Read Iloko 2 Kings 2 Bible Online

2 Kings 2 - Iloko bible

2 Kings 2

¹Dimteng ti tiempo a panangala ni Yahweh ken ni Elias idiay langit babaen iti alipugpog. Nagrubbuat da Elias ken Eliseo idiay Gilgal

²ket iti dalan, kinuna ni Elias ken ni Eliseo, “Agbatika ditoy. Imbilin ti Apo nga innak idiay Betel.” Ngem kinuna ni Eliseo, “Ikarik kenka ken iti sibibiag nga Apo a saanka a panawan.” Ket nagkuyogda a napan idiay Betel.

³Adda bunggoy ti profeta nga agnaed sadiay a napan ken ni Eliseo. Sinaludsodda kenkuana, “Ammom kadi nga ipanaw ti Apo ti apom kenka ita nga aldaw?” “Wen, ammok,” insungbat ni Eliseo. “Ngem saantay koma a pagsasaritaan.”

⁴Kinuna ni Elias ken ni Eliseo, “Agbatika ditoy. Imbilin ti Apo a mapanak idiay Jerico.” Ngem insungbat ni Eliseo, “Ikarik kenka ken iti kinapudnok iti sibibiag nga Apo ken iti naganmo a saanka a panawan.” Ket nagkuyogda a napan idiay Jerico.

⁵Adda bunggoy dagiti profeta idiay Jerico a napan ken ni Eliseo. Sinaludsodda kenkuana, “Ammom kadi nga ipanaw ti Apo ti apom kenka ita nga aldaw?” “Wen, ammok,” insungbat ni Eliseo. “Ngem saantay koma a pagsasaritaan.”

⁶Kinuna ni Elias ken ni Eliseo, “Agbatika ditoy; imbilin ti Apo a mapanak iti Karayan Jordan.” Ngem insungbat ni Eliseo, “Ikarik kenka ken iti sibibiag nga Apo a saanka a panawan.” Ngarud, intuloyda ti panagdaliasatda.

⁷Limapulo kadagiti profeta ti simmurot kadakuada a napan idiay Jordan. Nagsardeng da Elias ken Eliseo iti igid ti karayan idinto a nagtakder dagiti profeta iti pangadaywen bassit.

⁸Inikkat ni Elias ti kagayna, kinupinna sana imbaut iti danum. Nagbingay ti danum ket bimmallasiwda ken ni Eliseo iti namaga a daga.

⁹Sadiay, kinuna ni Elias ken ni Eliseo, “Ania ti kayatmo nga ipaayko kenka sakbay a maipanawak?” “Ibingayannak iti pannakabalinmo a mangpabileg a sumukat kenka,” insungbat ni Eliseo.

¹⁰“Narigat a mapatgan dayta a dawatmo,” kinuna ni Elias. “Ngem awatemto no makitam ti pannakaipanawko. No dinak makita a maipanaw, saan a mapatgan ti dawatmo.”

¹¹Nagsarsaritada bayat ti pannagnada. Pagammoan, adda umap-apuy a lugan a pakigubat a guyguyoden dagiti umap-apuy a kabalio iti baetda ket naipangato ni Elias sadi langit babaen iti alipugpog.

¹²Nakita ni Eliseo daytoy ket impukkawna ken ni Elias, “O amak! O amak! Nabileg a salaknib ti Israel! Awankan!” Manipud idin, saannan a nakita ni Elias. Gapu iti lidayna, pinigis ni Eliseo ti kawesna.

¹³Pinidutna ti kagay ni Elias sa nagsubli ket nagtakder iti igid ti Jordan.

¹⁴Imbautna ti kagay ni Elias iti danum ngem saan a nagbingay ti danum. “Sadino ti ayan ti Apo Dios ni Elias?” kinunana. Imbautna manen ti kagay iti danum ket nagbingay ti danum. Nagna ni Eliseo a bimmallasiw.

¹⁵Nakita dagiti 50 a profeta ni Eliseo ket kinunada, “Adda ken ni Eliseo ti bileg ni Elias!” Napanda sinabat ni Eliseo, nagpaklebda iti sangoananna

¹⁶ket kinunada, “Limapulokami ditoy a napipigsa a lallaki. Intayo sapulen ti apom. Nalabit nga impanaw laeng ti espiritu ti Apo ket imbatina iti maysa a bantay wenno iti maysa a tanap.” “Saankayo a mapan,” kinuna ni Eliseo.

¹⁷Ngem nagpilitda agingga nga immanamong ni Eliseo ket pinalubosanna ida. Napanda amin a limapulo. Tallo nga aldaw nga impasnekda ti nagsapul ken ni Elias ngem dida nabirokan.

¹⁸Idi nagsublida ken ni Eliseo nga agur-uray idiay Jerico, kinunana kadakuada, “Diak kadi imbaga kadakayo a dikay mapmapan?”

¹⁹Adda sumagmamano nga umili ti Jerico a napan ken ni Eliseo ket kinunada, “Pagaammom, apo, a napintas daytoy a siudad ngem saan a nasayaat ti danum gapu ta saan a makapabunga.”

²⁰“Mangikabilkay iti asin iti baro a malukong ket yegyo kaniak,” imbilin ni Eliseo. Impanda kenkuana ti malukong.

²¹Napan iti ubbog a paggapuan ti danum ti siudad, impurruakna ti asin iti danum sana kinuna, “Kastoy ti sao ti Apo: ‘Dalusak daytoy a danum tapno saanen a mangyeg iti patay wenno mangregreg iti sikog.’”

²²Manipud idin, nadalusen dayta a danum a kas imbaga ni Eliseo.

²³Pimmanaw ni Eliseo idiay Jerico tapno mapan idiay Betel. Iti dalan, adda sumagmamano nga ubbing a lallaki a rimmuar iti maysa nga ili ket rinabrabakda ni Eliseo. “Pumanawka ditoy, kalbo!” impukkawda.

²⁴Timmalliaw ni Eliseo, kinitana ida iti nasakit sana inlunod ida iti nagan ni Yahweh. Rimmuar ti dua a kabaian nga oso iti bakir ket 42 kadagiti ubbing ti rinangrangkayda.

²⁵Manipud sadiay, napan ni Eliseo ket napan idiay Bantay Carmel; iti saan a mabayag, nagsubli idiay Samaria.