Read Iloko 2 Kings 19 Bible Online

2 Kings 19 - Iloko bible

2 Kings 19

¹Idi mangngeg ni Ari Hezekias ti impakaammoda, rinay-abna ti pagan-anayna gapu iti ladingitna, nagkawes iti nakersang a lupot sa napan iti Templo ni Yahweh.

²Imbaonna ti tallo kadagiti ofisialesna a mapan ken ni profeta Isaias nga anak ni Amoz: ni Eliakim a mayordomo ti palasio, ni Sebna a sekretario ti palasio ken dagiti lallakay a papadi. Nagkawesda met iti nakersang a lupot.

³Kastoy ti pinaibagana ken ni Isaias: “Aldaw ita ti panagsagaba; madusdusatayo ket maibabaintayo. Mayarigtay iti babai a dandani agpasngay ngem awanen pigsana nga aganak.

⁴Imbaon ti emperador ti Asiria ti kangrunaan nga ofisialna tapno ibabainna ti sibibiag a Dios. Sapay koma ta mangngeg ti Apo a Diosmo dagitoy a panglalais ket dusaenna dagiti nagsao. Iti kasta, ikararagam dagiti nakalasat a kailiantayo.”

⁵Idi mangngeg ni Isaias ti pinaibaga ni Ari Hezekias,

⁶kastoy ti sungbatna: “Paibaga ti Apo a dimo itulok a butbutngennakayo dagiti taga-Asiria iti panangibagada a dinakayo maisalakan ti Apo.

⁷Aramidento ti Apo ti pakaigapuan ti pannakangngeg ti emperador iti maysa a damag. Apaman a mangngegna daytoy, agbutengto ket agsublinto iti bukodna a pagilian. Papapatayto ti Apo sadiay.”

⁸Naammoan ti ofisial a taga-Asiria a pimmanaw ti emperador idiay Lakis ket madama ti panangrautna iti kabangibang a siudad ti Libna. Napan sadiay ti ofisial tapno makiuman iti emperador.

⁹Nadamag dagiti taga-Asiria a mapan rauten ida ti armada ti Egipto nga impanguloan ni Tirhaka nga ari ti Etiopia. Idi maammoan daytoy ti emperador, nagpaipan iti surat ken ni Hezekias nga ari ti Juda

¹⁰tapno ibagana kenkuana: “Imbaga ti dios a pagtaltalkam a dika matnag iti pannakabalinko ngem saanka a maallilaw iti dayta.

¹¹Awan duadua a nadamagmo ti aramiden ti emperador ti Asiria iti uray ania a pagilian nga ikeddengna a dadaelen. Ipagarupmo kadi a makalisika?

¹²Dinadael dagidi kapuonak dagiti siudad ti Gozan, Haran ken Resef ket pinapatayda dagiti tattao ti Beteden nga agnaed idi idiay Telassar; awan kadagiti diosda ti nakaisalakan kadakuada.

¹³Sadino ti ayan dagiti ari dagiti siudad ti Hamat, Arpad, Sefarvaim, Hena ken Ivva?”

¹⁴Innala ni Ari Hezekias ti surat kadagiti naibaon ket binasana. Kalpasanna, napan iti Templo, inkabilna ti surat sadiay iti imatang ni Yahweh

¹⁵ket inkararagna: “O Apo a Dios ti Israel, sika a nakatugaw iti tronom iti ngatoen dagiti kerubim, sika laeng ti Dios nga agturay kadagiti pagarian ti lubong. Pinarsuam ti daga ken ti langit.

¹⁶Ita, O Apo, kitaem ti maar-aramid kadakami. Denggem ti amin a pananglais ni Senakerib kenka, sika a sibibiag a Dios.

¹⁷Ammomi amin, O Apo, a dinadael dagiti emperador ti Asiria ti adu a nasion, pinaglangalangda dagiti dagada

¹⁸ken pinuoranda dagiti didiosenda. Saan a pudno a dios dagitoy, imahenda laeng a naaramid iti kayo ken bato nga aramid ti tao.

¹⁹Ita, O Apo a Diosmi, ispalennakami kadagiti Siriano tapno maammoan dagiti amin a nasion a siksika laeng, O Apo, ti Dios.”

²⁰Nangibaon ni Isaias iti mapan ken ni Ari Hezekias. Pinaibagana daytoy a kas sungbat ni Yahweh iti kararag ti ari.

²¹Kinunana, “Katawaannaka ti siudad ti Jerusalem, Senakerib, ket ang-angawennaka.

²²Siasino ti ipagarupmo a pabpabainan ken lalaisem? Saanka nga agraem kaniak, siak a nasantoan a Dios ti Israel.

²³Imbaonmo dagiti adipenmo a mangipasindayag kaniak a sinakupmo dagiti kangatoan a bantay ti Libano babaen kadagiti amin a luganmo a pakigubat. Impangasmo a pinukanmo dagiti katayagan a sedro ken kapintasan a saleng sadiay ket nadanonmo ti kasamekan a paset dagiti bakir.

²⁴Impasindayagmo a nagkalika kadagiti bubon ket imminumka iti danum dagiti ganggannaet a daga ken binaddebaddek dagiti soldadom ti Karayan Nile agingga a nagmaga.

²⁵“Dimo kad ammo a nabayagen nga inkeddengko a maaramid amin dagitoy? Ket ita, tinungpalkon. Inikkanka iti pannakabalin a mangrebba kadagiti nasarikedkedan a siudad agingga nga agbalinda a gabsuon.

²⁶Awan ti bileg dagiti tattao a nagnaed sadiay. Nakigtot ken naikulengda. Mayarigda iti ruot iti talon wenno ruot nga agtubo iti tuktok ti balay a malaylay no pul-oyan ti napudot nga angin-daya.

²⁷“Ngem ammok ti amin maipapan kenka, no ania ti aramidem ken no sadino ti papanam. Ammok no kasano ti pungtotmo kaniak.

²⁸Naipulong kaniak dayta a pungtotmo ken ti kinapalangguadmo. Ita, taldengan ken busalanka ket isublika iti dalan a nagnaam nga immay.”

²⁹Ket kinuna ni Isaias ken ni Ari Hezekias, “Adtoy ti maysa a pagilasinan ti mapasamakto. Ita ken inton umay a tawen, dagitinto laeng agtubtubo a trigo ti kanem ngem iti sumuno a tawen, mabalinmonton ti agmula iti trigo ket apitem. Mabalinmonton ti agmula iti ubas ket manganka iti ubas.

³⁰Mayarigto dagiti makalasat nga adda idiay Juda kadagiti mula nga agramut iti nauneg ket agbungada.

³¹Addanto tattao a maispal idiay Jerusalem ken iti bantay Sion gapu ta inkeddeng ti Apo a mapasamak daytoy.”

³²Kastoy ti imbaga ni Yahweh maipapan iti emperador ti Asiria: “Dinto makastrek iti daytoy a siudad wenno mangibiat iti pana sadiay. Awanto ti mannakigubat a sikakalasag nga umasideg iti siudad ket awanto ti mabangon a panglakub iti lawlawna.

³³Agsublinto iti dalan a nagnaanna nga immay ket dinto sumrek iti daytoy a siudad. Siak, ni Yahweh, ti nagsao.

³⁴Salaknibak ken isalakanko daytoy a siudad gapu iti bukodko a dayaw ken gapu iti karik iti daydi adipenko a David.”

³⁵Iti dayta a rabii, maysa nga anghel ni Yahweh ti napan iti kampo dagiti Siriano ket pinapatayna ti 185,000 a mannakigubat. Iti parbangon ti sumuno nga aldaw, naiwalang sadiay dagiti bangkayda!

³⁶Gapu iti daytoy, nagsanud ni Senakerib nga emperador ti Asiria ket nagsubli idiay Nineve.

³⁷Iti maysa nga aldaw, idi madama nga agdaydayaw iti templo ni Nisroc a diosna, dua kadagiti annakna—da Adramelek ken Sarezer—ti nangtagtagbat kenkuana agingga a natay. Kalpasanna, napan nagkamang dagiti agkabsat iti daga ti Ararat. Ni Esarhadon a maysa kadagiti annak ni Senakerib ti simmukat kenkuana nga emperador.