Read Iloko 2 Kings 5 Bible Online

2 Kings 5 - Iloko bible

2 Kings 5

¹Iti imatang ti ari ti Siria, natan-ok ni Naaman a pangulo ti armada ti Siria. Raraemenna unay agsipud ta gapu kenkuana, pinagballigi ni Yahweh ti armada ti Siria. Maingel a lalaki ni Naaman, ngem agkukutel.

²Iti naminsan nga iraraut dagiti taga-Siria iti Israel, nangyawidda iti balasitang nga Israelita ket nagbalin nga adipen ti asawa ni Naaman.

³Iti maysa nga aldaw, kinuna ti balasitang iti apona, “Makapan la koma ni apok a Naaman iti profeta nga agnaed idiay Samaria. Mapaimbagna ti sakitna.”

⁴Idi mangngeg daytoy ni Naaman, napan iti ari ket imbagana kenkuana ti kinuna ti balasitang.

⁵Kinuna ti ari, “Inka iti ari ti Israel ket itedmo kenkuana daytoy a surat.” Nagrubbuat ngarud ni Naaman. Nangitugot iti 30 a bagi ti pirak, 6,000 a bagi ti balitok ken sangapulo a napipintas a pagan-anay a pagsukatan.

⁶Kastoy ti nailanad iti intugotna a surat: “Daytoy a surat ti mangyam-ammo ken ni Naaman nga ofisialko. Kayatko a paimbagem ti sakitna.”

⁷Idi mabasa ti ari ti Israel daytoy a surat, rinay-abna ti kawesna iti rurodna ket kinunana, “Apay nga ipagarup ti ari ti Siria a maagasak daytoy a tao? Ipagarupna aya a maysaak a Dios nga adda pannakabalinna a mangbiag ken mangpapatay? Nalawag nga agbirbirok iti panggapuanna a makiriri kaniak!”

⁸Idi madamag ni profeta Eliseo ti napasamak, kastoy ti pinaibagana iti ari: “Apay a madi ti riknam? Ibaonmo kaniak ti lalaki ket ipakitak kenkuana nga adda maysa a profeta ditoy Israel!”

⁹Ngarud, napan ni Naaman agraman dagiti kabaliona ken luganna a pakigubat ket nagsardeng iti ruangan ti balay ni Eliseo.

¹⁰Nangibaon ni Eliseo iti adipen a mangibaga ken ni Naaman a mapan bumatok iti mamimpito iti Karayan Jordan tapno naan-anayto nga umimbag ti sakitna.

¹¹Ngem kasta unay ti pungtot ni Naaman a pimmanaw ket kinunana, “Impagarupko nga umaynak sabten, agkararag iti Apo a Diosna, aplawanna ti batog ti saksakiten ket maimbagan ti kukutel!

¹²Maysa pay, saan aya a nadaldalus dagiti karayan ti Abana ken Farpar idiay Damasco ngem iti aniaman a karayan iti Israel? Diak aya maimbagan no agdigosak kadagidiay a karayan?”

¹³Immasideg dagiti adipenna ket kinunada, “Apo, di met aya aramidem ti aniaman nga ipaaramid kenka ti profeta uray narigat? Ita, naglaka a banag ti ibagbagana. Dika pay la mapan bumatok tapno maimbaganka?”

¹⁴Iti kasta, napan ni Naaman iti Jordan, bimmatok iti namimpito kas imbaga ni Eliseo, ket naan-anay a naimbagan ti kukutelna. Simmalun-at ti kudilna a kas iti kudil ti maysa nga ubing.

¹⁵Nagsubli ken ni Eliseo agraman dagiti nangkuyog kenkuana ket kinunana, “Ita, ammokon nga awanen ti dios a kas iti Dios ti Israel. Pangngaasim ngarud, apo, ta awatem toy sagutko kenka.”

¹⁶Insungbat ni Eliseo, “Isapatak iti sibibiag a Dios, isu a pagserserbiak, a diak umawat iti aniaman a sagut.” Impapilit ni Naaman ti sagut, ngem saan nga inawat ni Eliseo.

¹⁷Iti kasta, kinuna ni Naaman, “No dimo awaten ti sagutko, di la mabalin a mangyawidak iti daga a kargaen ti dua a mulo? Ngamin, manipud ita, diakon agidatag kadagiti sakrifisio wenno mapuoran a daton iti siasinoman a didiosen malaksid iti Apo.

¹⁸Sapay koma ta pakawanennak ti Apo iti panangkuykuyogko iti ari a mapan agdaydayaw iti templo ni Rimmon, ti dios ti Siria. Ammok a pakawanennak ti Apo!”

¹⁹Pinalubosan ni Eliseo ni Naaman. Ket pimmanaw ni Naaman. Saan pay unay a nakaadayo ni Naaman

²⁰idi kinuna ni Gehazi iti bagina, “Pinalubosan ni apok ni Naaman nga awan pulos binayadanna! Inawatna koma ti indiaya ti Siriano. Kamakamek daytoy a Siriano ket dumawatak iti uray ania kenkuana.”

²¹Ngarud, sinurot ni Gehazi ni Naaman. Idi makita ni Naaman ti maysa a lalaki a kumamkamakam kenkuana, dimsaag iti luganna ket napanna sinabat. Sinaludsodna, “Adda kadi napasamak?”

²²“Awan,” insungbat ni Gehazi. “Ngem imbaonnak ti apok a mangipakaammo kenka nga adda dua a kameng ti bunggoy dagiti profeta a kasangsangpet manipud iti katurturodan ti Efraim ket kayatna nga ikkam ida iti 3,000 a bagi ti pirak ken dua a napipintas a pagan-anay a pagsukatan.”

²³“Wen. Ipakpakaasik nga alaem ti 6,000 a bagi ti pirak,” kinuna ni Naaman. Impapilitna nga alaen ni Gehazi ti pirak. Inkabilna ti pirak iti dua a supot. Intedna daytoy kasta met ti dua a pagsukatan a pagan-anay kadagiti dua nga adipenna ket pinaawitna kadakuada tapno itulodda ni Gehazi.

²⁴Idi dumanonda iti turod a pagnaedan ni Eliseo, innala ni Gehazi dagiti dua a supot sana impan iti uneg ti balay. Kalpasanna, pinagawidna dagiti adipen ni Naaman.

²⁵Nagsubli iti balay ket sinaludsod ni Eliseo, “Napanam, Gehazi?” “Saanak a pimmampanaw, apo,” kinunana.

²⁶Ngem kinuna ni Eliseo, “Adda ti espirituk sadiay idi dumsaag ti lalaki iti luganna tapno sabtennaka. Dika manggundaway babaen iti panangawat iti kuarta ken kawes, kaoliboan ken kaubasan, karnero ken baka wenno adipen!

²⁷Ita, kumpet kenka ti sakit ni Naaman, ket kumpet kenka ken kadagiti kaputotam iti agnanayon!” Idi pumanaw ni Gehazi, agkukutelen—pimmuraw ti kudilna a kas iti kapas.