Read Iloko 1 Chronicles 21 Bible Online

1 Chronicles 21 - Iloko bible

1 Chronicles 21

¹Kayat ni Satanas a riribuken dagiti Israelita, isut' gapuna nga inallukoyna ni David a mangsensus kadagiti Israelita.

²Binilin ni David ni Joab ken dagiti dadduma a pangulo ti armada, “Sursorenyo ti entero nga Israel, manipud Beerseba agingga idiay Dan, ket bilangenyo dagiti tattao sayonto ipakaammo kaniak ti dagupda.”

³Simmungbat ni Joab: “Sapay koma ta paaduen ti Apo ti bilang dagiti Israelita. Natan-ok nga Ari, adipenmo amin ida. Apay a kayatmo nga aramiden daytoy a banag ket pagbasolem ti entero a nasion?”

⁴Nupay kasta, ti sao ti ari ti natungpal. Sinursor ni Joab ti entero nga Israel ket kalpasanna, nagsubli idiay Jerusalem.

⁵Imbagana ken ni Ari David ti dagup dagiti lallaki a mabalin nga agsoldado: 1,100,000 iti Israel, ken 470,000 iti Juda.

⁶Gapu ta saan nga inanamongan ni Joab ti bilin ti ari, dina inraman a binilang dagiti tribu ti Levi ken Benjamin.

⁷Saan a naragsakan ti Dios iti naaramid, isut' gapuna a dinusana dagiti Israelita.

⁸Iti kasta, kinuna ni David iti Dios, “Nakabasolak iti nadagsen iti kastoy nga inaramidko. Pangngaasim ta pakawanennak; minamaag ti inaramidko.”

⁹Kinuna ni Yahweh ken ni Gad a pagipadpadtoen ni David,

¹⁰“Inka ibaga ken ni David nga ikkak iti tallo a pagpilianna. Aramidek ti pilienna a pangdusak kenkuana.”

¹¹Napan ni Gad ken ni David ket imbagana ti sao ni Yahweh, “Agpilika iti kayatmo:

¹²Tallo a tawen a panagbisin? Tallo a bulan nga itartarayam ti armada dagiti kabusormo? Wenno tallo nga aldaw a panangdarup ti Apo kenka babaen iti kampilan ken panangibaonna iti anghelna a mangyeg iti patay iti entero nga Israel? Ania ti ibagak iti Apo?”

¹³Daytoy ti insungbat ni David ken ni Gad, “Narikut ti sasaadek! Ngem diak kayat a ti tao ti mangdusa kaniak. Yantangay ta manangngaasi ti Apo, bay-am nga isu ti mangdusa kaniak.”

¹⁴Nangyeg ngarud ni Yahweh iti angol kadagiti Israelita ket 70,000 ti natay.

¹⁵Nangibaon ti Dios iti anghel a mangdadael iti Jerusalem, ngem nagbaliw ti panunotna idi ipatungpalna ti bilin ket kinunana, “Isardengmon! Isunan!” Nakatakder idi ti anghel iti asideg ti pagirikan ni Arauna a Jebuseo.

¹⁶Nakita ni David ti anghel nga agtaktakder iti nagbaetan ti langit ken daga. Nakaiggem ti anghel iti kampilan ket sisasagana a mangdadael iti Jerusalem. Nagpakleb ni David ken dagiti pangulo dagiti tattao—nakakawesda amin iti nakersang a lupot

¹⁷ket inkararagna, “O Dios, siak ti nagbasol. Siak ti nagpasensus. Awan ti basol dagitoy a tattao. O Apo a Diosko, dusaennakami a sangafamilian ngem ispalem dagiti tattaom.”

¹⁸Imbaga ti anghel ni Yahweh ken ni Gad a bilinenna ni David a mangbangon iti altar a pagdaydayawan ken ni Yahweh iti pagirikan ni Arauna.

¹⁹Tinungpal ni David ti bilin ni Yahweh ket napan kas iti imbaga ni Gad kenkuana.

²⁰Agir-irik idi iti trigo ni Arauna ken dagiti uppat a lallaki nga annakna. Apaman a nakitada ti anghel, nagtaray dagiti annakna a napan naglemmeng.

²¹Idi makita ni Arauna a sumungsungad ni Ari David, pimmanaw iti pagirikan ket nagpakleb iti sangoanan ni David.

²²Kinuna ni David kenkuana, “Ilakom kaniak ti disso a pagir-irikam tapno adda pangbangonak iti altar nga agpaay iti Apo ket iti kasta, sumardeng ti angol. Itedko ti tumutop a bayadna.”

²³Kinuna ni Arauna, “Alaem latta, Natan-ok nga Ari. Aramidem ti kayatmo. Adtoy dagiti baka nga idatagmo a daton a mapuoran. Adda met ditoy dagiti pagirik a tabla a pagsungrodmo ken trigo a maidatag a daton a makan. Ipadawatko amin dagitoy kenka.”

²⁴Ngem simmungbat ti ari, “Saan! Itedko ti tumutop a bayadna. Diak kayat nga idaton iti Apo ti aniaman a kukuam a saanko a binayadan.”

²⁵Inikkanna ni Arauna iti 600 a bagi ti balitok a bayad ti pagirikan.

²⁶Nangbangon sadiay iti altar a maipaay ken ni Yahweh ket nagidatag kadagiti daton a mapuoran ken daton a pakikappia. Nagkararag ket sinungbatan ni Yahweh babaen iti panangyegna iti apuy a nanguram kadagiti daton iti altar.

²⁷Imbaga ni Yahweh iti anghel nga isublina ti kampilanna iti kalubanna. Nagtungpal ti anghel.

²⁸Gapu iti daytoy, nabigbig ni David nga impangag ni Yahweh ti kararagna, isu a nagidatag kadagiti daton iti altar iti pagir-irikan ni Arauna.

²⁹Kadagitoy nga aldaw, adda pay laeng iti let-ang ti nasagradoan a tolda ni Yahweh nga inaramid ni Moises ken ti altar a pagidatagan iti daton a mapuoran iti pagdaydayawan idiay Gabaon.

³⁰Ngem saan a nakapan ni David sadiay tapno agdaydayaw iti Dios, agsipud ta kabutengna ti kampilan ti anghel ni Yahweh.