Read Iloko 2 Kings 14 Bible Online

2 Kings 14 - Iloko bible

2 Kings 14

¹Iti maikadua a tawen a panagturay ni Jehoas nga anak ni Joacaz a kas ari ti Israel, naisaad ni Amazias nga anak ni Joas a kas ari ti Juda.

²Duapulo ket lima ti tawen ni Amazias idi maisaad nga ari, ket 29 a tawen a nagturay idiay Jerusalem. Ni Jehoaddin a taga-Jerusalem ti inana.

³Tinulad ni Amazias dagiti aramid ni Joas nga amana ket naragsakan ni Yahweh kenkuana. Ngem saan a kas iti daydi Ari David a kapuonanna.

⁴Saanna a rinakrak dagiti lugar a pagdaydayawan dagiti pagano. Intultuloy dagiti tattao ti nagidatag kadagiti daton ken nagpuor kadagiti insenso kadagitoy a lugar.

⁵Apaman a napabileg ni Amazias ti panagturayna, pinapatayna dagiti ofisiales a nangpapatay iti daydi amana nga ari.

⁶Nupay kasta, saanna a pinapatay dagiti annakda. Tinungpalna ti imbilin ni Yahweh iti Linteg ni Moises: “Saan a mapapatay dagiti nagannak gapu iti basol dagiti annakda, ket saan met a mapapatay dagiti annak gapu iti basol dagiti nagannak. Masapul a mapapatay ti maysa a tao gapu iti basol nga inaramidna.”

⁷Agdagup iti 10,000 a mannakigubat nga Edomita ti pinapatay ni Amazias idiay Tanap ti Asin. Ginubatna ti siudad ti Sela ket sinakupna. Pinanagananna daytoy a siudad iti Jokteel nga isu pay laeng ti naganna agingga ita.

⁸Kalpasanna, nangibaon ni Amazias kadagiti mapan ken ni Jehoas nga ari ti Israel, ket kinaritna nga aggubatda.

⁹Ngem kastoy ti insungbat ni Ari Jehoas: “Iti naminsan, idiay Bantay Libano, pinaibaga ti maysa a sisiitan a mula iti maysa a sedro, ‘Ipaasawam ti balasangmo iti anakko.’ Limmabas ti atap nga animal ket binaddebaddekna ti sisiitan a mula.

¹⁰Ita, sika, Amazias, pinarmekmo dagiti Edomita ket timmangsitka. Mapnekka koman iti kinalatakmo ket agtalinaedka iti balaymo. Apay nga agsapsapulka iti riri a pakadadaelam laeng ken dagiti tattaom?”

¹¹Ngem saan a dimngeg ni Amazias, isut' gapuna a napan ni Ari Jehoas agraman dagiti soldadona idiay Betsemes iti Juda ket nagrarangetda sadiay.

¹²Naparmek ti armada ni Amazias, ket nagtataray a nagawid dagiti amin a soldadona.

¹³Innala ni Jehoas ni Amazias a kas balud. Nagtuloy idiay Jerusalem ket rinakrakna ti bakud ti siudad manipud Ruangan ti Efraim agingga iti Ruangan ti Suli. Duagasut a metro ti kaatiddog ti bakud a rinebbana.

¹⁴Sinamsamna dagiti pirak ken balitok a nasarakanna, dagiti amin nga alikamen ti Templo ken ti palasio, ket inyawidna dagitoy idiay Samaria. Nangala met kadagiti tattao a kas balud.

¹⁵Nailanad iti Pakasaritaan dagiti Ari ti Israel ti dadduma a pasamak iti panagturay ni Jehoas agraman ti kinamaingelna iti gubat a maibusor ken ni Ari Amazias ti Juda.

¹⁶Natay ni Jehoas ket naitabon iti tanem dagiti ari idiay Samaria. Ni Jeroboam nga anakna ti simmukat kenkuana nga ari.

¹⁷Sangapulo ket lima a tawen pay a nagbiag ni Amazias kalpasan ti ipapatay ni Ari Jehoas ti Israel.

¹⁸Nailanad iti Pakasaritaan dagiti Ari ti Juda ti dadduma a pasamak iti panagturay ni Amazias.

¹⁹Adda tattao a nagtutulag a mangpapatay ken ni Amazias iti Jerusalem. Daytoy ti gapuna a nagkamang ni Amazias idiay siudad ti Lakis, ngem sinurot dagiti kabusorna, ket pinapatayda sadiay.

²⁰Inluganda iti kabalio ti bangkayna sada insubli idiay Jerusalem. Naitabon iti tanem dagiti ari iti Siudad ni David.

²¹Insaad dagiti tattao ti Juda ni Uzzias nga anakna a kas ari; agtawen idi iti 16.

²²Ni Uzzias ti nangparmek ken nangbangon manen iti Elat kalpasan ti ipapatay ni amana.

²³Iti maika-15 a tawen a panagturay ni Amazias nga anak ni Joas a kas ari ti Juda, naisaad ni Jeroboam II nga anak ni Jehoas a kas ari ti Israel. Uppat a pulo ket maysa a tawen a nagturay idiay Samaria.

²⁴Nagbasol ken ni Yahweh. Tinuladna ti dakes nga inar-aramid ti sinarunona nga ari, ni Jeroboam nga anak ni Nebat a nangisungsong iti Israel nga agbasol.

²⁵Sinakupna manen dagiti amin a daga a kukua idi ti Israel, manipud iti Bessang ti Hamat iti amianan agingga iti Natay a Baybay iti abagatan. Kastoy ti inkari ni Yahweh a Dios ti Israel ken ni adipen ken profetana a Jonas nga anak ni Amittai a taga-Gat Hefer.

²⁶Naimatangan ni Yahweh ti nakaro a panagsagaba dagiti Israelita. Awan ti uray maysa a tumulong kadakuada.

²⁷Ngem saan a panggep ni Yahweh a pukawen ti Israel isut' gapuna nga inispalna ida babaen iti panangaramatna ken ni Jeroboam II.

²⁸Nailanad iti Pakasaritaan dagiti Ari ti Israel ti dadduma a pasamak iti panagturay ni Jeroboam II, ti kinamaingelna iti paggugubatan ken ti panangisublina iti Damasco ken Hamat iti Israel.

²⁹Natay ni Jeroboam ket naitabon iti pagitantaneman kadagiti ari. Ni Zacarias nga anakna ti simmukat kenkuana nga ari.