “Wen,” insungbat ni Jonadab. “Yawatmo ngarud ta imam,” kinuna ni Jehu. Pinetpetan ni Jehu ti imana ket tinulonganna ni Jonadab a lumugan iti luganna a pakigubat.

¹⁶Kinuna ni Jehu, “Sumurotka kaniak tapno makitam ti kinapudnok iti Apo.” Ket nagkaluganda a napan idiay Samaria.

¹⁷Idi dumtengda sadiay, pinatay ni Jehu ti amin a kakabagian ni Ahab; awan ti inispalna. Daytoy ti imbaga idi ni Yahweh babaen ken ni Elias.

¹⁸Inummong ni Jehu dagiti amin a tattao ti Samaria ket kinunana, “Nagserbi ni Ari Ahab ken ni didiosen a Baal ngem napaspasnek ti panagserbik kenkuana.

¹⁹Ayabanyo dagiti amin a profeta ni Baal, amin nga agdaydayaw kenkuana ken amin a papadina. Masapul nga umayda amin. Mangipaayak iti nangayed a panagidaton ken ni Baal ket mapapatay ti siasinoman a saan a tumabuno.” (Inaramid ni Jehu daytoy a pangsikapna kadakuada tapno mapapatay dagiti amin nga agdaydayaw ken ni Baal.)

²⁰Kalpasanna, imbilin ni Jehu, “Mangangaykayo iti maysa a gimong ti panagdaydayaw a pammadayaw ken ni Baal!” Naiwaragawag ti bilin

²¹ket pinakaammoan ni Jehu dagiti amin a tattao ti Israel. Timmabuno amin nga agdaydayaw ken ni Baal. Napanda amin iti templo ni Baal; napusek ti templo.

²²Binilin ni Jehu ti padi nga agay-aywan kadagiti nasagradoan a pagan-anay nga iruarna dagiti kawes ket itedna kadagiti agdaydayaw.

²³Kalpasanna, simrek ni Jehu iti templo a kaduana ni Jonadab nga anak ni Rekab ket kinunana kadagiti tattao sadiay, “Kitaenyo a naimbag a dagiti la agdaydayaw ken ni Baal ti adda ditoy ket awan ti simrek nga agdaydayaw iti Apo.”

²⁴Immuneg da Jehu ken ni Jonadab tapno agidatagda kadagiti sakrifisio ken daton a mapuoran ken ni Baal. Sakbay daytoy nangdutok ni Jehu iti 80 a lallaki nga agbantay iti ruar ket imbilinna kadakuada, “Patayenyo amin dagitoy a tattao. Mapapatay ti siasinoman kadakayo a mangipalubos nga adda makalibas!”

²⁵Kalpasan ti panangidatag ni Jehu kadagiti daton, kinunana kadagiti guardia ken kadagiti ofisiales, “Sumrekkayo ket papatayenyo amin ida: Diyo ipalubos nga adda makalibas!” Simrekda a siaasut dagiti kampilanda ket pinapatayda amin ida sada ginuyod nga inruar dagiti bangkay. Simrekda iti akin-uneg a kuarto,

²⁶inruarda ti nasagradoan nga adigi ket pinuoranda.

²⁷Dinadaelda ti adigi ni Baal ken ti templona ket inaramidda a kasilia ket kastana pay laeng agpapan ita.

²⁸Kastoy ti panangikkat a namimpinsan ni Jehu iti panagdaydayaw ken ni Baal iti Israel.

²⁹Ngem tinuladna dagiti aramid ni Ari Jeroboam a nangisungsong iti Israel nga agdaydayaw kadagiti balitok a sinan-baka a pagdaydayawan idiay Betel ken Dan.

³⁰Kinuna ni Yahweh ken ni Jehu, “Inaramidmo kadagiti kaputotan ni Ahab ti amin a kayatko nga aramidem. Ngarud, ikarik kenka nga agarinto dagiti kaputotam iti Israel agingga iti maikapat a kaputotan.”

³¹Ngem saan a napasnek ni Jehu iti panangtungpalna iti Linteg ni Yahweh a Dios ti Israel. Tinuladna ketdi ti aramid ni Jeroboam a nangisungsong kadagiti Israelita nga agbasol.

³²Kadagidi a tiempo, rinugian ni Yahweh a pinabassit ti sakup ti Israel. Sinakup ni Hazael nga ari ti Siria dagiti amin a daga dagiti Israelita

³³iti daya ti Jordan agingga iti abagatan iti ili ti Aroer iti Karayan Arnon. Mairaman ditoy dagiti daga ti Galaad ken Basan a pagnaedan dagiti tribu ti Gad, Ruben ken Manases.

³⁴Nailanad iti Pakasaritaan dagiti Ari ti Israel ti dadduma a pasamak ti panagturay ni Jehu agraman dagiti aramid a mangipakita iti kinamaingelna.

³⁵Idi natay, naitabon idiay Samaria ket ni anakna a Joacaz ti simmukat kenkuana nga ari.

³⁶Kas ari ti Israel, 28 a tawen a nagturay ni Jehu idiay Samaria.