Read Iloko 2 Kings 12 Bible Online

2 Kings 12 - Iloko bible

2 Kings 12

¹Iti maikapito a tawen a panagturay ni Jehu nga ari ti Israel, naisaad ni Joas a kas ari ti Juda ket 40 a tawen a nagturay idiay Jerusalem. Ni Zibia a taga-siudad ti Beerseba ti inana.

²Iti unos ti panagbiag ni Joas, nalinteg iti imatang ni Yahweh gapu iti panangidaldalan kenkuana ni Jehoyada a padi.

³Nupay kasta, saan a nadadael dagiti disso a pagdaydayawan dagiti pagano ket intuloy dagiti tattao ti nagidatag kadagiti sakrifisio ken nagpuor iti insenso kadagita a lugar.

⁴Inayaban ni Joas dagiti papadi ket imbilinna kadakuada nga idulinda dagiti kuarta nga ited dagiti tattao nga agidatag kadagiti sakrifisio iti Templo—dagiti kuarta a maited iti pannakaidatag dagiti inaldaw a daton ken dagiti kuarta a maisagut.

⁵Urnongen ti tunggal padi ti kuarta nga idatag dagiti pagserbianna, ket mausar iti pannakatarimaan ti Templo.

⁶Ngem iti maika-23 a tawen a panagturay ni Joas, awan pay laeng ti natarimaan a paset ti Templo.

⁷Iti kasta, inayabanna ni Jehoyada ken dagiti dadduma a padi ket sinaludsodna kadakuada, “Apay a diyo tarimaanen ti Templo? Manipud ita, saanen a dakayo ti agiggem iti kuarta a maawatyo. Masapul nga itedyo tapno matarimaan ti Templo.”

⁸Immanamong dagiti papadi iti daytoy ket saan metten nga isuda ti mangiwanwan iti pannakatarimaan ti Templo.

⁹Nangala ni Jehoyada iti maysa a lakasa. Linussokna ti kalubna sana inkabil ti lakasa iti abay ti altar iti akinkannawan a paset ti pagserkan ti Templo. Ditoy ti nangikabilan dagiti papadi nga agbambantay iti ruangan ti amin a kuarta nga ited dagiti agdaydayaw.

¹⁰No adun ti maurnong a kuarta iti lakasa, mapan ti sekretario ti ari ken ti Nangato a Padi; lunagenda ti pirak sada timbangen.

¹¹Kalpasan ti panangilistada iti umisu a kantidad, yawatda ti pirak kadagiti mangimaton iti trabaho iti Templo ket tangdananda dagiti karpintero, dagiti agbangbangon,

¹²dagiti kantero, ken dagiti agtiktikap kadagiti bato. Gumatangda kadagiti tarikayo ken kadagiti bato a maaramat iti pannakatarimaan ti Templo ken bayadanda dagiti amin a magasto.

¹³Nupay kasta, saan a naaramat dagiti pirak a pagaramid kadagiti kopa, malukong, trumpeta wenno alikamen a maaramat iti pannakaestimar dagiti pagsilawan wenno aniaman a naaramid iti pirak ken balitok.

¹⁴Naitangdanda amin kadagiti trabahador ken naigatang kadagiti materiales a mausar iti pannakatarimaan ti Templo.

¹⁵Mapagtalkan unay dagiti mangimaton iti trabaho ket saan a masapul nga ipakitada ti listaan ti naggastoanda.

¹⁶Kukua dagiti papadi dagiti kuarta a maited iti pannakaidatag dagiti daton a pangikkat iti salungasing ken daton a pangikkat iti basol. Saanda a naidulin iti lakasa.

¹⁷Iti dayta a tiempo, rinaut ni Hazael nga ari ti Siria ti siudad ti Gat ket sinakupna; kalpasanna, napanunotna a rauten ti Jerusalem.

¹⁸Innala ni Joas nga ari ti Juda dagiti amin a daton dagiti sinarunona nga ari—da Jehosafat, Jehoram ken Ahazias—dagiti indatonda ken ni Yahweh, agraman dagiti bukodna a daton ken amin a balitok kadagiti kaha ti Templo ken ti palasio ket impatulodna dagitoy a kas sagutna ken ni Hazael. Ket impanaw ni Hazael ti armadana idiay Jerusalem.

¹⁹Nailanad iti Pakasaritaan dagiti Ari ti Juda dagiti dadduma a pasamak iti panagturay ni Ari Joas.

²⁰Nagtutulag dagiti ofisiales ni Ari Joas. Dua kadakuada—ni Jozacar nga anak ni Simeat, ken Josabad nga anak ni Somer, ti nangpatay kenkuana iti balay a nabangon iti gabur a disso iti dayaen ti Jerusalem, iti dalan a sumalog idiay Silla. Naitabon ni Joas iti tanem dagiti ari iti Siudad ni David, ti daan a paset ti Jerusalem. Ni Amazias nga anakna ti simmukat kenkuana nga ari.