Read Iloko 2 Kings 3 Bible Online

2 Kings 3 - Iloko bible

2 Kings 3

¹Iti maika-18 a tawen a panagturay ni Jehosafat nga ari ti Juda, naisaad nga ari ti Israel ni Joram nga anak ni Ahab, ket nagturay idiay Samaria iti 12 a tawen.

²Nagbasol ken ni Yahweh ngem saan a dakdakes ngem iti daydi ni amana wenno inana a Jezebel. Ngamin, rinakrakna ti imahen nga impatakder ni amana a pagdaydayawan ken ni dios a Baal.

³Nupay kasta, kas ken ni Ari Jeroboam nga anak ni Nebat a sinarunona, insungsongna nga agbasol ti Israel. Saan a nagsardeng nga agaramid iti dakes.

⁴Agtartaraken iti karnero ni Mesa nga ari ti Moab. Kas buisna, tinawen nga ikkanna ti ari ti Israel iti 100,000 a karnero ken de lana a nagtaud iti 100,000 a karnero.

⁵Ngem idi natay ni Ahab nga ari ti Israel, immalsa ni Mesa iti maibusor iti Israel.

⁶Dagus a pimmanaw ni Ari Joram idiay Samaria ket inummongna dagiti amin a mannakigubat ti Israel.

⁷Nangibaon kadagiti mapan ken ni Jehosafat nga ari ti Juda, ket kastoy ti pinaibagana, “Immalsa ti ari ti Moab. Di la mabalin a tulongannak a manggubat kenkuana?” “Wen,” insungbat ni Jehosafat. “Sidadaanak a tumulong kenka kasta met dagiti soldadok ken dagiti kabaliok.

⁸Ania ti dalan a surotentayo a rumaut?” “Magnatay iti let-ang ti Edom,” insungbat ni Joram.

⁹Nagrubbuat ngarud ni Ari Joram ken dagiti ari ti Juda ken Edom. Kalpasan ti pito nga aldaw a panagdaliasatda, naibusanda iti danum. Awanen ti inumen dagiti mannakigubat ken dagiti animal a para-awit iti karga.

¹⁰“Awanen ti mabalintay nga aramiden!” kinuna ni Joram. “Pinagtitiponnatayo a tallo ti Apo tapno parmekennatayo ti ari ti Moab!”

¹¹Sinaludsod ni Ari Jehosafat, “Adda kadi profeta ditoy a mabalintay a pakiumanan iti Apo?” Maysa nga ofisial iti armada ni Ari Joram ti simmungbat, “Adda ditoy ni Eliseo nga anak ni Safat. Isu idi ti katulongan ni Elias.”

¹²“Wen, napaypayso a profeta,” kinuna ni Ari Jehosafat. Iti kasta, napan dagiti tallo nga ari ken ni Eliseo.

¹³“Apay a siak ti pagpatulongam? Apay a dika mapan kadagiti profeta a nakium-umanan dagiti nagannak kenka?” kinuna ni Eliseo iti ari ti Israel. “Saanak a mapan kadakuada,” kinuna ni Joram. “Ti Apo ti nangyawat kadakami a tallo nga ari iti pannakabalin ti ari ti Moab.”

¹⁴Insungbat ni Eliseo, “Iti nagan ti Apo a sibibiag, isu a pagserserbiak, pulos a saanka nga ikankano no diak ipagpagapu ken Ari Jehosafat nga ari ti Juda.

¹⁵Ita, yegandak iti tumutokar.” Nagtungpalda ket bayat ti pannakatokar ti arpa, narikna ni Eliseo ti pannakabalin ni Yahweh

¹⁶ket kinunana, “Kastoy ti sao ti Apo: ‘Agkalikayo kadagiti kanal ditoy nagmaga a waig.

¹⁷Uray no awan makitayo a tudo wenno mariknayo nga angin, mapnonto iti danum daytoy a waig ket nabuslonto ti inumenyo agraman dagiti bakayo ken dagiti animal a para-awit iti kargayo.’”

¹⁸Ket intuloy ni Eliseo, “Ngem nalaka nga aramiden daytoy ti Apo; pagballigiennakayto pay kadagiti Moabita.

¹⁹Parmekenyonto amin a nasarikedkedan a siudadda. Pukanenyonto amin a kayoda nga agbunga, pullatanyonto dagiti ubbogda, ken dadaelenyonto amin a nadam-eg a talonda babaen iti pananggaburyo iti bato.”

²⁰Iti sumuno nga agsapa, iti oras ti panagidatag iti binigat a daton, nakitada ti agay-ayus a danum nga aggapu iti Edom ket nalapunos ti daga.

²¹Idi madamag dagiti Moabita a nagmaymaysa dagiti tallo nga ari a mangraut kadakuada, inayabanda dagiti amin a lallaki a makabalin nga agiggem iti armas, manipud iti kalakayan agingga iti kaubingan ket impuestoda ida iti beddeng.

²²Idi bumangon dagiti Moabita iti sumuno a bigat, nakitada ti danum a kasla dara gapu iti sumingsingsing nga init.

²³“Dara daytoy!” impukkawda. “Naggugubat ket ngatan dagiti tallo nga armada a kabusortayo ket nagpipinnatayda. Kakadua, intayon agsamsam iti kampoda!”

²⁴Ngem idi dumanonda iti kampo, dinarup ida dagiti Israelita. Nagtataray dagiti Moabita idinto nga intuloy dagiti Israelita ti panangkamatda kadakuada. Nagpapatayda kadagiti Moabita

²⁵ket rinebbada dagiti siudadda. No adda malabsanda a nadam-eg a talon, purruakan dagiti Israelita iti bato agingga a magaburan dagiti amin a talon. Pinullatanda dagiti ubbog ken pinukanda dagiti agbunga a kayo. Kamaudianna, ti laeng Kir Hareset ti nabati. Linawlaw dagiti Israelita sada rinaut daytoy kabesera a siudad.

²⁶Idi makita ti ari ti Moab nga awan duadua ti pannakaparmekna iti gubat, inkuyogna ti 700 a mannakigubat a nagtagikampilan ket pinadasda ti aglibas a mapan agkamang iti ari ti Siria ngem saanda a nagballigi.

²⁷Iti kasta, innala ti ari ti inauna nga anakna a sumukatto kenkuana nga ari ket impanna iti bakud ti siudad sana pinuoran a daton iti didiosen ti Moab. Nagbuteng dagiti Israelita ket nagsanudda sada nagsubli iti pagilianda.