Read Iloko 1 Chronicles 15 Bible Online

1 Chronicles 15 - Iloko bible

1 Chronicles 15

¹Nagbangon ni David kadagiti balay a pagyananna iti Siudad ni David idiay Jerusalem. Nangisagana pay iti maysa a disso nga agpaay iti Lakasa ti Tulag ti Dios ket nangbangon iti tolda a pakaikabilanna.

²Kinunana, “Dagiti laeng Levita ti rumbeng a mangawit iti Lakasa ti Tulag ti Dios, gapu ta isuda ti pinilina a mangawit iti Lakasa ken agserbi kenkuana iti agnanayon.”

³Inummong ni David idiay Jerusalem dagiti amin nga Israelita tapno ipanda ti Lakasa ti Tulag iti lugar nga insaganana a pakaikabilanna.

⁴Kalpasanna, inayabanna dagiti kaputotan ni Aaron ken dagiti Levita.

⁵Iti familia ni Coat, dimmatag ni Uriel a nangipangulo kadagiti 120 a kakabagianna.

⁶Iti familia ni Merari, dimmatag ni Asaias a nangipangulo kadagiti 220 a kakabagianna.

⁷Iti familia ni Gersom, dimmatag ni Joel a nangipangulo kadagiti 130 a kakabagianna.

⁸Iti familia ni Elizafan, dimmatag ni Semaias a nangipangulo iti 200 a kakabagianna.

⁹Iti familia ni Hebron, dimmatag ni Eliel a nangipangulo iti 80 a kakabagianna.

¹⁰Iti familia ni Uzziel, dimmatag ni Aminadab a nangipangulo iti 112 a kakabagianna.

¹¹Pinaayaban ni David da Zadok ken Abiatar a papadi ken dagiti innem a Levita, da Uriel, Asaias, Joel, Semaias, Eliel ken Amminadab.

¹²Kinunana kadakuada, “Dakayo ti papangulo dagiti familia dagiti Levita. Dalusanyo dagiti bagbagiyo iti imatang ti linteg, dakayo ken dagiti padayo a Levita, tapno mabalinyo nga ipan ti Lakasa ti Tulag ti Apo a Dios ti Israel iti lugar nga insaganak a pakaikabilanna.

¹³Gapu ta awankay idi a mangbagkat iti damo a pannakayakarna, dinusanatayo ti Apo a Diostayo ta saantay a nagdaydayaw kenkuana a kas rebbengtayo.”

¹⁴Iti kasta, dinalusan dagiti papadi ken Levita dagiti bagbagida iti imatang ti linteg tapno yalisda ti Lakasa ti Tulag ni Yahweh a Dios ti Israel.

¹⁵Inassiwan dagiti Levita ti Lakasa ti Tulag ket imbaklayda kas imbilin idi ni Yahweh ken ni Moises.

¹⁶Binilin ni David dagiti pangulo dagiti Levita a mangdutokda kadagiti dadduma a Levita nga agkanta ken agtokar kadagiti naragsak nga aweng kadagiti arpa ken piangpiang.

¹⁷Kadagiti familia dagiti kumakanta, pinilida dagiti agtokar iti gumbang a piangpiang: ni Heman nga anak ni Joel, ni Asaf nga anak ni Berekias a kabagianna ken ni Etan nga anak ni Kusayas iti familia ni Merari. Pinilida dagiti sumaganad a tumulong kadakuada nga agtokar kadagiti piangpiang: da Zacarias, Jaaziel, Semiramot, Jehiel, Unni, Eliab, Maasias ken Benaias. Dagitoy dagiti Levita a pinilida nga agtokar kadagiti arpa: Mattitias, Elifelehu, Mikneias, Azazias ken da Obed Edom ken Jeiel a guardia ti Templo.

²²Ni Kenanias ti napili a pangulo dagiti musiko a Levita gapu iti laingna iti musika.

²³Da Berekias ken Elcana agraman da Obed Edom ken Jehias ti napili mangguardia iti Lakasa ti Tulag. Napili dagiti papadi—da Sebanias, Josafat, Netanel, Amasai, Zecarias, Benaias ken Eliezer—nga agtrumpeta iti sangoanan ti Lakasa ti Tulag.

²⁵Napan ni David, iti balay ni Obed Edom tapno alaenna ti Lakasa ti Tulag. Kaduana dagiti pangulo ti Israel ken dagiti pangulo dagiti mannakigubat ket kasta unay ti panagrambakda.

²⁶Nangidatonda iti pito a toro a baka ken pito a karnero tapno awan duadua a tulongan ti Dios dagiti Levita a mangaw-awit iti Lakasa ti Tulag.

²⁷Nagarruat ni David iti kawes a naaramid iti kapintasan a linen, kasta met dagiti musiko, ni Kenanias a panguloda ken dagiti Levita a nagawit iti Lakasa ti Tulag. Nagarruat met ni David iti efod a linen.

²⁸Ngarud, kinuyog dagiti amin nga Israelita ti Lakasa ti Tulag iti pannakaipanna idiay Jerusalem. Awan ressat ti panagdidir-ida, ti panaguni ti trumpeta, tangguyob ken piangpiang ken ti pannakatokar dagiti arpa.

²⁹Idi maiserrek ti Lakasa ti Tulag iti siudad, timmamdag ni Mical nga anak ni Saul ket nakitana ni Ari David nga agsalsala ken aglaglagto iti ragsakna. Inumsi ni Mical ti ari iti unegna.