Read Iloko 2 Kings 21 Bible Online

2 Kings 21 - Iloko bible

2 Kings 21

¹Sangapulo ket dua ti tawen ni Manases idi maisaad nga ari iti Juda ket 55 a tawen a nagturay idiay Jerusalem. Ni Hepsiba ti inana.

²Saan a naragsakan kenkuana ni Yahweh ta tinuladna dagiti makarimon nga aramid dagiti nasion a pinagtalaw ni Yahweh sakbay a dimteng dagiti Israelita.

³Binangon manen ni Manases dagiti pagdaydayawan dagiti pagano a dinadael idi ni Hezekias nga amana. Nagaramid kadagiti altar nga agpaay iti pagdaydayawan ken ni didiosen a Baal ket nangaramid iti imahen ni Asera a diosa a kas iti inaramid idi ni Ahab nga ari ti Israel. Nagdaydayaw met ni Manases kadagiti bituen.

⁴Nagbangon kadagiti altar dagiti pagano iti uneg ti Templo a kinuna ni Yahweh a rumbeng a pagdaydayawan dagiti tattao kenkuana.

⁵Nagpaaramid kadagiti altar a pagdaydayawan kadagiti bituen a nabangon kadagiti dua a paraangan ti Templo.

⁶Indatagna ti lalaki nga anakna a daton a mapuoran. Namuybuyon ken namadpadles ket nakiuman kadagiti baglan ken espiritu. Agkakadakes iti imatang ni Yahweh dagiti inaramidna ket nagpungtot ni Yahweh.

⁷Inkabilna ti imahen ni Asera a diosa iti Templo—daytoy ti templo a sarsaritaen ni Yahweh idi kinunana kada David ken ni Solomon nga anakna: “Ditoy Jerusalem, iti daytoy a Templo, ti lugar a pinilik kadagiti amin a sakup dagiti 12 a tribu ti Israel a pagdaydayawan kaniak dagiti tattao.

⁸Ket no tungpalen dagiti Israelita ti sibubukel a Linteg nga inted kadakuada ni Moises nga adipenko, diakto ipalubos a mapapanawda iti daga nga intedko kadagidi kapuonanda.”

⁹Ngem saan nga impangag dagiti tattao ti Juda ni Yahweh ket insungsong ni Manases ida nga agbasol. Nadagdagsen ti basolda ngem dagiti nasion a pinagtalaw ni Yahweh idi dumteng dagiti tattaona iti daga.

¹⁰Kinuna ni Yahweh babaen kadagiti adipen ken profetana,

¹¹“Inaramid ni Ari Manases dagiti makarimon a banag; dakdakes ti inaramidna ngem dagiti inaramid dagiti Cananeo. Insungsongna dagiti tattao nga agbasol gapu kadagiti imahen a pagdaydayawanna.

¹²Ngarud, siak a Dios ti Israel, idissuorkonto ti didigra iti Jerusalem ken iti Juda ket urayto la maikuleng ti amin a makadamag iti daytoy.

¹³Dusaek ti Jerusalem a kas iti inaramidko iti Samaria; dusaek a kas ken ni Ahab nga ari ti Israel ken kadagiti kaputotanna. Sagadekto ti Jerusalem agingga nga awan mabati a tattao ket nadalusto a kas iti pinggan a nadalusan ken naipakleb.

¹⁴Baybay-akto dagiti makalasat a tattao ket yawatkonto ida kadagiti kabusorda. Maparmekdanto ket agsamsamto dagiti kabusorda iti dagada.

¹⁵Aramidekto daytoy gapu ta nagbasbasol dagiti tattao ket pinagpungtotdak manipud idi rimmuar dagiti kapuonanda idiay Egipto agingga ita.”

¹⁶Adu a tattao nga awan basolna ti pinatay ni Manases ket nagayus dagiti kalsada ti Jerusalem iti darada. Inaramidna daytoy malaksid la iti panangisungsongna kadagiti tattao ti Juda nga agdaydayaw kadagiti didiosen, a nakaigapuan ti panagbasolda ken ni Yahweh.

¹⁷Nailanad iti Pakasaritaan dagiti Ari ti Juda ti dadduma a pasamak iti panagturay ni Manases, agraman dagiti basolna.

¹⁸Natay ni Manases ket naitabon iti hardin ti palasio, ti hardin ni Uzza. Ni Amon nga anakna ti simmukat kenkuana nga ari.

¹⁹Duapulo ket dua ti tawen ni Amon idi maisaad a kas ari ti Juda ket dua a tawen a nagturay idiay Jerusalem. Ni Mesullemet nga anak ni Haruz a taga-Jotba ti inana.

²⁰Kas ken ni amana a Manases, dakes ti inaramidna iti imatang ni Yahweh.

²¹Tinuladna ni amana ket nagdaydayaw met kadagiti didiosen a nagdaydayawanna.

²²Linaksidna ni Yahweh a Dios dagidi kapuonanna ket sinukirna ti bilin ni Yahweh.

²³Nagtutulag dagiti ofisiales ket pinapatayda ni Amon iti uneg ti palasio.

²⁴Ngem pinapatay dagiti tattao ti Juda dagiti nangpatay ken ni Amon ket insaadda ni Josias nga anakna nga ari.

²⁵Nailanad iti Pakasaritaan dagiti Ari ti Juda ti dadduma a pasamak iti panagturay ni Amon.

²⁶Naitabon ni Amon iti hardin ni Uzza ket ni Josias nga anakna ti simmukat kenkuana nga ari.