Read Iloko 1 Chronicles 22 Bible Online

1 Chronicles 22 - Iloko bible

1 Chronicles 22

¹Kinuna ngarud ni David, “Ditoyto ti pakabangonan ti Templo ti Apo a Dios. Daytoy ti altar a pagidatagan dagiti Israelita kadagiti datonda a mapuoran.”

²Imbilin ni Ari David nga aguummong dagiti amin a ganggannaet nga agnanaed iti Israel, ket pinagtrabahona ida. Sumagmamano kadakuada ti nagisagana kadagiti natikapan a bato a mausar iti pannakabangon ti Templo.

³Nangted ti ari iti adu a landok a maaramid a lansa ken pangpairut kadagiti kayo a ruangan ken nakaad-adu a bronse a narigat a timbangen.

⁴Nagpaala iti adu a troso a sedro ket inyeg dagitoy dagiti tattao ti Tiro ken Sidon.

⁵Kinuna ni David iti nakemna, “Masapul a nadaeg ken pagdidinnamaganto iti sangalubongan ti Templo a bangonento ni anakko a Solomon. Ngem ubing pay ket awan ti padpadasna. Iti kasta, masapul nga isaganaak daytoy a Templo.” Nagurnong ngarud ni David iti adu a materiales a kasapulan iti pannakabangon ti templo sakbay ti ipapatayna.

⁶Pinaayaban ni David ni Solomon nga anakna ket binilinna a mangbangon iti templo nga agpaay ken ni Yahweh a Dios ti Israel.

⁷Kinuna ni David kenkuana, “Anakko, kayatko idi ti mangbangon iti templo a pakaidayawan ti Apo a Diosko.

⁸Ngem imbagana kaniak nga adu unay ti pinatayko a tattao ken namin-aduak a nakigubgubat. Dinak palubosan a mangbangon iti templo nga agpaay kenkuana gapu kadagiti adu a dara nga imbuyatko.

⁹Nupay kasta, inkarina kaniak, ‘Addanto anakmo nga agturay. Addanto talna iti pagarianna agsipud ta dinto riribuken dagiti kabusorna. Solomon ti nagannanto agsipud ta itedkonto iti Israel ti talna ken talged kabayatan ti panagturayna.

¹⁰Bangonennanto ti templo a maipaay kaniak. Ibilangkonto nga anakko, ket siakto ti amana. Agnanayonto a dagiti kaputotanna ti mangituray iti Israel.’”

¹¹Intuloy ni David, “Ita, anakko, sapay koma ta adda kenka ti Apo a Diosmo, ket sapay koma ta tungpalenna ti karina nga agballigika a mangbangon iti templona.

¹²Paraburannaka koma ti Apo a Diosmo iti pannakaawat ken sirib tapno maiturayam ti Israel iti mayannurot iti Lintegna.

¹³No tungpalem dagiti amin a linteg nga inted ti Apo ken ni Moises nga agpaay kadagiti Israelita, agballigikanto. Papigsaem ti pakinakemmo. Dika agbuteng iti uray ania.

¹⁴Intedko ti amin a kabaelak a nagurnong iti agpaay iti pannakabangon ti Templo ti Apo. Nakaurnongak iti agarup 4,000 a tonelada a balitok, ken aganay nga 40,000 a tonelada a pirak. Malaksid kadagitoy, adda pay nawadwad a bronse ken landok a mausar. Nangisaganaak pay iti adu a kayo ken bato, ngem masapul a nayonam pay.

¹⁵Adu a tattao ti mabalinmo a pagtrabahoen. Adda dagiti para-tikap iti bato, adda met kantero ken karpintero, ken adu dagiti nalalaing nga agtrabaho iti nadumaduma nga aramid

¹⁶iti balitok, pirak, bronse ken landok. Ita, irugimon ti trabaho ket tulongannaka koma ti Apo.”

¹⁷Binilin ni David dagiti amin a pangulo dagiti Israelita a tulonganda ni Solomon.

¹⁸Kinunana, “Adda kadakayo ti Apo a Diosyo, ket pinaraburannakayo iti talna iti likmutyo. Pinagballiginak a nangparmek kadagiti tattao a nagnaed ditoy a daga. Ita, addadan iti babaen ti turayyo ken iti turay ti Apo.

¹⁹Agserbikayo ngarud iti Apo a Diosyo iti amin a puso ken kararuayo. Irugiyon a bangonen ti Templo a pakadaydayawan ti Apo tapno maikabil iti unegna ti Lakasa ti Tulag ti Apo ken dagiti amin a nasagradoan nga alikamen a maaramat iti panagdaydayaw kenkuana.”