Read Iloko 1 Chronicles 29 Bible Online

1 Chronicles 29 - Iloko bible

1 Chronicles 29

¹Impakaammo ni Ari David iti entero a gimong: “Ni Solomon nga anakko ti pinili ti Dios, ngem ubing pay laeng ken awan padpadasna. Naindaklan ti trabaho agsipud ta saan a palasio ti tao, no di ket templo ti Apo a Dios.

²Inaramidko ti amin a kabaelak a nangisagana kadagiti amin a masapsapul a pangbangon iti Templo: balitok, pirak, bronse, landok, kayo, agkakapateg a bato a pagtampok, batbato nga arkos ken nawadwad a marmol.

³Saan la a dayta ti insaganak, nangtedak pay iti bukodko a pirak ken balitok, gapu ta kayatko a mabangon ti Templo ti Diosko.

⁴Nangtedak iti 115 a tonelada iti kapintasan a balitok ken 265 a tonelada ti puro a pirak a pangarkos kadagiti diding ti Templo

⁵ken kadagiti amin a banag nga aramiden dagiti platero. Ita, siasino pay ti mayat a mangted a sibubuslon iti sagut nga agpaay iti Apo?”

⁶Iti kasta, nagboluntario a mangted dagiti pangulo dagiti kapuonan, dagiti ofisiales dagiti tribu, dagiti kapitan ti armada ken dagiti administrador kadagiti sanikua ti ari.

⁷Dagitoy ti intedda nga agpaay iti Templo: 190 a tonelada a balitok, 380 a tonelada a pirak, 675 a tonelada a bronse ken 3,750 a tonelada a landok.

⁸Amin nga addaan kadagiti napateg a bato, intedda iti pagidulinan iti kuarta idiay Templo nga imatonan ni Jehiel a Levita a nagtaud iti kapuonan ni Gerson.

⁹Siaayat dagiti tattao a nangted kadagitoy ken ni Yahweh, ket naragsakda agsipud ta adu ti naited. Kasta unay met ti ragsak ni Ari David.

¹⁰Iti sango ti entero a gimong, indaydayaw ni David ni Yahweh. Kinunana, “O Apo a Dios ni Jacob a kapuonanmi, madaydayawka koma iti agnanayon.

¹¹Naindaklan ken mannakabalinka, nadaeg, nadayag ken natan-okka. Kukuam amin nga adda sadi langit ken ditoy daga. Sika ti ari ken kangatoan a mangituray iti amin.

¹²Sika ti pagtaudan ti amin a kinabaknang ken sanikua, sika ti mangituray iti amin. Addaanka ti pigsa ken pannakabalin ket sika ti mangitan-ok ken mangted iti pigsa iti amin.

¹³Ita, agyamankami kenka, O Diosmi, ket idaydayawmi ti nagloriaan a naganmo.

¹⁴“Nupay kasta, siasinoak ken dagiti tattaok, tapno kabaelanmi nga ited kenka dagitoy? Sika met laeng ti naggapuan dagitoy a sagut ket isublimi laeng ti kukuam.

¹⁵Ammom, O Apo, a kas kadagidi kapuonanmi, ganggannaet ken agalla-allakami. Kasla aniniwan nga aglabas dagiti aldawmi, ket dimi maliklikan ti patay.

¹⁶O Apo a Diosmi, inyegmi amin dagitoy a sanikua a pangbangonmi iti templo a pangdaydayaw iti nasantoan a naganmo, ngem naggapuda amin kenka ket kukuam ida.

¹⁷Ammok a suotem ti puso ti tunggal maysa ket maragsakanka kadagiti nalinteg a tattao. Napudno ken napasnekak a nangted amin kadagitoy kenka. Nakitak ti ragsak dagiti amin a tattaom a naummong ditoy a mangyeg kadagiti sagutda kenka.

¹⁸O Apo a Dios da Abraham, Isaac ken Jacob a kapuonanmi, taginayonem kadi iti puso dagiti tattaom daytoy a kinaanep ti panagayat ket taginayonem ti kinapudnoda kenka.

¹⁹Ikkam ni Solomon nga anakko iti naimpusoan a tarigagay nga agtulnog kadagiti amin a bilinmo ken mangbangon iti Templo nga insagsaganaak.”

²⁰Kalpasanna, binilin ni David dagiti tattao nga idaydayawda ni Yahweh a Diosda. Ket indaydayaw ti entero a gimong ni Yahweh a Dios dagiti kapuonanda. Nagdumog dagiti tattao ket nagdaydayawda ken ni Yahweh, ken nagkurnoda met iti ari.

²¹Iti sumuno nga aldaw, nagpartida kadagiti animal ket indatonda ken ni Yahweh: 1,000 a toro a baka, 1,000 a kalakian a karnero, 1,000 nga urbon a karnero, malaksid dagiti daton nga arak ken adu nga animal para iti amin nga Israelita.

²²Iti dayta nga aldaw, kasta unay ti ragsakda a nangan ken naginum iti imatang ni Yahweh. Kalpasanna, iti maikadua a gundaway, impakdaarda ni Solomon a kas ari. Iti nagan ni Yahweh, kinonsagrarda ni Solomon a mangituray kadakuada kasta met ni Zadok a kas padida.

²³Simmukat ngarud ni Solomon ken ni David nga amana iti trono nga impasdek ni Yahweh. Nasayaat ti panagturayna ket nagtulnog kenkuana ti entero nga Israel.

²⁴Inkari dagiti amin nga ofisiales ken dagiti soldado, uray pay dagiti dadduma nga annak ni David, ti panagtalinaedda a napudno ken ni Solomon nga ari.

²⁵Gapu ken ni Yahweh, nagraem ti entero a pagilian ken ni Solomon. Pinagbalinna a natantan-ok ngem ti uray siasino nga ari a nagturay iti Israel.

²⁶Nagturay ni David nga anak ni Jesse iti entero nga Israel

²⁷iti las-ud ti 40 a tawen. Pito a tawen a nagturay idiay Hebron, ket 33 a tawen idiay Jerusalem.

²⁸Nabaknang ken mararaem ket lakay unayen idi matay. Ni Solomon nga anakna ti simmukat kenkuana nga ari.

²⁹Nailanad iti sinuratan dagiti tallo a profeta, da Samuel, Natan, ken Gad, ti pakasaritaan ti biag ni Ari David manipud rugi aginggat' ipapatayna.

³⁰Saritaenda ti panagturayna, ti bilegna a kas ari, dagiti amin a napasamak kenkuana, iti Israel ken kadagiti dadduma a pagarian iti aglikmut.