Read Iloko 1 Chronicles 26 Bible Online

1 Chronicles 26 - Iloko bible

1 Chronicles 26

¹Kastoy ti pannakaiwaras ti trabaho dagiti Levita a nagserbi a guardia ti Templo. Iti familia ni Kora, ni Meselemias nga anak ni Kore iti familia ni Asaf.

²Pito dagiti lallaki nga annak ni Meselemias: da Zacarias, Jediael, Zebadias, Jatniel,

³Elam, Jehohanan ken Eliehoenai.

⁴Adda met ni Obed Edom a pinaraburan ti Dios iti walo nga annak a lallaki: da Semaias, Jehozabad, Joa, Sakar, Netanel,

⁵Ammiel, Issacar ken Peulletai.

⁶Innem ti annak ni Semaias, ti inauna nga anak ni Obed Edom: Otni, Refael, Obed, Elzabad, Eliu ken Semakias. Mabigbigda a kameng ti familiada gapu iti naidumduma a kabaelanda. Naisangsangayan ti saririt da Eliu ken Semakias.

⁸Agdagup iti 62 a lallaki iti familia ni Obed Edom ti nagpaay iti daytoy a trabaho; naan-anay ti pannakasanayda.

⁹Sangapulo ket walo ti nagtaud iti familia ni Meselemias. Nasanayda iti trabahoda.

¹⁰Nagtaud ni Hoza iti familia ni Merari. Adda uppat nga annakna: ni Simri (nupay saan nga isu ti inauna, dinutokan ni amana a panguloda),

¹¹da Hilkias, Tebalias ken Zacarias. Sangapulo ket tallo amin ti nagtaud iti familia ni Hosa a nagserbi a guardia ti Templo.

¹²Nagrupo-grupo dagiti guardia iti Templo segun ti familiada. Naikkanda iti annong iti Templo a kas kadagiti dadduma a Levita.

¹³Nagbibinnunot ti tunggal familia, aduda man wenno bassitda, tapno ammoda ti ruangan a guardiaanda.

¹⁴Nabunot ni Selemias ti akindaya a ruangan ket ti met akin-amianan a ruangan ti naited ken ni Zacarias nga anakna, maysa a nalaing a mammagbaga.

¹⁵Nadutokan ni Obed Edom a mangguardia iti akin-abagatan a ruangan. Nadutokan met dagiti annakna a mangguardia iti pagidulinan.

¹⁶Naited kada Suppim ken Hosa ti akinlaud a ruangan ken ti Ruangan a Salleket iti akingngato a dalan. Nabingaybingayda ket natudingan ti oras a panagguardia ti tunggal grupo.

¹⁷Innem ti agguardia iti inaldaw iti akindaya a ruangan. Sagpapat ti mangguardia iti akin-amianan ken iti akin-abagatan. Uppat met ti agguardia nga inaldaw kadagiti balay a pagidulinan, dua iti tunggal balay a pagidulinan.

¹⁸Adda uppat a guardia iti asideg ti akinlaud nga intar dagiti adigi iti igid ti dalan, ket adda met dua iti mismo nga intar dagiti adigi.

¹⁹Kasta ti naituding a batang ti panagguardia ti familia ni Kora ken ti familia ni Merari.

²⁰Dagiti dadduma a padada a Levita ti mangaywan kadagiti pagidulinan iti gameng iti Templo ken dagiti pagidulinan kadagiti sagut a naidaton iti Dios.

²¹Ni Ladan nga anak ni Gerson ti nagtaudan ti adu a grupo ti familia, agraman ti familia ni Jehiel.

²²Dua a kameng daytoy a familia—dagiti agkabsat a Zetam ken Joel—ti agaywan iti pagidulin ti gameng iti Templo ken pagidulinan kadagiti sagut.

²³Naikkan met iti trabaho dagiti kaputotan da Amram, Isar, Hebron ken Uzziel.

²⁴Ni Sebuel a nagtaud iti familia ni Gerson nga anak ni Moises ti kangatoan nga ofisial kadagiti agaywan iti pagidulinan iti gameng ti Templo.

²⁵Agkabagian da Sebuel ken Selomit gapu ken ni Eliezer a kabsat ni Gersom. Ni Eliezer ti ama ni Rehabia nga ama ni Jesayas nga ama ni Joram nga ama ni Zikri nga ama ni Selomit.

²⁶Ni Selomit ken dagiti kameng ti familiana dagiti nadutokan nga agaywan iti amin a sagut iti Dios nga indaton ni Ari David, dagiti ulo ti familia, dagiti pangulo dagiti grupo dagiti kapuonan ken dagiti ofisiales ti armada.

²⁷Nangalada iti dadduma kadagiti nasamsamda iti gubat ket indatonda a mausar iti Templo.

²⁸Ni Selomit ken ti familiana ti agaywan kadagiti amin a naidaton a mausar iti Templo agraman dagiti sagut nga inyeg ni profeta Samuel, ni Ari Saul, ni Abner nga anak ni Ner ken ni Joab nga anak ni Sarvia.

²⁹Kadagiti kaputotan ni Isar, nadutokan ni Kenanias ken dagiti annakna nga agaywan kadagiti sinuratan maipapan kadagiti mapaspasamak ken mangrisut kadagiti riri dagiti Israelita.

³⁰Iti kaputotan ni Hebron, nadutokan ni Hasabias ken 1,700 kadagiti kakabagianna a pasig a mamaingel, a mangimaton kadagiti amin a banag iti relihion ken dagiti problema dagiti tattao iti laud ti Karayan Jordan.

³¹Ni Jerias ti pangulo dagiti kaputotan ni Hebron. Iti maika-40 a tawen a panagari ni David, nausisa ti familia a nagtaudan dagiti kaputotan ni Hebron. Naammoan nga adda dagiti maingel a mannakigubat a nagtaud iti daytoy a familia nga agnanaed idiay Jazer iti sakup ti Galaad.

³²Pimmili ni Ari David iti 2,700 a nalatak a papangulo dagiti familia kadagiti kakabagian ni Jerias ket dinutokanna ida a mangimaton iti amin a banag a pakainaigan ti relihion ken dagiti problema dagiti tattao iti Israel iti dayaen ti Karayan Jordan—dagiti sakup ti Ruben, Gad ken Akindaya a Manases.