Read Iloko 2 Kings 23 Bible Online

2 Kings 23 - Iloko bible

2 Kings 23

¹Pinaayaban ni Ari Josias dagiti amin a pangulo ti Juda ken Jerusalem

²ket napanda amin iti Templo, agraman dagiti papadi ken dagiti profeta ken amin nga umili ti Jerusalem, napanglaw man wenno nabaknang. Iti imatangda, imbasa ti ari ti amin a nailanad iti libro a nasarakan iti Templo.

³Nagtakder ti ari iti abay ti adigi ket nakitulag ken ni Yahweh. Inkarina nga agtulnog kenkuana, tungpalenna ti amin a linteg ken bilinna iti amin a puso ken kararuana ket ipatungpalna dagiti sagudayen ti tulag kas nailanad iti libro. Sangsangkamaysa met dagiti tattao a nagkari a dida salungasingen ti tulag.

⁴Kalpasanna, imbilin ni Josias ti pannakapuor ti amin nga alikamen a maus-usar iti panagdaydayaw ken ni Baal a didiosen, ken ni Asera a diosa, ken kadagiti bituen. Nagtungpal ni Hilkias a Nangato a Padi, dagiti papadi a katulonganna ken dagiti guardia iti pagserkan ti Templo ket inikkatda dagitoy iti Templo sada impan iti ruar ti siudad iti asideg ti Tanap ti Kidron. Napuoran amin dagiti alikamen ket naipan ti dapuda idiay Betel.

⁵Inikkat ni Josias iti akem dagiti papadi nga inordenan dagiti ari ti Juda a mangidatag kadagiti sakrifisio kadagiti altar dagiti pagano kadagiti siudad ti Juda ken kadagiti lugar iti asideg ti Jerusalem—amin a papadi a nagidatag kadagiti sakrifisio ken ni Baal, iti init, iti bulan, kadagiti planeta ken kadagiti bituen.

⁶Inikkatna iti Templo ti nasagradoan nga adigi a naidaton ken ni Asera ket impanna iti Tanap ti Kidron iti ruar ti siudad. Pinuoranna ti adigi, rinumrumekna ti uging agingga a timmapok ket inwarakiwakna iti sementerio ti ili.

⁷Dinadaelna dagiti kuarto a pagnaedan dagiti balangkantis ti templo. (Sadiay ti pagablan dagiti babbai kadagiti pagan-anay a mausar iti panagdaydayaw iti diosa, ni Asera.)

⁸Impanna idiay Jerusalem dagiti papadi nga adda kadagiti siudad ti Juda. Dinadaelna dagiti altar a pagidatdataganda kadagiti sakrifisio, manipud Geba agingga idiay Beerseba. Rinakrakna met dagiti altar iti asideg ti ruangan a binangon ni Josue, ti agturay iti siudad, nga adda iti makannigid iti dakkel a ruangan no sumrekka iti siudad.

⁹Saan a napalubosan dagita a papadi nga agserbi iti Templo ngem mabalinda ti mangan iti tinapay nga awan lebadurana nga agpaay kadagiti padada a padi.

¹⁰Dinadael met ni Ari Josias ti Tofet, ti lugar a pagdaydayawan dagiti pagano iti Tanap ti Hinnom tapno awan mangpuor iti anakna a daton ken ni didiosen a Molec.

¹¹Inikkatna pay dagiti kabalio nga indaton dagiti ari ti Juda a pagdaydayawan iti init ket pinuoranna dagiti lugan a pakigubat a maar-aramat iti daytoy a panagdaydayaw. (Adda dagitoy iti paraangan ti templo, iti asideg ti ruangan a saan nga adayo iti kuarto ni Natan Melek, maysa a nangato nga ofisial.)

¹²Rinakrak ni Ari Josias dagiti altar a binangon dagiti ari ti Juda, iti ngatoen ti kuarto ni Ari Ahaz, agraman dagiti altar nga inaramid ni Ari Manases kadagiti dua a paraangan ti Templo. Rinumrumekna dagitoy nga altar agingga a timmapokda ket impurruakna ida iti Tanap ti Kidron.

¹³Dinadael ni Josias dagiti altar nga inaramid ni Ari Solomon iti dayaen ti Jerusalem iti abagatan ti Bantay Olibo a pagdaydayawan kadagiti makarimon a didiosen—Asera, ti diosa ti Sidon; Kemos, ti dios ti Moab ken Molec, ti dios ti Ammon.

¹⁴Binurburak ni Ari Josias dagiti adigi, tinumbana ti adigi a naidaton ken ni Asera a diosa sana ginaburan kadagiti tultulang ti tao ti nakaipatakderanda.

¹⁵Rinakrak pay ni Josias ti lugar a pagdaydayawan idiay Betel. Daytoy daydi impatakder ni Ari Jeroboam nga anak ni Nebat a nangisungsong iti Israel nga agbasol. Dinadael ni Josias ti altar, rinumrumekna dagiti batona agingga a nagbalin a tapok. Pinuoranna met ti adigi a naidaton iti panagdaydayaw ken ni Asera.

¹⁶Idi makita ni Josias ti sumagmamano a tantanem iti tapaw ti turod, pinaikkatna dagiti tultulang. Pinuoranna daytoy iti rabaw ti altar tapno matulawan, ket iti kasta natungpal ti nabayagen nga impakaammo ti profeta bayat ti fiesta idi agtaktakder ni Ari Jeroboam iti abay ti altar. Nakita ni Ari Josias ti tanem ti profeta a nangipakaammo iti daytoy.

¹⁷“Siasino ti akintanem iti dayta?” sinaludsodna. “Ti profeta a naggapu idiay Juda a nangipadto iti amin nga inaramidmo iti daytoy nga altar,” kinuna dagiti taga-Betel.

¹⁸Kinuna ni Josias, “Bay-anyo. Diyo an-anoen dagiti tulangna.” Saan ngarud a naan-ano dagiti tulangna, kasta met dagiti tulang ti profeta a naggapu idiay Samaria.

¹⁹Iti amin a siudad ti Israel, dinadael ni Ari Josias dagiti amin a lugar a pagdaydayawan dagiti pagano a binangon dagiti ari ti Israel a nakaigapuan ti panagpungtot ni Yahweh. Inaramidna kadagitoy nga altar ti kas iti inaramidna idiay Betel.

²⁰Pinapatayna dagiti pagano a papadi iti rabaw dagiti altar a pagserserbianda ket nagpuor kadagiti tulang ti tao iti tunggal altar. Kalpasanna, nagsubli idiay Jerusalem.

²¹Imbilin ni Ari Josias kadagiti tattao a rambakanda ti Fiesta ti Paskua a pammadayaw ken ni Yahweh a Diosda, kas nailanad iti Libro ti Tulag.

²²Awan ti kasta a fiesta a rinambakan ti uray siasino nga ari ti Israel wenno Juda manipud idi tiempo dagiti ukom a nangituray iti pagilian.

²³Ita, iti maika-18 a panagturay ni Josias, narambakan ti Fiesta ti Paskua idiay Jerusalem.

²⁴Tapno maipaannurot dagiti linteg a nailanad iti libro a nasarakan ni Hilkias a Nangato a Padi iti Templo, pinapanaw ni Ari Josias dagiti amin a makium-uman kadagiti espiritu ken mammadles. Pinaikkatna amin a didiosen kadagiti balbalay, dagiti imahen ken amin a pagdaydayawan dagiti pagano idiay Jerusalem ken Juda.

²⁵Awanen ti kas kenkuana nga ari a sinarunona a nagserbi ken ni Yahweh iti amin a puso, kararua ken pigsa iti panagtungpalna iti amin a Linteg ni Moises. Awan metten ti ari a kas kenkuana kalpasan ti panagturayna.

²⁶Simged ti nakaro a pungtot ni Yahweh iti Juda gapu kadagiti inaramid ni Manases idi ket di pay nagbaaw agpapan ita.

²⁷Kinuna ni Yahweh, “Aramidek iti Juda ti kas iti inaramidko iti Israel: Pukawek dagiti tattao ti Juda iti imatangko ket laksidek ti Jerusalem, ti pinilik a siudad, ken ti Templo nga imbagak a pagdaydayawanda kaniak.”

²⁸Nailanad iti Pakasaritaan dagiti Ari ti Juda ti dadduma a pasamak iti panagturay ni Ari Josias.

²⁹Bayat ti panagturay ni Josias, impanguloan ni Neco nga ari ti Egipto ti maysa nga armada a mapan iti Karayan Eufrates tapno tulonganna ti ari ti Asiria. Pinadas ni Ari Josias a pasardengen ti armada ti Egipto idiay Megiddo ngem natay iti paggugubatan.

³⁰Inlugan dagiti ofisialesna ti bangkayna iti lugan a pakigubat ket inyawidda idiay Jerusalem; sadiay, intabonda kadagiti pagitantaneman kadagiti ari. Ni Joacaz nga anakna ti insaad dagiti tattao a sumukat kenkuana nga ari.

³¹Duapulo ket tallo ti tawen ni Joacaz idi maisaad nga ari ti Juda ket nagturay idiay Jerusalem iti tallo a bulan. Ni Hamutal nga anak ni Jeremias a taga-siudad ti Libna ti inana.

³²Kas kadagiti kapuonanna, nagbasol ken ni Yahweh.

³³Naggibus ti panagturayna idi intalaw ni Neco nga ari ti Egipto ket imbaludna idiay Ribla, iti daga ti Hamat. Pinagbayad ni Neco ti Juda iti 3,750 a kilo a pirak ken dandani tallopulo ket uppat a kilo a balitok a kas buis ti pagilian.

³⁴Insaadna ni Eliakim nga anak ni Josias a kas ari a sumukat ken ni amana ket binalbaliwanna ti naganna iti Joakim. Impan ni Ari Neco ni Joacaz idiay Egipto ket sadiay ti nakatayanna.

³⁵Inted ni Ari Joakim ti pirak ken balitok a kas buis iti ari ti Egipto. Tapno maitedna ti gatad, pinagbuisna dagiti tattao kas mayannurot iti kinabaknangda.

³⁶Agtawen iti 25 ni Joakim idi maisaad nga ari idiay Juda, ket 11 a tawen a nagturay idiay Jerusalem. Ni Zebida nga anak ni Pedaias a taga ili ti Ruma ti inana.

³⁷Dakes ti inar-aramidna iti imatang ni Yahweh a kas kadagidi kapuonanna.