Read Iloko 1 Chronicles 19 Bible Online

1 Chronicles 19 - Iloko bible

1 Chronicles 19

¹Iti saan a mabayag, natay ni Naas nga ari ti Ammon. Ni Hanun nga anakna ti simmukat kenkuana nga ari.

²Kinuna ni David, “Masapul nga ipakitak ti napudno a pannakigayyemko ken ni Hanun a kas iti impakita daydi amana kaniak.” Nangibaon ngarud ni David kadagiti tattaona tapno idanonda ti pannakipagladingitna. Idi sumangpetda idiay Ammon ket dimmatagda ken ni Ari Hanun,

³kinuna dagiti pangulo dagiti Ammonita iti ari, “Mamatika kadi nga imbaon ni David dagitoy a tattao tapno yebkasda ti pannakipagladingitda kenka iti ipapatay ni amam? Saan! Imbaonna ida ditoy a kas espia a mangwanawan iti daga tapno maparmekna!”

⁴Pinatiliw ni Hanun dagiti imbaon ni David, kiniskisanna dagiti barbasda, pinutedna ti pagan-anayda agingga iti patongda sana pinagawid ida.

⁵Gapu iti bainda, saanda a nagawid. Idi madamag ni David ti napasamak, pinaibagana kadakuada nga agyanda pay laeng idiay Jerico ket sadanto la agsubli inton agtubo manen dagiti barbasda.

⁶Nabigbig ni Ari Hanun ken dagiti Ammonita a nagbalin a kabusorda ni David ket nangarkilada kadagiti lugan a pakigubat ken tattao manipud iti Akingngato a Mesopotamia ken idiay Maaca ken Soba iti pagilian ti Siria. Nagbayadda iti dandani 40 a tonelada a pirak.

⁷Dimteng dagiti 32,000 a lugan a pakigubat ken ti armada ti ari ti Maaca ket nagkampoda iti asideg ti Medeba. Rimmuar met dagiti Ammonita kadagiti siudadda ket nagsaganada a makigubat.

⁸Idi madamag ni David ti mapaspasamak, imbaonna ni Joab ken ti entero nga armada.

⁹Rimmuar dagiti Ammonita ket nagpuestoda iti pagserkan ti Rabba, ti kabesera a siudad. Nagyan met iti away iti ruar ti ili dagiti ari a napan timmulong.

¹⁰Nakita ni Joab a darupen ida dagiti kabusor iti sangoanan ken iti likudan. Pinilina ngarud dagiti kalaingan a mannakigubat nga Israelita ket impuestona ida a sumaranget kadagiti Siriano.

¹¹Imbaonna dagiti dadduma a soldadona iti babaen ni Abisai a kabsatna a nangipasango met kadakuada a sumaranget kadagiti Ammonita.

¹²Kinuna ni Joab kenkuana, “No makitam a saanmi a kabaelan dagiti taga-Siria, umaynak tulongan. No makitak met a diyo kabaelan dagiti Ammonita, umayka met tulongan.

¹³Tumuredkayo. Makigubattayo a sipipinget gapu iti pagiliantayo ken gapu kadagiti siudad ti Diostayo. Maaramid koma ti pagayatan ti Apo.”

¹⁴Dimmarup ni Joab ken dagiti tattaona ket nagtataray dagiti Siriano.

¹⁵Idi makita dagiti Ammonita nga agtatarayda, intarayanda met ni Abisai ket simrekda iti siudad. Kalpasanna, nagsubli ni Joab idiay Jerusalem.

¹⁶Nakita dagiti Siriano a pinarmek dagiti Israelita ida. Pinaayabanda ngarud dagiti soldado kadagiti pagilian ti Siria iti dayaen ti Karayan Eufrates. Insaadda ni Sobak a pangulo ti armada ni Adadezer a mangipangulo kadakuada.

¹⁷Idi madamag ni David daytoy, inummongna ti armada ti Israel. Binallasiwda ti Jordan ket nagpuestoda a sumaranget kadagiti Siriano. Nangrugi ti dangadang,

¹⁸ket nagtataray ti armada dagiti Siriano. Pinatay ni David ken dagiti tattaona ti 7,000 a Siriano a mangiturturong kadagiti lugan a pakigubat ken 40,000 a mannakigubat. Pinatayda met ni Sobak a pangulo ti armada dagiti Siriano.

¹⁹Idi makita dagiti ari a pasurot ni Adadezer a pinarmek ida dagiti Israelita, nakikappiada ken ni David ket pinaiturayanda kenkuana.

²⁰Manipud idin, saanen a kayat dagiti Siriano ti tumulong kadagiti Ammonita.