Read Iloko 1 Chronicles 17 Bible Online

1 Chronicles 17 - Iloko bible

1 Chronicles 17

¹Agtataengen ni Ari David iti palasiona. Iti maysa nga aldaw, pinaayabanna ni profeta Natan ket imbagana kenkuana, “Adtoy nga agnanaedak iti balay a naaramid iti sedro ngem tolda laeng ti nakaikabilan ti Lakasa ti Tulag ti Apo!”

²Insungbat ni Natan, “Aramidem ti aniaman a panggepmo ta adda kenka ti Dios.”

³Ngem iti dayta a rabii, kinuna ti Dios ken ni Natan,

⁴“Inka ibaga ken ni David nga adipenko: ‘Saan a sika ti mangbangon iti templo a pagnaedak.

⁵Manipud inispalko dagiti Israelita idiay Egipto agpapan ita, diak pay nagnaed iti templo. Nagdaldaliasatak a nagnaed iti tolda.

⁶Iti amin a pannakipagdaliasatko kadagiti Israelita, diak pay sinaludsod kadagiti dinutokak a pangulo no apay a didak imbangonan iti templo a naaramid iti sedro.’

⁷“Ibagam ngarud ken ni adipenko a David a siak, ni Yahweh a Mannakabalin-amin, kastoy ti kunak kenkuana: ‘Innalaka iti pagpastoran iti karnero kadagiti away ket tinudinganka a mangituray kadagiti tattaok nga Israelita.

⁸Kinuykuyogka iti sadinoman a napanam ket pinarmekko amin a kabusormo tunggal dumarupka. Pagbalinenkanto a naindaklan a kas kadagiti kamainglan a pangulo ditoy lubong.

⁹Nangpiliak iti lugar a pagnaedan dagiti tattaok nga Israelita ket pinagtaengko ida sadiay nga awanton mangidadanes kadakuada. Manipud simmangpetda iti daytoy a daga, rinaraut dagiti naranggas a tattao ida ngem dinton mapasamak dagitoy. Ikarik a parmekek amin a kabusormo ken taginayonekto ti kaputotam.

¹¹Inton matayka ket maitanemka a kas kadagidi kapuonam, isaadkonto ti maysa kadagiti annakmo nga agari ket pabilgekto ti pagarianna.

¹²Isunto ti mangbangon iti templok ket ikagumaak a mataginayon ti panagturay dagiti kaputotanna.

¹³Siakto ti amana ket isunto ti anakko. Diakto isardeng ti panangtulongko kenkuana a kas iti panangisardengko iti tulongko ken ni Saul nga inikkatko tapno agbalinka nga ari.

¹⁴Isaadkonto a mangituray kadagiti tattaok ken iti pagariak iti agnanayon. Dinto agpatingga ti panagturay dagiti kaputotanna.’”

¹⁵Imbaga ni Natan ken ni David ti amin nga impaltiing kenkuana ti Dios.

¹⁶Simrek ni Ari David iti nasagradoan a Tolda, nagtugaw ket inkararagna: “O Apo Dios, saanak a maikari wenno ti familiak iti impaaymo kaniak.

¹⁷Uray ita, ad-adu pay ti ipapaaymo; nagkarika iti maipapan kadagiti kaputotak iti masakbayan ket sika, O Apo Dios, ibilbilangnakon a kas naindaklan a tao.

¹⁸Ania pay ti mabalinko nga ibaga kenka? Am-ammonak unay; nupay kasta, padayawannak nga adipenmo.

¹⁹Daytoy ti pagayatam ken panggepmo nga aramidem kaniak ken iti panangipakitam iti kinatan-okko iti masakbayan.

²⁰O Apo, awanen ti kas kenka; awan ti sabali a Dios kadakami no di laeng siksika.

²¹Awanen ti sabali a nasion ditoy lubong a kas iti Israel nga inispalmo iti pannakatagabuna tapno kukuam. Nagsaknap ti kinalatakmo iti entero a lubong gapu kadagiti naindaklan ken nakaskasdaaw a banag nga impaaymo kadakuada. Inispalmo dagiti tattaom idiay Egipto ket pinagtalawmo dagiti dadduma a nasion idi dumteng dagiti tattaom.

²²Pinagbalinmo dagiti Israelita a tattaom iti agnanayon ket sika, O Apo, ti nagbalin a Diosda.

²³“Ita, O Apo Dios, agnanayon koma a tungpalem ti karim nga aramidem nga agpaay kaniak ken kadagiti kaputotak.

²⁴Maitantan-okkanto unay ket kunkunanto nga agnanayon dagiti tattao, ‘Ti Apo a Mannakabalin-amin ti Dios ti Israel.’ Taginayonemto ti panagturay dagiti kaputotak.

²⁵Naturedak a mangikararag iti daytoy a kararag kenka, O Diosko, agsipud ta impaltiingmo kaniak nga adipenmo, amin dagitoy ket imbagam a pagbalinemto nga ari dagiti kaputotak.

²⁶Sika, O Apo, maysaka a Dios ket sika ti nangikari iti daytoy nakaskasdaaw a banag kaniak.

²⁷Dawatek a bendisionam dagiti kaputotak tapno agtultuloy latta ti panaglak-amda iti paraburmo. O Apo, binendisionam ida ket agtalinaed koma nga agnanayon ti bendisionmo kadakuada.”