Read Iloko 2 Kings 4 Bible Online

2 Kings 4 - Iloko bible

2 Kings 4

¹Napan ken ni Eliseo ti balo ti maysa kadagiti kameng ti bunggoy dagiti profeta ket kinunana, “Apo, natayen ti asawak, ket kas ammom, nagbiag a managbuteng iti Dios. Ita, adda lalaki a nakautanganna nga immay idiay balay ket kayatna nga alaen dagiti dua a lallaki nga annakko a kas tagabuna tapno mabayadan ti utang.”

²“Ania ti maitulongko kenka?” sinaludsod ni Eliseo. “Ania ti adda idiay balaymo?” “Awan a pulos, malaksid ti sangaputik a lana ti olibo,” insungbatna.

³“Inka bumulod kadagiti kaarrubam iti adu a putik nga awan nagyanna,” imbaga ni Eliseo.

⁴“Kalpasanna, sumrekkayo nga agiina iti balayyo, irikepyo ti ridaw ket bukbokanyo dagiti putik iti lana. Ilasinyo dagiti mapno a putik.”

⁵Iti kasta, napan ti babai agraman dagiti annakna iti balay, rinikpanda ti ridaw ket binukbokanna iti lana dagiti putik nga inyeg dagiti annakna kenkuana.

⁶Apaman a napno amin a putik, dinamagna no adda pay putik a makargaan. “Awanen,” insungbat ti maysa kadagiti annakna. Ket nagsardeng ti panagayus ti lana.

⁷Nagsubli ti ina ken ni Eliseo ket imbaga ti profeta, “Inka ilako ti lana ket bayadam ti amin nga utangmo; addanto pay mabati a kuarta nga umanay a pagbiagyo nga agiina.”

⁸Iti maysa nga aldaw, napan ni Eliseo idiay Sunem. Adda nabaknang a babai sadiay a nangawis kenkuana a makipangan iti balayda. Manipud idin, kanayon a mangan iti balay ti babai tunggal mapan iti dayta a lugar.

⁹Kinuna ti babai iti asawana, “Awan duaduak a nasantoan daytoy a lalaki a masansan nga umay ditoy.

¹⁰Mangaramidta iti akingngato a kuarto a mabalinna a pagyanan tunggal sarungkarannata. Mangikabilta iti katre, lamisaan, tugaw ken silaw.”

¹¹Iti maysa nga aldaw, napan ni Eliseo idiay Sunem ket simrek a naginana iti kuarto.

¹²Binilinna ni Gehazi nga adipenna nga ayabanna ti babai. Idi dumteng ti babai,

¹³kinuna ti profeta ken ni Gehazi, “Saludsodem no ania ti maipaayko kenkuana a kas subad ti amin a kinaimbagna a nangipaay kadagiti kasapulanta. Nalabit adda kayatna a paibaga iti ari wenno iti pangulo ti armada.” “Adda amin a kasapulak ditoy, iti sidong dagiti kailiak,” insungbat ti babai.

¹⁴Sinaludsod ni Eliseo ken ni Gehazi, “Ania ngarud ti maipaayko kenkuana?” Insungbatna, “Awan anakna ket lakayen ti asawana.”

¹⁵“Ibagam nga umay ditoy,” imbilin ni Eliseo. Ket nagtakder ti babai iti ridaw.

¹⁶Kinuna ni Eliseo kenkuana, “Iti kastoy a tiempo inton umay a tawen, addanton anakmo nga ub-ubbaem.” “Pangngaasim, apo, ta dinak ul-ulboden,” kinuna ti babai. “Taonaka ti Dios!”

¹⁷Ngem kas iti kinuna ni Eliseo, iti sumaruno a tawen, nangipasngay ti babai iti maysa a lalaki.

¹⁸Naglabas ti sumagmamano a tawen. Tiempo idi ti panagani. Iti maysa a bigat, napan ti ubing iti talon nga ayan ni tatangna agraman dagiti agan-ani.

¹⁹Pagammoan, impukkawna iti amana, “Nasakit ti ulok! Nasakit ti ulok!” “Ipanmo ti ubing iti inana,” kinuna ti ama iti maysa nga adipen.

²⁰Binagkat ti adipen ti ubing ket impanna iti inana. Sinaksaklot ti ina ti anakna agingga a natay ti ubing iti agmatuon.

²¹Impanna ti ubing iti kuarto ni Eliseo, impaiddana iti katre sa rimmuar ket inrikepna ti ridaw.

²²Inayabanna ti asawana ket kinunana, “Mangibaonka ditoy iti maysa nga adipen agraman maysa nga asno. Masapul a mapanak ken ni profeta Eliseo. Agsubliak met la a dagus.”

²³“Apay nga inka kenkuana ita nga aldaw?” sinaludsod ti asawana. “Saan met nga Aldaw a Panaginana wenno Fiesta ti Lutuad.” “Saan a bale,” insungbatna.

²⁴Pinasilyaanna ti asno ket imbilinna iti adipen, “Pagtarayem ti asno ket dimo pagin-innayaden malaksid no ibagak kenka.”

²⁵Nagrubbuat ngarud ket nagturong idiay Bantay Carmel nga ayan ni Eliseo. Nakita ni Eliseo a sumungsungad ti babai idi adayo pay ket kinunana ken ni Gehazi nga adipenna, “Kitaem, sumungsungad ti babai a taga-Sunem!

²⁶Darasem a mapan sabaten ket damagem no nasayaat met la ti kasasaadna, ti asawana ken ti anakna.” Imbaga ti babai ken ni Gehazi a nasayaat met la ti amin

²⁷ngem idi dumanon ken ni Eliseo iti bantay, nagpakleb ket inarakupna dagiti saka ti profeta. Iduron koma ni Gehazi ngem kinuna ni Eliseo, “Bay-am. Dimo aya makita a kasta unay ti ladingitna? Ket pulos nga awan ti imbaga ti Apo kaniak maipapan iti daytoy.”

²⁸Imbaga ti babai kenkuana, “Apo, dimmawatak kadi kenka iti anak? Diak aya impakpakaasi idi kenka a dinak ang-angawen?”

²⁹Binilin ni Eliseo ni Gehazi, “Darasem! Alaem ti sarukodko ket inkan. Dika agsardeng a mangkablaaw iti siasinoman a masabatmo ket no adda mangkablaaw kenka, dimo sungbatan. Agderetsoka a mapan iti balay ket iparabawmo ti sarukodko iti ubing.”

³⁰Kinuna ti babai ken ni Eliseo, “Isapatak iti sibibiag nga Apo, kasta met kenka a dika panawan!” Ngarud, kimmuyog ni Eliseo kenkuana.

³¹Immun-una a simmangpet ni Gehazi iti balay ti Sunamita. Iniggamanna ti sarukod iti ngatoen ti ubing ngem awan ti uni wenno aniaman a pakakitaan a sibibiag. Iti kasta, nagsubli a napan nangsabat ken ni Eliseo ket kinunana, “Saan a mariing ti ubing.”

³²Idi dumteng ni Eliseo, is-isu a simrek iti kuarto ket nakitana ti natay nga ubing a nakaunnat iti katre.

³³Inrikepna ti ridaw ket nagkararag ken ni Yahweh.

³⁴Kalpasanna, pinaklebanna ti ubing. Indekketna ti ngiwatna iti ngiwat ti ubing; dagiti matana kadagiti matana; ken dagiti im-imana kadagiti im-imana. Bayat ti panangarakupna iti ubing, pimmudot ti bangkay.

³⁵Timmakder ni Eliseo, nagpagnapagna iti kuarto sa met la nagsubli a nangarakup iti bangkay. Nagbaeng ti ubing iti namimpito ket immulagatna dagiti matana.

³⁶Binilin ni Eliseo ni Gehazi nga ayabanna ti ina ti ubing. Idi sumrek ti babai iti kuarto, kinuna ni Eliseo, “Adtoy ti anakmo.”

³⁷Nagpakleb ti babai iti sakaanan ti profeta; kalpasanna, innalana ti anakna sa pimmanaw.

³⁸Idi adda bisin a nagsaknap iti daga, napan manen ni Eliseo idiay Gilgal. Iti maysa nga aldaw, bayat ti panangisurona iti maysa a bunggoy dagiti profeta, imbagana iti adipenna a mangisaang iti dungdong tapno ilutoanna dagiti profeta.

³⁹Napan iti taltalon ti maysa kadakuada tapno agnateng. Nakasarak iti balang a mula a nagpurosanna iti adu a bunga. Inyawidna dagitoy, ginalipna ket indengdengna a dina ammo no ania dagitoy.

⁴⁰Idi maluton, nangidasarda iti kanen dagiti lallaki ngem apaman a maramananda, impukkawda, “Tao ti Dios, nasabidongan sa met daytoy!”—ket dida kayat a kanen.

⁴¹Nagpaala ni Eliseo iti bellaay, inwarakiwakna iti dungdong ket kinunana, “Mangidasarka manen iti agpaay kadakuada.” Saanen a makasabidong ti dinengdeng.

⁴²Iti naminsan, adda maysa a tao a naggapu idiay Baal Salisa. Inikkanna ni Eliseo iti 20 a tinapay a naaramid iti umuna a sebada a naapit iti dayta a tawen ken sumagmamano a kappuros a mais. Imbaga ni Eliseo iti adipenna nga ipakanna daytoy kadagiti profeta

⁴³ngem kinuna ti adipen, “Makaanay kadi daytoy a kanen ti 100 a tattao?” Insungbat ni Eliseo, “Itedmo a kanenda gapu ta kuna ti Apo a kanenda ket addanto pay matda.”

⁴⁴Naidasar ti taraon. Nanganda amin ket adda pay natda, kas imbaga ni Yahweh.