Read Iloko 2 Kings 22 Bible Online

2 Kings 22 - Iloko bible

2 Kings 22

¹Walo ti tawen ni Josias idi maisaad a kas ari iti Juda, ket 31 a tawen a nagturay idiay Jerusalem. Ni Jedida nga anak ni Adaias a taga-Bozkat ti inana.

²Nalinteg iti imatang ni Yahweh ti inar-aramid ni Josias. Tinuladna ni Ari David a kapuonanna—napasnek ti panangtungpalna kadagiti amin a linteg ti Dios.

³Iti maika-18 a tawen a panagturay ni Josias, imbaonna ti sekretario ti palasio, ni Safan nga anak ni Azalia ken apoko ni Mesullam a mapan iti Templo. Kinunana kenkuana,

⁴“Inka ken ni Hilkias a Nangato a Padi ket ammoem ti dagup ti kuarta nga inur-or dagiti papadi nga agserserbi iti pagserkan ti Templo.

⁵Ibagam nga itedna ti kuarta kadagiti mangimaton iti pannakatarimaan ti Templo. Masapul a tangdananda

⁶dagiti karpintero, dagiti agbangbangon ken dagiti agkabkabiti ken gumatangda iti kayo ken bato a mausar iti panagtarimaan.

⁷Matalek dagiti mangipangulo iti trabaho ket saan a masapul nga itedda ti listaan ti paggastoanda.”

⁸Indanon ni Safan ti bilin ti ari ken ni Hilkias ket imbaga kenkuana ni Hilkias a nasarakanna ti Libro ti Linteg iti Templo. Inted ni Hilkias ti libro ket binasa ni Safan.

⁹Kalpasanna, nagsubli ni Safan iti ari ket imbagana, “Innala dagiti adipenmo ti kuarta nga adda iti Templo ket intedda kadagiti mangimaton iti trabaho sadiay.”

¹⁰Sana innayon, “Adda libro nga inted ni Hilkias kaniak.” Ket imbasana iti napigsa ti libro iti ari.

¹¹Idi mangngeg ti ari ti linaon ti libro, rinay-abna ti pagan-anayna gapu iti ladingitna.

¹²Pinaayabanna ni Hilkias, Safan, ni Ahikam nga anakna, ni Akbor nga anak ni Micaias, ken ni Asaias a maysa nga ofisial ti ari ket imbilinna kadakuada:

¹³“Inkay makiuman iti Apo gapu kaniak ken gapu kadagiti amin a tattao ti Juda maipapan kadagiti pannursuro iti daytoy a libro. Napalalo ti pungtot ti Apo kadatayo gapu ta saan nga inaramid dagiti kapuonantayo dagiti nailanad iti daytoy a libro a masapul a maaramid.”

¹⁴Napan nakiuman da Hilkias, Ahikam, Akbor, Safan ken Asaias iti maysa a babai nga agnagan iti Hulda, maysa a profeta nga agnaed iti baro a paset ti Jerusalem. (Ni Sallum nga asawana, nga anak ni Tikva ken apoko ni Harhas ti agay-aywan kadagiti pagan-anay ti Templo.) Imbagada kenkuana ti napasamak.

¹⁵Pinagsublina ida tapno ipakaammoda iti ari

¹⁶daytoy sao ni Yahweh: “Dusaek ti Jerusalem ken dagiti amin a tattaona, kas nailanad iti libro a binasa ti ari.

¹⁷Gimmil-ayab ti pungtotko iti daytoy a lugar, ta linaksiddak dagiti tattao ket nagidatonda kadagiti didiosen. Pinagpungtotdak gapu iti amin nga inaramidda; pulos a dinto agbaaw ti pungtotko.

¹⁸No maipapan iti ari, kastoy ti saok, siak, ni Yahweh a Dios ti Israel: Impangagmo ti naisurat iti libro

¹⁹ket nagbabawika. Nagpakumbabaka iti imatangko. Rinay-abmo ti pagan-anaymo ket nagsangitka idi maammoam ti pangtak a mangdusa iti Jerusalem ken dagiti tattaona. Pagbalinek dayta a lugar a nakabutbuteng a buya, maysa a disso nga usaren dagiti tattao ti naganna a pagilunod. Ngem nangngegko ti kararagmo

²⁰ket dimonto makita ti didigra nga idissuorko iti Jerusalem. Mataykanto a sitatalna.” Nagsubli dagiti naibaon ket imbagada ken ni Ari Josias ti imbaga ni Hulda.