Read Iloko 1 Chronicles 16 Bible Online

1 Chronicles 16 - Iloko bible

1 Chronicles 16

¹Impanda ti Lakasa ti Tulag iti uneg ti tolda a naisagana a pakaikabilanna. Kalpasanna, nagidatagda kadagiti daton a mapuoran ken daton a pakikappia iti Dios.

²Kalpasan ti panangidatag ni David kadagiti animal a mapuoran, binendisionanna dagiti tattao iti nagan ni Yahweh

³sa nagiwaras iti taraon. Inikkanna ti tunggal lalaki ken babai nga Israelita iti maysa a tinapay, tinuno a karne, ken kankanen a pasas.

⁴Nangdutok ni David iti sumagmamano a Levita a mangipangulo iti panagdaydayaw ken ni Yahweh a Dios ti Israel iti sangoanan ti Lakasa ti Tulag babaen iti panagkanta ken panangitan-ok kenkuana.

⁵Ni Asaf ti nadutokan a pangulo, ket ni Zacarias ti katulonganna. Da Jeiel, Semiramot, Jehiel, Mattitias, Eliab, Benaias, Obed Edom ken Jeiel dagiti para-tokar iti arpa. Ni Asaf ti para-piangpiang.

⁶Da Benaias ken Jahaziel a papadi ti para-trumpeta, ket aramidenda daytoy iti naituding a tiempo iti sangoanan ti Lakasa ti Tulag.

⁷Dayta ti umuna a pannangted ni David ken ni Asaf ken kadagiti padana a Levita iti annong a mangikankanta kadagiti pagdaydayaw iti Dios.

⁸Agyamankay iti Apo, awaganyo ti naganna, ipakaammoyo kadagiti tattao dagiti inar-aramidna!

⁹Kantaanyo ti Apo iti pagdaydayaw; ipakaammoyo dagiti inaramidna a nakaskasdaaw!

¹⁰Agragsaktayo ta kukuanatayo ti Apo; agragsak koma amin nga agdaydayaw kenkuana!

¹¹Inkay agpatulong iti Apo, ket kanayon nga agdaydayawkayo kenkuana.

¹²Dakayo a kaputotan ni Jacob nga adipen ti Dios, kaputotan ni Israel a pinili ti Dios, lagipenyo dagiti milagro nga inaramidna ken dagiti pangngeddeng nga impaulogna.

¹⁴Ti Apo ti Diostayo, agpaay dagiti bilinna iti entero a daga.

¹⁵Diyo lipatan ti katulaganna ken ni Abraham, ti inkarina ken ni Isaac ti tulag nga agpaay iti amin a kaputotan.

¹⁷Nakitulag ti Apo ken ni Jacob; agpaut iti agnanayon ti tulagda.

¹⁸“Itedkonto kenka ti daga ti Canaan,” kinunana, “sikanto ti akinkukua.”

¹⁹Bassit idi ti bilang dagiti tattao ti Dios, ganggannaetda iti daga ti Canaan.

²⁰Nagalla-allada kadagiti nadumaduma a nasion, nagalis-alisda kadagiti nadumaduma a pagarian.

²¹Ngem di impalubos ti Dios nga adda mangparigat kadakuada, binallaaganna dagiti ari tapno masalaknibanda.

²²“Diyo ranggasan dagiti pinilik nga adipenko; diyo sagiden dagiti bukodko a profeta.”

²³Kantaanyo ti Apo, dakay amin a tattao iti lubong! Inaldaw nga ipakaammoyo ti naimbag a damag nga insalakannatayo.

²⁴Ipakaammoyo ti dayagna kadagiti pagilian; kadagiti amin a tattao ibagayo dagiti nakaskasdaaw nga aramidna.

²⁵Naindaklan ti Apo, ket masapul nga idaydayawtayo; ad-adda nga isu ti kabutengtayo ngem ti siasinoman a didiosen.

²⁶Kinitikitan laeng nga imahen ti didiosen dagiti sabali a pagilian, ngem ti Apo ti namarsua kadagiti langit.

²⁷Dayag ken daeg ti manglikmut kenkuana, bileg ken rag-o ti mangpunno iti Templona.

²⁸Idaydayawyo ti Apo, dakayo amin a tattao ditoy daga, itan-okyo ti dayag ken pannakabalinna.

²⁹Idaydayawyo ti nadayag a nagan ti Apo; mangitugotkay iti daton ket umaykayo iti Templona. Agrukbabkay iti imatang ti Nasantoan no agparang.

³⁰Dakayo iti entero a daga, agpigergerkayo iti sangoananna, natibker ti pannakaipasdek ti daga ket saan a mayalis.

³¹Agragsakkayo, dakay a langit ken daga! Ibagayo kadagiti nasion a ti Apo ti ari.

³²Agdaranudorka, taaw ken amin nga adda kenka; agrag-okayo, dakayo a tay-ak ken amin nga adda kadakayo.

³³Agriawto dagiti kayo iti kabakiran gapu iti rag-o, inton umay ti Apo a mangituray iti daga.

³⁴Naimbag ti Apo, ket agyamankayo kenkuana agpaut nga agnanayon ti ayatna.

³⁵Ibagayo kenkuana, “Isalakannakam, O Dios a Mannubbotmi, ummongennakami, ket ispalennakami kadagiti nasion, tapno agyamankami kenka ket idaydayawmi ti nasantoan a naganmo.”

³⁶Idaydayawyo ti Apo a Dios ti Israel! Idaydayawyo iti agnanayon nga awan ti inggana. Ket kinuna dagiti amin a tattao: “Amen” sada indaydayaw ni Yahweh.

³⁷Dinutokan ni David ni Asaf ken dagiti padana a Levita a permanente a mangimaton iti panagdaydayaw iti lugar a nakaikabilan ti Lakasa ti Tulag. Inaldaw nga aramidenda ti annongda sadiay.

³⁸Tumulong kadakuada ni Obed Edom nga anak ni Jedutun ken 68 a kakabagianna. Da Hosa ken Obed Edom ti makaammo iti pannakaguardia dagiti ruangan.

³⁹Nupay kasta, ni Zadok ken dagiti padana a padi ti mangipangulo iti panagdaydayaw ken ni Yahweh iti santuario idiay Gabaon.

⁴⁰Binigat ken minalem nga agidatagda iti animal a mapuoran iti altar kas nailanad iti Linteg nga inted ni Yahweh iti Israel.

⁴¹Kaduada sadiay da Heman ken Jedutun, ken dagiti dadduma a napili nga agkanta iti pagdaydayaw ken ni Yahweh gapu iti agnanayon nga ayatna.

⁴²Naipaannong pay kada Heman ken Jedutun ti pannakapaguni dagiti trumpeta, piangpiang ken dadduma nga instrumento a mangdanggay kadagiti kanta a pagdaydayaw. Dagiti kamkameng ti familia ni Jedutun ti makaammo iti pannakaguardia dagiti ruangan.

⁴³Nagawid dagiti tattao. Nagawid met ni David tapno agyan pay laeng iti mabiit iti denna ti familiana.