Read Iloko 2 Kings 11 Bible Online

2 Kings 11 - Iloko bible

2 Kings 11

¹Apaman a naammoan ni Atalia nga ina ni Ari Ahazias a napapatay ti anakna, pinapapatayna met dagiti amin a kameng ti familia ti ari.

²Ni laeng Joas nga anak ni Ahazias ti nakalibas. Dandani nairaman a napapatay ni Joas ngem inispal ti ikitna, ni Josaba nga anak ni Ari Jehoram ken kabsat ni Ahazias iti ama. Impanna ni Joas agraman ti mangay-aywan kenkuana iti maysa a kuarto iti Templo ket inlemmengna ken ni Atalia isut' gapuna a saan a nairaman a napapatay.

³Innem a tawen a tinaripatona ti ubing ket inlemmengna iti Templo bayat ti panangituray ni Atalia iti pagilian.

⁴Ngem iti maikapito a tawen, pinaayaban ni Jehoyada a padi dagiti ofisiales a mangipangulo kadagiti guardia ti ari ken kadagiti guardia ti palasio. Inummongna ida iti Templo ket pinagsapatana ida nga umanamongda iti planona. Kalpasanna, indatagna kadakuada ni Joas nga anak ni Ari Ahazias

⁵ket kastoy ti imbilinna, “No umaykayonto agguardia iti Aldaw a Panaginana, agguardianto ti apagkatlo kadakayo iti palasio;

⁶agguardianto ti sabali nga apagkatlo iti Ruangan ti Sur ket ti maysa nga apagkatlo iti ruangan iti likudan dagiti dadduma a guardia.

⁷Agguardia iti Templo dagiti dua a bunggoy a saan nga agtrabaho iti Aldaw a Panaginana tapno salaknibanda ti ari.

⁸Masapul a guardiaanyo ni Ari Joas a siaasut dagiti kampilanyo ket surotenyo iti sadinoman a papananna. Mapapatay ti siasinoman nga umasideg kadakayo.”

⁹Tinungpal dagiti ofisiales ti bilin ni Jehoyada ket impanda kenkuana dagiti tattaoda—dagiti saan nga agguardia iti Aldaw a Panaginana ken dagiti agguardia iti dayta nga aldaw.

¹⁰Intedna kadagiti ofisiales dagiti pika ken dagiti kalasag a kukua idi ni Ari David ken naidulin iti Templo.

¹¹Pinagpuestona dagiti mannakigubat a siaasut ti kampilanda. Linikmutda ti akindaya a paset ti Templo tapno salaknibanda ti ari.

¹²Inruar ni Jehoyada ni Joas, insaadna ti korona iti ulona ket inikkanna iti libro maipapan iti panagturay ti ari. Kalpasanna, nakonsagrar ni Joas ket naipakdaar nga ari. Nagtitipat dagiti tattao ket indir-ida, “Agbiag ti ari!”

¹³Nangngeg ni Reyna Atalia ti arimbangaw dagiti guardia ken dagiti tattao isut' gapuna a nagdardaras a napan iti Templo a nakauummongan dagiti tattao.

¹⁴Nakitana ti baro nga ari nga agtaktakder iti abay ti adigi iti ruangan ti Templo a kas kaugalian. Linawlaw dagiti ofisiales ken dagiti agpuypuyot iti trumpeta; agdirdir-i dagiti tattao ket mangngeg ti uni dagiti trumpeta. Rinay-ab ni Atalia ti pagan-anayna iti danagna sana impukkaw, “Panangliput daytoy! Panangliput daytoy!”

¹⁵Gapu ta saan a kayat ni Jehoyada a mapapatay ni Atalia iti uneg ti Templo, imbilinna kadagiti ofisiales ti armada, “Iruaryo iti baet dagiti guardia ket patayenyo ti siasinoman nga agpanggep a mangikaluya kenkuana.”

¹⁶Tiniliwda ni Atalia, nagnada iti Ruangan ti Kabalio sada impan iti palasio ket pinapatayda sadiay.

¹⁷Nangaramid ni Jehoyada iti katulagan a nangikarian ti ari ken dagiti tattao nga agbalinda a tattao ni Yahweh. Nangaramid met iti katulagan ti ari ken dagiti tattao.

¹⁸Kalpasanna, rinakrak dagiti tattao ti templo ni Baal. Binurburakda dagiti altar ken dagiti imahen sada pinatay ni Mattan, ti padi ni Baal, iti sango dagiti altar. Nangikabil ni Jehoyada kadagiti mangguardia iti Templo.

¹⁹Kalpasanna, inummongna dagiti ofisiales, dagiti guardia ti ari ken dagiti guardia ti palasio ket innalada ti ari iti Templo sada kinuyog a napan iti palasio; simmurot dagiti tattao. Nagna ti ari iti Ruangan dagiti Guardia, simrek iti palasio ket nagtugaw iti trono.

²⁰Naragsakan dagiti tattao. Timmalna ti siudad kalpasan ti pannakapapatay ni Atalia iti palasio.

²¹Pito ti tawen ni Joas idi maisaad nga ari iti Juda.