Read Iloko 2 Kings 13 Bible Online

2 Kings 13 - Iloko bible

2 Kings 13

¹Iti maika-23 a tawen a panagturay ni Joas nga anak ni Ahazias a kas ari ti Juda, naisaad met ni Joacaz nga anak ni Jehu a kas ari ti Israel ket 17 a tawen a nagturay idiay Samaria.

²Tinuladna dagiti dakes nga aramid ni Ari Jeroboam a nangisungsong kadagiti Israelita nga agbasol ken ni Yahweh.

³Daytoy ti gapuna a nakapungtot ni Yahweh iti Israel, ket masansan a palubosanna ni Hazael nga ari ti Siria ken ni Ben-hadad nga anakna a mangparmek iti Israel.

⁴Nagkararag ni Joacaz, ket idi nakita ni Yahweh ti panangparigat ti ari ti Siria kadagiti Israelita, impangagna ti kararag ti ari.

⁵Nangibaon ni Yahweh iti maysa a pangulo a nangwayawaya kadakuada kadagiti taga-Siria. Ket nagturay manen ti kappia iti Israel.

⁶Ngem kaskasdi a saan nga inidian dagiti Israelita dagiti dakes nga aramid ni Jeroboam a nangisungsong iti Israel ket intultuloyda ti aramidda. Nagtalinaed ti imahen ni diosa nga Asera idiay Samaria.

⁷Awan ti natda nga armada ni Joacaz, malaksid ti 50 a mannakigubat a nagkabalio, sangapulo a lugan a pakigubat ken 10,000 a mannakigubat, gapu ta dinadael ti ari ti Siria dagiti dadduma; imbaddebaddekna ida a kasla tapok.

⁸Nailanad iti Pakasaritaan dagiti Ari ti Israel ti dadduma nga aramid ni Joacaz bayat ti panagturayna a mangipakita iti kinamaingelna.

⁹Idi natay, naitabon idiay Samaria ket ni Jehoas nga anakna ti simmukat kenkuana nga ari.

¹⁰Iti maika-37 a tawen a panagturay ni Joas nga ari ti Juda, naisaad nga ari ni Jehoas nga anak ni Joacaz. Nagturay idiay Samaria iti las-ud ti 16 a tawen.

¹¹Nagbasol met ken ni Yahweh ket tinuladna dagiti dakes nga aramid ni Ari Jeroboam a nangisungsong kadagiti Israelita nga agbasol.

¹²Nailanad iti Pakasaritaan dagiti Ari ti Israel ti amin nga inaramid ni Jehoas agraman ti kinamaingel nga impakitana iti pannakigubatna ken ni Ari Amazias ti Juda.

¹³Idi natay, naitabon iti tanem dagiti ari idiay Samaria. Ni Jeroboam nga anakna ti simmukat kenkuana nga ari.

¹⁴Nagsakit ni Eliseo a profeta iti nakaro, ket idi dandani matay, sinarungkaran ni Jehoas nga ari ti Israel. Insangitna, “Amak, O amak! Sika idi ti nabileg a nangsalsalaknib iti Israel!”

¹⁵Imbilin ni Eliseo kenkuana, “Mangalaka iti bai ken sumagmamano a pana.” Nangala ni Jehoas,

¹⁶ket binilin ni Eliseo nga agsagana a mangibiat iti pana. Nagtungpal ti ari ket impatay ni Eliseo dagiti imana kadagiti ima ti ari.

¹⁷Kalpasanna, imbilin ti profeta a maluktan ti tawa a sumango idiay Siria; nagtungpal ti ari. “Ibiatmo ti pana,” imbilin ni Eliseo. Apaman a naibiat ti ari ti pana, kinuna ti profeta, “Sika ti pana ti Apo nga aramatenna a pangparmek iti Siria. Gubatemto dagiti Siriano idiay Afec agingga a maparmekmo ida.”

¹⁸Imbilin ni Eliseo nga alaenna dagiti dadduma a pana ket panaenna ti daga. Namitlo a pinana ti ari ti daga sa nagsardeng.

¹⁹Nakapungtot ni Eliseo, ket kinunana iti ari, “Pinanam koma iti naminlima wenno namin-innem. Iti kasta, mamimpinsan koma a maparmekmo dagiti taga-Siria. Ngem ita, mamitlonto la a maparmekmo ida.”

²⁰Natay ni Eliseo ket naitabon. Tinawen idi nga adda dagiti bunggoy dagiti Moabita a mangraut iti daga ti Israel.

²¹Iti naminsan, adda dagiti napan nangitabon iti minatayda. Nakitada ti maysa kadagitoy a bunggoy ket impurruakda ti bangkay iti tanem ni Eliseo sada nagtataray. Apaman a naisagid ti bangkay kadagiti tulang ni Eliseo, nagungar ti tao ket timmakder.

²²Pinarparigat ni Hazael nga ari ti Siria dagiti Israelita bayat ti panagturay ni Joacaz.

²³Ngem pinaraburan ken kinaasian ida ni Yahweh. Dina impalubos a madadaelda, no di ket tinulonganna ida gapu iti karina kada Abraham, Isaac ken Jacob. Pulos a dina nalipatan dagiti tattaona.

²⁴Idi matay ni Hazael nga ari ti Siria, naisaad nga ari ni Ben-hadad nga anakna.

²⁵Namitlo a pinarmek ni Jehoas nga ari ti Israel ni Ben-hadad. Sinakupna manen dagiti siudad nga innala ni Ben-hadad bayat ti panagturay ni Joacaz nga ama ni Jehoas.