Read Iloko 1 Chronicles 11 Bible Online

1 Chronicles 11 - Iloko bible

1 Chronicles 11

¹Sangsangkamaysa dagiti amin a tribu ti Israel a napan ken ni David idiay Hebron ket kinunada kenkuana, “Kakabagian ken kadaraannakami.

²Iti napalabas, uray idi ari pay laeng ni Saul, sika ti nangipangpangulo iti armada ti Israel iti paggugubatan. Inkari kenka ti Apo a Diosmo nga ipanguloamto dagiti tattaona ket sikanto ti mangituray kadakuada.”

³Ngarud, napan dagiti amin a pangulo ti Israel ken ni David idiay Hebron. Nakitulag kadakuada iti imatang ni Yahweh. Inkonsagrarda ni David ket nagbalin nga ari ti Israel, kas inkari ni Yahweh ken ni Samuel.

⁴Rinaut ni Ari David ken dagiti amin nga Israelita ti siudad ti Jerusalem. Maaw-awagan idi ti siudad iti Jebus, ket agnaed pay laeng sadiay dagiti Jebuseo a sigud a nagnaed iti dayta a lugar.

⁵Imbaga dagiti Jebuseo ken ni David a dina mastrek ti siudad, ngem pinarmek ni David ti sarikedked ti Sion ket napanaganan iti “Siudad ni David.”

⁶Kinuna ni David, “Ti umuna a makapatay iti Jebuseo, isunto ti agbalin a pangulo ti armada!” Ni Joab nga anak ni Sarvia ti nangidaulo kadagiti rimmaut ket nagbalin a pangulo.

⁷Gapu ta napan nagnaed ni David iti uneg ti sarikedked, napanaganan ti siudad iti “Siudad ni David.”

⁸Binangonna manen ti siudad; inrugina iti akindaya a bangir ti turod, iti lugar a nagaburan. Tinarimaan ni Joab ti dadduma a paset ti siudad.

⁹Bimmileg a bimmileg ni David ta adda kenkuana ni Yahweh a Mannakabalin-amin.

¹⁰Daytoy ti listaan dagiti nalatak a soldado ni David a timmulong kadagiti Israelita a nangisaad kenkuana nga ari kas inkari ni Yahweh ket isuda ti nangpabileg iti pagarianna.

¹¹Umuna ni Jasobeam iti kapuonan ni Hacmon. Isu ti pangulo “Dagiti Tallo.” Gayang ti inaramatna iti pannakigubatna kadagiti 300 a lallaki, ket pinatayna amin ida iti naminsan laeng a ranget.

¹²Ni Eleazar nga anak ni Dodo iti kapuonan ni Aho ti maikadua kadagiti agdindinamag a “Tallo.”

¹³Kaduana ni David a nakiranget kadagiti Filisteo idiay Pas Dammim. Adda idi iti talon a namulaan iti sebada idi agtataray dagiti Israelita.

¹⁴Ngem saan a nagtaray ni Eleazar ken dagiti soldadona ket nakirangetda kadagiti Filisteo iti tengnga ti talon. Impaay ni Yahweh kenkuana ti dakkel a balligi.

¹⁵Iti maysa nga aldaw, tallo kadagiti 30 a nalatak a soldado ti napan iti kabatoan a pagigianan ni David iti asideg ti Rukib ti Adullam. Nagkampo met dagiti Filisteo iti Tanap ti Refaim.

¹⁶Adda idi ni David iti nasarikedkedan a turod, ket sinakup ti maysa a bunggoy dagiti Filisteo ti Betlehem.

¹⁷Immapay ti iliw ni David ket kinunana, “Adda la koma mapan mangala iti danum nga inumek iti bubon iti abay ti ruangan ti Betlehem!”

¹⁸Sinarakusok dagiti tallo a mamaingel a soldado ti kampo dagiti Filisteo, simmakdoda iti bubon ket impanda ti danum ken ni David. Ngem saan nga ininum ni David; imbuyatna ketdi a kas daton ken ni Yahweh sana

¹⁹kinuna, “Diak mabalin nga inumen daytoy! Kasko la in-inumen ti dara dagitoy a lallaki a nangipusta iti biagda!” Isut' gapuna a dina kayat nga inumen ti danum. Dagitoy dagiti gapuanan dagitoy tallo a nalatak a mannakigubat.

²⁰Ni Abisai a kabsat ni Joab ti pangulo dagiti “Mamaingel a Tallopulo.” Babaen iti gayangna, pinatayna ti 300 a lallaki iti pannakirangetna kadakuada. Gapu iti daytoy, nagbalin a nalatak kadagiti “Tallopulo.”

²¹Isu ti kalatakan kadagiti “Tallopulo,” ket nagbalin a panguloda ngem dina naartapan “Dagiti Tallo.”

²²Maysa a nalatak a mannakigubat ni Benaias nga anak ni Jehoyada a taga-Kabzeel. Adu dagiti aramidna a nangipakitaanna iti kinaturedna. Pinatayna ti dua a nalaing a mannakigubat a Moabita. Iti naminsan nga agtudtudo iti niebe, napan iti maysa a rukib ket pinatayna ti maysa a leon.

²³Adda pay pinatayna nga Egipcio nga agtayag iti a pito ket gudua a kadapan. Siaarmas ti Egipcio iti nakadakdakkel a gayang. Pang-or ti armas ni Benaias a nangdarup iti Egipcio. Inagawna ti gayang ti Egipcio ket daytoy ti pinangpatayna kenkuana.

²⁴Dagitoy dagiti aramid ni Benaias a maysa kadagiti “Tallopulo.”

²⁵Maysa a maingel kadagiti “Tallopulo” ngem saan a nalatak a kas kadagiti “Tallo.” Isu ti dinutokan ni David a pangulo dagiti guardiana.

²⁶Dagitoy dagiti nalatak a mannakigubat: Ni Asael a kabsat ni Joab; ni Elhanan nga anak ni Dodo a taga-Betlehem; Sammot a taga-Harod; Helez a taga-Pelet; Ira nga anak ni Ikkes a taga-Tekoa; Abiezer a taga-Anatot; Sibbecai a taga-Husa; Ilai a taga-Aho; Maharai a taga-Netofa; Heled nga anak ni Baana a taga-Netofa; Itai nga anak ni Ribai a taga-Gabaa iti tribu ti Benjamin; Benaias a taga-Piraton; Hurai a naggapu kadagiti tanap iti asideg ti Gaas; Abiel a taga-Arba; Asmabet a taga-Bahurum; Eliaba a taga-Saalbon; Hasem a taga-Gizon; Jonatan nga anak ni Sagee a taga-Harar; Ahiam nga anak ni Sakar a taga-Harar; Elifal nga anak ni Ur; Hefer a taga-Mekera; Ahija, a taga-Pelon; Hezro a taga-Carmel; Naarai nga anak ni Ezbai; Joel a kabsat ni Natan; Mibhar nga anak ni Hagri; Zelek a taga-Ammon; Naharai a taga-Beerot (isu ti para-iggem iti armas ni Joab); Ira ken Gareb a taga-Jattir; Urias a Hiteo; Zabad nga anak ni Alai; Adina nga anak ni Siza (maysa a nalatak a kameng iti tribu ti Ruben ket adda tallopulo a soldadona.) Ha(...)