Read Iloko 1 Chronicles 24 Bible Online

1 Chronicles 24 - Iloko bible

1 Chronicles 24

¹Dagitoy dagiti bunggoy a nagtaud ken ni Aaron. Uppat ti lallaki nga annak ni Aaron: da Nadab, Abiu, Eleazar ken Itamar.

²Immun-una a natay da Nadab ken Abiu ngem ti amada, ket awan ti annakda. Daytoy ti gapuna a nagpadi da Eleazar ken Itamar a kakabsatda.

³Binunggo-bunggoy ni Ari David dagiti kaputotan ni Aaron kas mayannurot kadagiti trabahoda. Timmulong kenkuana ni Zadok, iti kaputotan ni Eleazar, ken ni Ahimelec, iti kaputotan ni Itamar.

⁴Sangapulo ket innem a grupo ti nakabunggoyan dagiti kaputotan ni Eleazar. Walo met a grupo ti nakabunggoyan dagiti kaputotan ni Itamar. Naaramid daytoy ta ad-adu ti lallaki a pangulo ti familia kadagiti kaputotan ni Eleazar.

⁵Gapu ta adda dagiti ofisiales ti Templo ken dagiti pangulo kadagiti naespirituan a banag a nagtaud kadagiti kaputotan da Eleazar ken Itamar, naited ti annong dagiti papadi babaen iti binnunot.

⁶Kalpasanna, inlista ida ni Semaias nga anak ni Netanel a sekretario a Levita. Naimatangan daytoy ti ari, dagiti ofisialesna, ni Zadok a padi, ni Ahimelec nga anak ni Abiatar ken dagiti pangulo dagiti familia dagiti papadi ken dagiti Levita. Nagsusublat dagiti kaputotan ni Eleazar ken ni Itamar iti panagbibinnunotda.

⁷Daytoy ti panagsasaganad dagiti 24 a grupo ti familia idi bunotenda ti annongda: 1) Jehoyarib; 2) Jedayas; 3) Harim; 4) Seorim; 5) Malkija; 6) Mijamin; 7) Hakkoz; 8) Abias; 9) Jesua; 10) Secanias; 11) Eliasib; 12) Jakim; 13) Huppa; 14) Jesebeab; 15) Bilga; 16) Immer; 17) Hezir; 18) Happizzez; 19) Petahias; 20) Jehezkel; 21) Jakin; 22) Gamul; 23) Delaias; 24) Maazias.

¹⁹Nailista dagitoy a lallaki segun kadagiti annongda no sumrekda iti Templo ket aramidenda dagiti pagrebbenganda nga intuyang ni Aaron a kapuonanda kas panagtungpalda kadagiti bilin ni Yahweh a Dios ti Israel.

²⁰Dagitoy ti dadduma a pangulo ti familia a nagtaud ken ni Levi: Jehedias, iti kaputotan ni Subael a nagtaud ken ni Amram;

²¹Isias, iti kaputotan ni Rehabia;

²²Jahat, iti kaputotan ni Selomit a nagtaud ken ni Isar;

²³Jerias, Amarias, Jehaziel, ken Jakameam nga annak ni Hebron, segun ti panagsasaganad ti tawenda;

²⁴Samir, iti kaputotan ni Mikeas a nagtaud ken ni Uzziel;

²⁵ken Zacarias, iti kaputotan ni Isias a nagtaud ken ni Uzziel. Agkabsat da Isias ken Mikeas.

²⁶Dagiti kaputotan ni Merari: da Mali, Musi ken Jaazias.

²⁷Tallo ti annak ni Jaazias: Soham, Zaccur ken Ibri.

²⁸Dua ti annak ni Mali: da Eleazar ken Kis. Awan ti anak ni Eleazar ngem adda maysa nga anak ni Kis, isu ni Jerameel.

³⁰Tallo ti annak ni Musi: da Mali, Eder ken Jerimot. Dagitoy dagiti familia dagiti Levita.

³¹Ti pangulo ti tunggal familia ken ti adienna ti bimmunot kadagiti annongda kas iti inaramid dagiti kakabagianda a papadi a nagtaud ken ni Aaron. Naimatangan daytoy ni Ari David, Zadok, Ahimelec ken dagiti pangulo dagiti familia dagiti papadi ken dagiti Levita.